އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު މެދު ކެޑުމެއްނެތި ހަމަލާ ބަދަލު ކުރުން ކުރިޔަށް ދާއިރު، އިސްރާއީލު ސިފައިން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އުދުވާނާއި ދެކޮޅަށް ޝުޢޫރު ފާލުކުރުމަށް، އިގިރޭސިވިލާތުގެ ސެންޓްރަލް ލަންޑަންގެ މަގުތަކަށް އެތައްހާސް ބަޔަކު ޖަމާވެ މުޒާހިރާ ކުރަން ފަށައިފިއެވެ.
މުޒާހިރާ ކުރާ މީހުން ގޮވަމުންދަނީ، އިސްރާއީލު ސިފައިން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އިންސާނިއްޔަތާ ޚިލާފު ޖަރީމާތައް ހުއްޓުވުމަށް އިނގިރޭސި ސަރުކާރުން ވަގުތުން ވަގުތަށް ފިޔަވަޅު އެޅުމަށެވެ.
ހޮނިހިރު ދުވަހުގެ މެންދުރު، އެތައްހާސް މީހުންނެއް ވަނީ، ފަލަސްތީނު މިނިވަން ކުރުމަށް ގޮވާލާ ޝުޢޫރު ފާޅުކުރަމުން، ސެންޓްރަލް ލަންޑަނުގެ ހައިޑް ޕާރކް ސަރަހައްދުން ފެށިގެން ހިގާލުން ކުރިޔަށް ގެންގޮސްފައެވެ. އަދި މުޒާހިރާގެ ބައިވެރިން މަޑުކޮށްފައިވަނީ، ލަންޑަނުގެ ކެންސިންގޓަންގައި ހުންނަ އިސްރާއީލު އެމްބަސީގެ ކުރިމަތީގައެވެ.
މި މުޒާހިރާ އިންތިޒާމްކުރި ފަރާތްތަކުން ބުނެފައިވަނީ، ކެންސިންގޓަންގައި ހުންނަ އިސްރާއީލް އެމްބަސީ ކުރިމައްޗަށް އެއްވި މުޒާހިރާގެ ބައިވެރިންގެ އަދަދު 100،000އަށް އަރާކަމަށެވެ.
ކެންސިންގޓަންގައި ހަދާފައިވާ ސްޓޭޖެއްގައި ހުރެ، ލޭބަރ ޕާޓީގެ މެމްބަރެއްކަމުގައިވާ ޑައާން އަބޮޓް މުޒާހިރާއަށް ހާޒިރުވެ ތިބި މީހުންނާ މުޚާތަބުކޮށް ބުނެފައިވަނީ، "އަހަރެމެން އެންމެވެސް ހަދާން ކުރަންވާނެ، އަހަރެމެންނަކީ ބައިނަލް އަގުވާމީ ހަރަކާތެއްގެ ބައިވެރިންކަން."
"މިއީ ސުލްޙައަށް މަސައްކަތްކުރާ ބައިނަލް އަގުވާމީ ހަރަކާތެއްގެ ބައިވެރިން،" އޭނާ ބުނެފައި ވެއެވެ.
"ފަލަސްތީނުގެ ރައްޔިތުންގެ ބިންތައްވަނީ އެމީހުންގެ ކިބައިން ނިގުޅައިގަނެވިފަ، އަދި އެމީހުންގެ ބިންތަކުގައި އެދަނީ އެމީހުން މަރަމުން،" މުޒާހިރާގެ ބައިވެރިންނާ ވާހަކަ ދައްކަމުން ބައެއް ބައިވެރި ބުނެފައި ވެއެވެ. "މިއީ ބައިނަލް އަގުވާމީ ގާނޫނުތަކާ މުޅިން ޚިލާފުކަމެއް."
މި އެއްވުމުގައި، އިނގިރޭސިވިލާތުގެ ލޭބަރ ޕާޓީގެ ކުރީގެ ލީޑަރު ޖެރެމީ ކޯބީންވެސް ވާހަކަ ދައްކަވާފައި ވެއެވެ. "އަހަރެމެން މިއަދު ފާޅުކުރަމުން މިދާ ޝުޢޫރުތަކުން ގާޒާއާއި އަދި ހިފާފައިވާ އެހެނިގެން ބިންތައް ކަމުގައިވާ ވެސްޓް ބޭންކް އަދި އީސްޓް ޖެރޫސަލަމްގައި ދިރިއުޅެމުންދާ ފަލަސްތީނުގެ ރައްޔިތުންގެ ވޭންތަކަށް ކޮންމެވެސް ވަރެއްގެ ހަމަޖެހުމެއް ލިބޭނެ،" އޭނާ ވިދާޅުވެފައި ވެއެވެ.
މި އެއްވުމުގެ ބައިވެރިންނާ، ފަލަސްތީނުން އިނގިރޭސިވިލާތަށް ކަޑައަޅާފައި ހުންނަވާ ސަފީރު ހުސާމް ޒުލްމޮޓްވެސް ވަނީ ވާހަކަ ދައްކަވާފައެވެ. "މިފަހަރަ ތަފާތުވާނެ. މި ފަހަރު އަހަރެމެންނަށް އިތުރަށް އޮޅުވައެއް ނުލެވޭނެ. އަހަރެމެން އެންމެން މިތިބީ އެކީގައި. އަހަރެމެން އަޅުވެތި ކޮށްގެން އުޅެވިއްޖެ. މިހާރު ފުދިއްޖެ،" މިޒާހިރާގެ ބައިވެރިންނާ މުޚާތަބުކޮށް ވާހަކަ ދައްކަވަމުން އޭނާ ވިދާޅުވެފައި ވެއެވެ.
ފަލަސްތީނާއެކީ ދެމިތިބި ކަމަށްޓަކާ އޭނާވަނީ މުޒާހިރާގެ ބައިވެރިންނަށް ޝުކުރު އަދާކޮށްފައެވެ.
ފަލަސްތީނަށް ތާއީދުކޮށް އިނގިރޭސިވިލާތުގައި މުޒާހިރާ ކޮށްފައި މިވަނީ، އިސްރާއީލު ސިފައިނާ ހަމާސް ޖަމާއަތުގެ މުޖާހިދުންނާ ދެމުދު ވަރަގަދައަށް ހަމަލާ ބަދަލު ކުރުންތައް މެދުނުކެޑި ކުރިޔަށް ދާތާ 6 ދުވަސް ވެފައިވަނިކޮށެވެ.
ގާޒާއިން ހަމާސް ޖަމާއަތުގެ މުޖާހިދުން އިސްރާއީލަށް އަމާޒުކޮށް އެތައް ސަތޭކަ ރޮކެޓެއް އުދައްސަމުން ދާއިރު، އިސްރާއީލުންދަނީ މެދުނުކެޑި ގާޒާ ސިޓީއަށް މިސައިލް ހަމަލާތައް ދެމުންނެވެ. މިހަމަލާތަކުގައި މިހާތަނަށް އައިއިރު ފަލަސްތީނުގެ 126 މީހަކުވަނީ ޝަހީދުވެފައެވެ.
މީގެތެރޭގައި 31 ކުޑަކުދިންނާ 20 އަންހެނަކު ހިމެނެއެވެ. އަދި އިސްރާއީލުންވަނީ 7 މީހަކު މަރުވެފައެވެ. މީގެތެރޭގައި އެއް ކުޑަކުއްޖަކާ ސިފައިންގެ މީހަކު ހިމެނެއެވެ.
