މެންޗެސްޓާ ޔުނައިޓްގެ ފޯވާޑް އެޑިންސަން ކަވާނީ މި ސީޒަނަށް ފަހު އެ ޓީމު ދޫކޮށްލަން ނިންމި ނިންމުން ބަދަލުކޮށް ޔުނައިޓެޑްގައި މަޑުކުރަން ވިސްނަމުން އަންނަ ކަމަށް އިނގިރޭސި މީޑިއާ ރިޕޯޓްތައް ބުނެފިއެވެ.
މިދިޔަ އަހަރު ޕީއެސްޖީ ދޫކޮށްލުމަށް ފަހު ނުކުޅެ ދުވަސްތަކެއް ހުރުމަށް ފަހު އުމުރުން 34 އަހަރުގެ ކަވާނީ މި ސީޒަނުގައި އެއް އަހަރުގެ ކޮންޓްރެކްޓެއްގެ ދަށުން ޔުނައިޓެޑާ ގުޅުނީ ސެޕްޓެމްބަރު މަހު އެވެ. ރޯމާ މެޗަށް ފަހު ޔުނައިޓެޑްގެ ކޯޗު އޮލެ ގުނަ ސޯލްޝެއާ ވަނީ ކަވާނީ މަޑުކުރުވަން ޔުނައިޓެޑުން ކުރެވޭނެ ހުރިހާ ކަމެއް ކުރަމުން އަންނަ ކަމަށާއި ބެލެވޭ ގޮތުގައި އަންނަ ހަފްތާގައި ގޮތެއް ނިމިގެންދާނެ ކަމަށެވެ. ބައެއް ރިޕޯޓްތައް ބުނާގޮތުން ކަވާނީ މިހާރު ނިންމާފައިވަނީ އިތުރު އެއް އަހަރަށް ޔުނައިޓެޑްގައި މަޑުކުރާށެވެ.
މީގެ ކުރިން ކަވާނީ ޔުނައިޓެޑްގައި މަޑުނުކުރަން ނިންމި އެންމެ ބޮޑު ސަބަބަކީ މި ސީޒަނުގެ ކުރީކޮޅުގައި ސޯޝަލް މީޑިއާގައި ނަސްލީ ތަފާތު ކުރުމަށް ހިތްވަރުދިން ކަމަށް ބުނެ، ކަވާނީ ތިން މެޗަށް ސަސްޕެންޑް ކުރުމުންނެވެ. އެއީ ކަވާނީ އޭނާގެ ގާތް ރަހުމަތްތެރިއަކަށް ނިސްބަތްކޮށް އިންސްޓަގްރާމްގައި ކުރި ނަސްލީ ތަފާތުކުރުމާ ގުޅޭ ޕޯސްޓެއްގެ މައްސަލައިގައި ކަވާނީ އަށް ދިން އަދަބެކެވެ.
ޔޫރޮޕާ ލީގުގެ ސެމީ ފައިނަލްގައި ރޯމާ ކޮޅަށް ޖެހި މި ދެ ގޯލާ އެކު ކަވާނީ ވެފައިވަނީ ޔޫރަޕްގެ މުބާރާތެއްގެ ސެމީ ފައިނަލުގެ އެއް މެޗެއްގައި ދެ ގޯލު ޖެހި އެންމެ ދުވަސްވީ ކުޅުންތެރިޔާ އަށެވެ. ކުރިން މި ރެކޯޑް އޮތީ 2005 ވަނަ އަހަރުގެ ޗެމްޕިއަންސް ލީގުގެ ސެމީގައި އޭސީ މިލާން ކޮޅަށް ދެ ގޯލު ޖެހި ޕީއެސްވީގެ ފިލިޕް ކޮކޫ އަތުގައެވެ.
ކޮމެންޓު ފޮނުވާ