ލީޑްސް މޮޅުވިއިރު، ޔުނައިޓެޑާއި ފުލަމް މެޗު އެއްވަރު

އިނގިރޭސި ޕްރިމިއާ ލީގުގައި މިރޭ ސައުތެމްޓަން އަތުން ލީޑްސް ޔުނައިޓެޑް މޮޅުވިއިރު، މެންޗެސްޓަރ ޔުނައިޓެޑާއި ފުލަމް ބައްދަލުކުރި މެޗު އެއްވަރުވެގެން ނިމިއްޖެއެވެ.

ލީގުގައި ލީޑްސް މޮޅުވީ ސައުތެމްޓަންގެ ދަނޑުގައި ކުޅުނު މެޗު 0-2 ގެ ނަތީޖާއަކުން ކާމިޔާބުކޮށްގެންނެވެ.

މި މެޗުގައި ލީޑްސް ޔުނައިޓެޑުން ޖެހި ދެ ލަނޑުވެސް އެޓީމުން ޖަހާފައިވަނީ މެޗުގެ ދެވަނަ ހާފުގައެވެ. އެގޮތުން ލީޑްސްގެ ފުރަތަމަ ލަނޑު 73 ވަަނަ މިނެޓުގައި ކާމިޔާބުކޮށްދިނީ، ޕެޓްރިކް ބެމްފޯޑްއެވެ. އަދި ދެވަނަ ލަނޑު މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި ކާމިޔާބުކޮށްދިނީ، ޓައިލަރ ރޮބާޓްސްއެވެ.

މި ނަތީޖާއާއެކު ލީގުގައި މިހާތަނަށް ކުޅުނު 37 މެޗުން ލިބުނު 56 ޕޮއިންޓާއެކު ލީޑްސް ޔުނައިޓެޑް އޮތީ ތާވަލްގެ 8 ވަނައިގައެވެ. މި މެޗުން ބަލިވި ސައުތެމްޓަން އޮތީ 37 މެޗުން ލިބުނު 43 ޕޮއިންޓާއެކު 14 ވަނައިގައެވެ.

މި މެޗުގެ އިތުރުން އިނގިރޭސި ޕްރިމިއާ ލީގުގައި މިރޭ މެންޗެސްޓަރ ޔުނައިޓެޑާއި ފުލަމް ބައްދަލުކުރި މެޗު ނިމުނީ އެއްވަރުވެގެންނެވެ.

އަހަރު ދުވަހަށް ފަހު ޔުނައިޓެޑްގެ ދަނޑު އޯލްޑް ޓްރެފޯޑަށް ސަޕޯޓަރުން ވައްދައިގެން ކުޅުނު މި މެޗު އެއްވަރުވީ 1-1 އިންނެވެ.

މި މެޗު ފަށައިގެން ފުރަތަމަ ހާފުގައި ގިނަ ވަގުތު ބޯޅަ ކޮންޓްރޯލްކޮށްގެން ކުޅުނީ ޔުނައިޓެޑުންނެވެ. މެޗުގައި ފުރަތަމަ ލަނޑު ފުރަތަމަ ހާފުގެ 15 ވަނަ މިނެޓުގައި ކާމިޔާބުކުރީ ޔުނައިޓެޑުންނެވެ. މި ލަނޑަކީ ޔުނައިޓެޑްގެ ކީޕަރ ޑޭވިޑް ޑެހެއާ ދިން ބޯޅަ އަކުން އެޑިންސަން ކަވާނީ ޖެހި ހިތްގައިމު ލަނޑެކެއެވެ. ކަވާނީ މި ލަނޑު ޖެހީ ކީޕަރ ގޯލުން ނުކުމެ ހުރުމުން ކީޕަރ ބޯމަތިން ގޯލުގެ ތެރެއަށް ބޯޅަ ފޮނުވާލައިގެންނެވެ.

މެޗުގެ ދެވަނަ ހާފް ފަށައިގެން ޔުނައިޓެޑަށް ވަނީ ލީޑު ފުޅާ ކުރަން ގިނަ ފުރުޞަތުތަކެއް ލިބި އޭގެ ބޭނުން ކުރެވޭގޮތް ނުވެފައެވެ. ލީގުން ރެލިގޭޓްވެފައިއޮތް ފުލަމް އިން މެޗުގެ ނަތީޖާ ހަމަހަމަކުރީ 76 ވަނަ މިނެޓުގައި ޖޮއެ ބްރިއަން ކާމިޔާބުކޮށްދިން ލަނޑުންނެވެ.

ޕްރިމިއާ ލީގުގައި ޔުނައިޓެޑަށް ދެން ބަކީ އޮތީ އެންމެ މެޗެކެއެވެ. އެއީ ވުލްވްސް އާއި ވާދަކުރަން ޖެހޭ މެޗެއެވެ. ޕްރިމިއާ ލީގުން މިހާތަނަށް ޗެމްޕިއަންސް ލީގުގެ ޖާގައެއް ކަށަވަރުކޮށްފައިވަނީ ޗެމްޕިއަން ސިޓީ އާއި ދެވަނައިގައި އޮތް ޔުނައިޓެޑުންނެވެ. ތިންވަނަ އަދި ހަތަރު ވަނަ ކަނޑައެޅިގެން ދާނީ ލީގުގެ ފަހު ހަފްތާގެ މެޗުތަކަށް ފަހުއެވެ. އެގޮތުން މިހާރު ތިން ވަނައިގައި ލެސްޓާ ސިޓީ އޮތްއިރު ހަތަރު ވަނައިގައި އޮތީ ޗެލްސީއެވެ. ފަސްވަނައިގައި އޮތް ލިވަޕޫލަށް ގަދަ ހަތަރަކުން ފުރުޞަތު ހޯދުމުގެ އަމިއްލަ ބާރު މިހާރު ވަނީ ލިބިފައެވެ.