ގާޑް މުލާގެ ރެކޯޑާ ލެވަންޑޯސްކީ އަރާ ހަމަކޮށްފި

ޖަރުމަނު ބަޔާން މިއުނިކްގެ ރޮބަޓް ލެވަންޑޯސްކީ ޖަރުމަނު ލީގުގައި 49 އަހަރުވީ ގާޑް މުލާގެ ރެކޯޑާ ހަމަކޮށްފި އެވެ.

އޭނާ މިރެކޯޑް އަރާހަމަކުރީ ޖަރުމަނު ލީގުގައި ރޭ ފްރެއިބާގް ދަނޑުގައި 2-2 އިން ބަޔާން މިއުނިކް އެއްވަރުވި މެޗުގައި އެވެ. ލެވަންޑޯސްކީ މިރޭގެ މެޗުގެ 26 ވަނަ މިނިޓްގައި ބަޔާނަށް ލީޑުނަގައިދިނީ ޕެނަލްޓީ އަކުންނެވެ. ލަނޑަށް ފަހު އުފާފާޅުކުރުމުގެ ތެރޭގައި ލެވަންޑޯސްކީ ވަނީ މުލާ އަށް ހާއްސަކޮށްފައިވާ ޓީޝާޓެއް ދައްކާލައިފަ އެވެ. ލެވަންޑޯސްކީ ލީޑުނަގައިދިންތާ ދެ މިނިޓް ފަހުން ލީގުގެ 10 ވަނައިގައި އޮތް ފްރެއިބާގްގެ މެނުއަލް ގޫލްޑާ ވަނީ ގޯލެއް ޖަހައި ނަތީޖާ ހަމަހަަމަކޮށްފަ އެވެ. ދެ ވަނަ ހާފް ފެށިގެން އަށް މިނިޓް ތެރޭ ލެރޯއި ސާނޭ ބަޔާނަށް އަލުން ލީޑުނަގައިދިނެވެ. އަދި މެޗު ނިމެން ނުވަ މިނިޓަށް ވެފައި ވަނިކޮށް ފްރެއިބާގަށް އެއްވަރުކޮށްދިނީ ކްރިސްޓިއަން ގަންޓާ އެެވެ.

މިދިޔަ ހަފްތާގައި ލީގު ޗެމްޕިއަންކަން ކަށަވަރުކުރި ބަޔާން އެއް ވަނައިގައި އޮތީ 33 މެޗުން 75 ޕޮއިންޓާ އެކު އެވެ. ދެ ވަނައިގައި އޮތް އާރްބީ ލައިޕްޒިގާއި ތިނެއްގައި އޮތް ވުލްފްސްބާގާއި ހަތަރެއްގައި އޮތް ޑޯޓްމަންޑް ކުޅެފައިވަނީ 32 މެޗެވެ. ލައިޕްޒިގަށް 64 ޕޮއިންޓް ލިބިފައިވާއިރު، ވުލްފްސްބާގްގެ އޮތީ 60 ޕޮއިންަޓެވެ. އަދި ޑޯޓްމަންޑްގެ ވަނީ 58 ޕޮއިންޓް ހޯދައިފަ އެވެ.

ލީގު ސީޒަނެއްގައި 40 ގޯލު ޖަަހައިގެން ކުރީގެ އެއް ވަަނަ ފޯވާޑް މުލާ ރެކޯޑް ހެދީ 1972 ވަނަ އަހަރު އެވެ. ދުނިޔޭގެ މޮޅު ކުޅުންތެރިޔާގެ މަގާމު މިދިޔަ އަހަރު ހޯދި ޕޮލެންޑްގެ ލެވަންޑޯސްކީ މި ފަހަރުގެ ލީގުގައި 40 ގޯލު ޖެހީ 28 މެޗުންނެވެ. އަނިޔާގެ ސަބަބުން ލެވަންޑޯސްކީ އަށް މެޗުތަކެއް ގެއްލުނެވެ. މުލާގެ ރެކޯޑް މުގުރާލަން ލެވަންޑޯސްކީ އަށް ބާކީ މެޗެއް އެބައޮތެވެ.

މުލާ ރެކޯޑް ހެދީ ކޮންމެ 77 މިނިޓުން ގޯލެއް ޖަހައިގެންނެވެ. ލެވަންޑޯސްކީ ވަނީ ކޮންމެ 58 މިނިޓުން ގޯލެއް ޖަހައިފަ އެވެ.