އެތުލެޓިކޯ މެޑްރިޑް ލީގު ޗެމްޕިއަންކަން ހޯދުމާ ގާތަށް

ސްޕެނިޝް ލީގުގައި ރޭ އަމިއްލަ ދަނޑުގައި ރެއާލް ސޮސިއެޑާޑް 2-1 އިން ބަލިކޮށް އެތުލެޓިކޯ މެޑްރިޑް ލީގު ޗެމްޕިއަންކަން ހޯދުމާ ގާތަށް ޖެހިލައިފި އެވެ.

މެޗުގެ 16 ވަނަ މިނިޓްގައި އެތުލެޓިކޯ އަށް ލީޑުނަގައިދިނީ ބެލްޖިއަމްގެ ވިންގް ޔަނިކް ކަރާސްކޯ އެވެ. މިއީ މާކޯސް ލޮރެންޓޭ ދިން މޮޅު ބޯޅައަކުން ކަރާސްކޯ ޖެހި ގޯލެކެވެ. މެޗުގެ 28 ވަނަ މިނިޓްގައި އެންހެލް ކޮރޭއާ ވަނީ ގޯލެއް ޖަހައި އެތުލެޓިކޯގެ ލީޑުފުޅާކޮށްދީފަ އެވެ. އޭނާ މި ގޯލު ޖެހީ ލުއިސް ސުއަރޭޒް ދިން ބޯޅައަކުންނެވެ. މެޗު ނިމެން ހަތް މިނިޓަށް ވެފައި ވަނިކޮށް ސޮސިއެޑާޑްގެ ހަަމައެކަނި ގޯލު ޖެހީ އީގޯ ޒުބެލްޑީއާ އެވެ. ލީގުގެ ހަތަރެއްގައި އޮތީ ރޭ ވެލެންސިއާ އަތުން 1-0 އިން މޮޅުވި ސެވިއްޔާ އެވެ. ސެވިއްޔާ އަށް 36 މެޗުން ވަނީ 74 ޕޮއިންޓް ލިބިފަ އެވެ.

ލީގުގައި އެންމެފަހުން ކުޅުނު މެޗުން މޮޅުވެގެން އެއް ވަނަ އަށް އެރުމުގެ ފުރުސަތު ބާސެލޯނާ އަށް އޮތެވެ. އެކަމަކު ފަހު ވަގުތު އެ ޓީމު ލެވާންޓޭއާ ވީ އެއްވަރެވެ. އެ ނަތީޖާގެ ފައިދާނަަގައި ލިގުގެ އެއް ވަނައިގައި ހަތަރު ޕޮއިންޓަށް ލީޑުފުޅާކުރުމުގެ ފުރުސަތު އެތުލެޓިކޯ އަށް އޮތީ ހުޅުވިފަ އެވެ. އެ ޓީމުން މިރޭ ވަނީ އެ ފުރުސަތުގެ ބޭނުން ހިފައިފަ އެވެ.

ފަހު ދެ މެޗަށް ނުކުންނައިރު އެތުލެޓިކޯ ލީގުގެ އެއް ވަނައިގައި އޮތީ 36 މެޗުން 80 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް 36 މެޗުން ލިބުނީ 76 ޕޮއިންޓެވެ. އެންމެ ފަހުގެ ޗެމްޕިއަން ރެއާލް މެޑްރިޑް ތިން ވަނައިގައި އޮތީ 35 މެޗުން 75 ޕޮއިންޓާ އެކު އެވެ. މާދަމާރޭ ރެއާލުން ގްރަނާޑާ ބަލިކޮށްގެން ދެ ވަނަ އަށް އަރައި އެތުލެޓިކޯގެ ލީޑު ދެ ޕޮއިންޓަށް ކުޑަކުރެވޭނެ އެވެ

ރެއާލާއި ބާސެލޯނާ ފަހަތަށް ޖައްސާލައި ޑިއޭގޯ ސިމިއޯނީ ކޯޗުކޮށްދޭ އެތުލެޓިކޯ އިން އެންމެ ފަހުން ލީގު ޗެމްޕިއަންކަން ހޯދީ 2014 ވަނަަ އަހަރު އެވެ.