ވަރލްޑް ކަޕް އަދި އޭއެފްސީ އޭޝިއަން ކަޕް ޖޮއިންޓް ކޮލިފިކޭޝަންގައި ބާކީ ހުރި މެޗުތައް ކުޅުމަށް ޗައިނާއަށް ފުރުމުގެ ކުރިން ދުބާއީގައި ޤައުމީ ޓީމު ކޭމްޕް ކުރެވޭތޯ މަސައްކަތް ކުރަމުން އަންނަކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ކޮލިފައިންގައި ބާކީ ހުރި މެޗުތައް މި މަހުގެ 30 ވަނަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. މި މެޗުތައް ކުޅުމަށް ޗައިނާއަށް ފުރުމުގެ ކުރިން ޤައުމީ ޓީމުގެ ކުޅުންތެރިން މިހާރު ތިބީ މާލޭގެ ހޮޓެލް ޖެންގައި ކޭމްޕް ކޮށްގެންނެވެ. އަދި މިވަގުތު މާލޭގައި ކޯވިޑް-19 ގެ ހާލަތު ވަރަށް ބޮޑަށް ގޯސްވެފައިވާތީ ޕްރެކްޓިސް ކުރުމުގެ ފުރުޞަތެއް ނުުލިބެއެވެ.
ރާއްޖޭ ޓީވީން ރޭ ގެނެސްދިން ކުޅިވަރު ފައިލް ޕްރޮގްރާމްގައި ވާހަކަ ދައްކަމުން އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، ރާއްޖޭގެ ހާލަތު މިހާރު އޮތް ގޮތުން ދަނޑުގައި ފަރިތަކުރުންތައް ކުރިޔަށް ގެންދިޔުމުގެ ފުރުޞަތު ނެތްކަމަށެވެ. އަދި މިއީ ކޯޗު ކޫޕްމަންގެވެސް ވަރަށް ބޮޑު ޝަކުވާއެއް ކަމަށް ބައްސާމް ވިދާޅުވިއެވެ. ބައްސާމް ވިދާޅުވީ ރާއްޖޭގައި ފަރިތަކުރުންތައް ކުރިޔަށް ގެންދެވެން ނެތުމުން ދުބާއިގައި ގައުމީ ޓީމު ކޭމްޕްކޮށް ފަރިތަކުރުންތައް ކުރިޔަށްގެންދެވޭތޯ މަޝްވަރާ ކުރަމުން އަންނަކަމަށެވެ. އަދި ޗައިނާއަށް ދާނީ ދުބާއީގައި ގާތްގަނޑަކަށް 10 ދުވަހު ތަމްރީނުތައް ހެދުމަށްފަހު ކަމަށްވެސް ބައްސާމް ވިދާޅުވިއެވެ.
ދުބާއީއަށް ފުރުމަށް ގައުމީ ޓީމުން މަސައްކަތްކުރަމުން އަންނައިރު، ޖެންގައި ގައުމީ ޓީމުން އަންނަނީ ފިޒިކަލް ތަމްރީނުތައް ހަދަމުންނެވެ. ޗައިނާއަށް ފުރުމުގެ ކުރިން 33 ކުޅުންތެރިންގެ ޕްރިލިމިނަރީ ސްކޮޑެއް މިހާރު އެކުލަވާލާފައިވާއިރު، ދުބާއީ އާއި ޗައިނާއަށް ދާނީ 25 ކުޅުންތެރިންގެ ސްކޮޑެއް ކަމަށް ބައްސާމް ވަނީ ވިދާޅުވެފައެވެ.
ކޮމެންޓު ފޮނުވާ