ޒީ ސިނަމާ އާއި ސަލްމާން ޚާން ފިލްމްސް (އެސް ކޭ އެފް) އިން ވަނީ ސަލްމާން ޚާންގެ ފިލްމު "ރާދޭ: ޔުއާ މޯސްޓް ވޯންޓެޑް ބާއީ" އިން ލިބޭ އާމްދަނީ އިން ކޯވިޑް 19ގެ ހާލަތު ރަނގަޅު ކުރުމަށް ބޭނުންވާ ތަކެތި ގަތުމަށް ނިންމާފައެވެ.
އެގޮތުން ބޭނުންވާ ސިއްހީ ވަސީލަތްތައް، އޮކްސިޖަން ކޮންސެންޓްރޭޓަރ އަދި ހާލުގައި ޖެހިފައި ތިބި މީހުންނަށް ކާނާ ފޯރު ކޮށްދިނުން ހިމެނެއެވެ.
ރާދޭ ރިލީސް ކުރުމަށް ހަމަޖެހިފައިވަނީ ޢީދު ދުވަހާ ދިމާކޮށް މި މަހުގެ 13 ވަނަ ދުވަހުއެވެ.
އިންޑިއާގައި ކޯވިޑްގެ ހާލަތު ގޯސްވެ ކޮަންމެ ދުވަހަކުވެސް މި ބައްޔަށް ޕޮޒިޓިވްވާ މީހުންގެ އަދަދު އެތަށްގުނައެއް އިތުރުވެ، ބައްޔަށް ފަރުވާ ދިނުމަށް ބޭނުންވާ އެކިއެކި ވަސީލަތްތައް ވަނީ މިބަލީގައި ހާލުދެރަވާ މީހުންގެ އަދަދާއި އަޅާބަލާއިރު މަދު ވެފައެވެ. އަދި މި ކަމާއި ގުޅިގެން ބައެއް އަމިއްލަ ފަރާތްތަކުން ވެސް ގެންދަނީ އެހީތެރިވުމުގެ އެކިއެކި ޕްރޮގްރާމްތައް ހިންގަމުންނެވެ. އެސް ކޭއެފް އާއި ޒީ އިން ނިންމާފައިވަނީ ދުވަހު މުސާރައަށް މަސައްކަތް ކުރާ އާއިލާތަކަށް ވެސް އެހީތެރިވުމަށެވެ.
ސަލްމާން ޚާންގެ ސްޕޯކްސް ޕަރސަން ބުނެފައިވަނީ މިހާލަތުގައި ވެސް އެހީތެރިކަން ފޯރުކޮށްދިނުމަކީ ސަލްމާން އަށް ލިބޭ ފަޚުރެއް ކަމަށެވެ. އަދި އޭނާ ހުރީ އޭނާއަށް ވީ މިންވަރަކުން މި އިންސާނީ މުސީބާތުން އަރައިގަތުމަށް އެހީތެރިވުމަށް ތައްޔާރަށެވެ.
