ފްރެންޗް ކަޕުގެ ސެމީ ފައިނަލުގައި ޕެނަލްޓީ ޖަހައިގެން މޮންޓަޕެލިއޭ ބަލިކޮށް، މުބާރާތުގެ ފައިނަލަށް އެންމެ ފަހުގެ ޗެމްޕިއަން ޕީއެސްޖީ ދަތުރުކޮށްފިއެވެ.
މެޗުން ޕީއެސްޖީ މޮޅުވީ ފުރިހަަމަ ވަގުތު ހަމަވިއުރު ނަތީޖާ 2-2 ލަނޑުން އެއްވަރުވުމުން ޕެނަލްޓީ ޖަހައިގެން 6-5 ލަނޑުންނެވެ. މެޗުގެ ވަރަށް ކުރީކޮޅު ޕީއެސްޖީން ވަނީ ލީޑު ނަގާފައެވެ. މެޗު ފަށައިގެން 10 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކީލިއަން އެމްބާޕޭއެވެ. އެކަމަކު ފުރަތަމަ ހާފުގެ ފަހު މިނެޓުގައި ގައެޓަން ލަބޯޑް ވަނީ މޮންޕެލިއޭއަށް ނަތީޖާ އެއްވަރުކޮށްދީފައެވެ.
ދެވަނަ ހާފުގެ ވަރަށް ކުރީކޮޅު އެމްބާޕޭ ވަނީ އިތުރު ލަނޑެއް ޖަހައި، ޕީއެސްޖީއަށް އަލުން ލީޑު ނަގާދީފައެވެ. އެއާއެކު މޮންޓަޕެލިއޭއިން ކުޅުން ރަނގަޅުކުރިއިރު، މެޗު ނިމެން ހަތް މިނެޓަށް ވެފައި ވަނިކޮށް އެ ޓީމުން ވަނީ މި މެޗުގައި ދެވަނަ ފަހަރަށް ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އެންޑީ ޑެލޯޓެވެ.
މި މެޗުގެ ފުރިހަމަ ވަގުތު ހަމަވިއިރު، ދެ ޓީމު އެއްވަރުވެފައި އޮތުމުން ނަތީޖާ ނެރުމަށް ވަނީ ޕެނަލްޓީ ޖަހާފައެވެ. އެގޮތުން ޕެނަލްޓީ ޝޫޓްއައުޓުގައި ޕީއެސްޖީން ހަ ޕެނަލްޓީވެސް ކާމިޔާބުކުރިއިރު، މޮންޓަޕެލިއޭގެ ޖޫނިއާ ސާމްބިއާ ފޮނުވާލި ހަވަނަ ޕެނަލްޓީ ކާމިޔާބުވެފައެއް ނުވެއެވެ. ޕީއެސްޖީން ވަނީ މިހާތަނަށް 13 ފަހަރު މި މުބާރާތް ކާމިޔާބުކޮށްފައެވެ.
ކޮމެންޓު ފޮނުވާ