އިރުއޮއްސެމުން ދިޔަ ވަގުތެވެ. މާލޭގެ ހުޅަނގު ފަރާތުން ތޮށިމަތީގައި އެކަނި މާއެކަނި ނާޒް އިނެވެ. އޮއްސެމުން ދިޔަ އިރުގެ ރަންދަޅަތައް ނާޒްގެ މޫނަށް އެޅިފައިވާއިރު އޭނާގެ ރީތިކަން އިންތިހާއަށް އިތުރުވެފައިވެއެވެ. އޮމާން މޫނެކެވެ. ކަޅުކުލަ ގަދަ ދެބުމައެވެ. ރީތި ދެލޮލެވެ. ނާޒްގެ ރީތިކަމާއި ފުރިހަމަކަމަށްޓަކައި އެތައް ފިރިހެނަކު ނާޒްގެ ފަހަތުން މުގޯލި އަޅައެވެ. މުއްސަނދީންނާއި އާދައިގެ މީހުންނެވެ. ދީންވެރި ފިރިހެނުންނާއި ތަންކޮޅެއް އަބުއި ޒުވާނުންނެވެ. އޭގެ ތެރޭގައި ނާޒް ގަޔާވާ ނާޒް ހިތްއެދޭ ހުރިހާ ސިފައެއް ހުރި މީހުންވެސް ތިއްބެވެ. ނާޒް ހިތާވާ އަދި އެމީހަކާއިއެކު ދިރިއުޅުމެއް ފަށަށް ބޭނުންވާ މީހުންވެސް ތިއްބެވެ. އެކަމަކު އެއިން އެކަކަށްވެސް ނާޒްއަށް ޖަވާބެއް ނުދެވުނެވެ. ލޯބި ބޭނުން ނުވާތީއެއް ނޫނެވެ. ލޯބި ދެވެން ނެތަތީއެވެ.
މީހަކާވެސް ނުއިނދެ އެކަނިމާއެކަނި އެހެންހުއްޓައި އޭނާގެ ޒުވާން އުމުރު ފަހަނައަޅައި ދަނީއެވެ. ނާޒްގެ އުމުރުން 35 އަހަރުވެފައި ވިޔަސް އަދިވެސް އޭނާ ފެންނަނީ ޒުވާން ކޮށެވެ. އޭނާގެ ފަހަތުން މުގޯލި އަޅާމީހުންތައް ހުސްނުވެގެން އުޅެނީ އެހެންވެއެވެ.
ބަންގި ގޮވަން ކައިރިވުމުން ނާޒް ގެއަށް އައެވެ. އޭރު މަންމަ އިނީ ސިޓިންގ ރޫމުގެ ތެރޭގައި ޓީވީ އަންނަ ދީނީ ދަރުސެއް ބަލާށެވެ. މަންމަގެ ކައިރީގައި ޝަހީމްވެސް އިނެވެ. ނާޒް ވަދެގެން އަންނަތަން ފެނުމުން އޭނާ ނާޒްއަށް ބަލާލީ އެވެ. އާދޭސްކުރާ ފަދަ ގޮތަކަށެވެ. އަދި ނާޒްއަށް ނިތް އަރުވާލިއެވެ. ޖަވާބުގައި ނާޒްވެސް ހީލުމަށްފަހު ގޮސްވަނީ ކޮޓަރިއަށެވެ.
ޑްރެސިންގެ ޓޭބަލް ކުރިމަތީ ހުއްޓި ނާޒް އޭނާގެ ހަށިގަނޑަށް ބަލާލިއެވެ. އުމުރުން ދުވަސްވަމުން ދާވަރަކަށް އޭނާގެ ރީތިކަންވެސް އެދަނީ ގެއްލެމުންނެވެ. އެކުގައި އުޅުނު ހުރިހާ ރައްޓެހީން މީހުންނާއި އިނދެ ދިރިއުޅުން ފަށައި ދަރީން ލިބުނު އިރު އަދިވެސް ނާޒްހުރީ ހުހަށެވެ. ޝަހީމްފަދަ އެތައް މީހަކު ނާޒްގެ ކައިވެންޏަށް އެދިގެން އަޔަސް އެއެންމެވެސް ދިޔައީ ނާޒްގެ ޖަވާބެއް ނުލިބުމުންނެވެ.
ޝަހީމަކީ ނާޒްއަށް ވުރެ ދެއަހަރު ހަގު ޒުވާނެކެވެ. މަތީ ތައުލީމު ހާސިލްކޮށްގެން އަދި ސަރުކާރުގެ ޒިންމާދާރު މަޤާމެއްގައި ހުރި މީހެކެވެ. ނާޒް ސްކޫލުގައި އުޅުނީއްސުރެ ޝަހީމް އައީ ނާޒްގެ ފަހަތުން އޭނާގެ ލޮތްބަށް އާދޭސް ކުރަމުންނެވެ. އޭނާ ލަންޑަނަށް ކިޔަވަން ދިޔައިރުވެސް ނާޒް ހުރީ އޭނާއަށް ޖަވާބެއް ނުދީއެވެ.
އޭރު ނާޒް ލޯބިވީ ނިޔާޒް ދެކެއެވެ. އޭނާ އަކީ ނާޒްއަށްވުރެ ހަތަރު ފަސް އަހަރު ދޮށީ ފިރިހެނެކެވެ. ޗާލާކީ މީހެކެވެ. އަންހެނުން ހިތި ފިރިހެނެކެވެ. އޭނާއަށް ފެނިގެން މާލޭގެ މަގުމަތިންވެސް އަންހެނަކަށް ހިނގާފައެއް ނުދެވޭނެއެވެ. ކޮންމެވެސް މައްލަވައެއް ކުރާނެއެވެ. ތުނބުން ފުމެލާނެއެވެ. ނުވަތަ މަންޖޭ ހާދަ ރީއްޗޭ ބުނެލާނެއެވެ. ނާޒްގެ ހިތްވެސް ނިޔާޒް އަތުލީ އެގޮތުގައެވެ. އެދެމީހުން ރައްޓެހިވިތާ ސަތާރަ ވަރަކަށް އަހަރުވެފައިވާއިރު އެގުޅުމުގައި ކައިވެނީގެގޮށް ޖަހަން ނިޔާޒް ބޭނުން ނުވަނީއެވެ. އޭނާ ނާޒް ހަދާފައިވަނީ އޭނާ ކުޅެން ގެންގުޅޭ އެއްޗަކަށެވެ.
ނިޔާޒް އެހެން މީހަކާއި އިނދެ ދަރިންވެސް ލިބިއްޖެއެވެ. އެކަމަކު ނާޒް އެހެން މީހަކާއި އިންނަން ޤަބޫލު ނުވާ ތާނގައި ނިޔާޒް ނާޒްއާއި އިންނާކަށްވެސް ނޫޅުނެވެ. ނާޒްވެސް ނިޔާޒާއި އިންނާކަށް ކޮންމެހެން ބޭނުމެއް ނޫނެވެ. އޭނާގެ ހިތުގައި އިރަކު ނިޔާޒާއި ދޭތެރޭ ލޯބި އޮތަސް ނިޔާޒާއި މެދު ނާޒް ހިތުގައި އަނދަމުންދަނީ ނަފުރަތާއި ރުޅިވެރިކަމުގެ އަލިފާނެއް ކަމުގައިވާތީއެވެ. އެހެން ނަމަވެސް ނާޒްގެ ކިބައިގައި ނިޔާޒްއާއި ވަކިވެ އައު ދިރިއުޅުމެއް ފަށާނެ ހިއްވަރެއް ނެތެވެ. އެއަށްވުރެ މާބޮޑަށް ނާޒްހުރީ ނިޔާޒްގެ މުށުތެރޭގައި ހައްޔަރުވެފައެވެ.
ކިޔަވައި ނިމިގެން މާލެއައި ފަހުން ކޮންމެ ދުވަހަކުވެސް ހަވީރު ޝަހީމް ގެއަށް އަންނާނެއެވެ. ނާޒްގެ މަންމަ ގާތު ވާހަކަ ދައްކަން އިންނާނެއެވެ. އޮފީސް ނިންމާފައި ނާޒްގޮސް ތޮށިގަނޑުމަތީގައި އިންނަނީ އެހެންވެއެވެ. ޝަހީމް އޮފީހުން ނިމިގެން ކޮންމެ ދުވަހަކުވެސް އެގެއަށް އަންނާތީ އޭނާއަށް ފިލާށެވެ.
ޝަހީމްދެކެ މިހާރު ނާޒްވެސް ލޯބިވެއެވެ. ޝަހީމާއި އެކު ދިރިއުޅުމެއްވެސް ފަށަށް ބޭނުންވެއެވެ. އެކަމަކު ނާޒްގެ ގަޔަކު އެ ހިތްވަރެއް ނެތެވެ. އެއީ އެހެނީ އޭނާވަނީ އެހެން މީހެއްގެ ކެހިވެރި ހީލަތްތެރި މުށުތެރޭގައި ހައްޔަރުވެފައެވެ. އެދަންތުރައިގައި ބެދި ހައްޔަރުވެފައި ހުންނަތާ 17 އަހަރުވީއެވެ. ކުރެވޭނެ ހަމަ އެއްކަމެއްވެސް ނާޒްއަށް ނެތީއެވެ. އެއްވެސް މަގެއް ނުފެނުނީއެވެ. އޭނާއަށް ކުރެވޭހާވެސް ކަމަކީ ނިޔާޒް ބުނާހައި ގޮތަކަށް އުޅުމެވެ. އޭނާ ބޭނުން ރެޔަކު ބޭނުން ތަނަކަށް ގޮސް އޭނާގެ ތަންމަތި ފަޅުފިލުވައި ދިނުމެވެ. ނާޒްގެ މުސާރައިން އޭނާ ބޭނުންވަރެއް އޭނާއަށް ދިނުމެވެ.
ނާޒް ނިޔާޒާއި ރައްޓެހިވީ އޭނާގެ އުމުރުން އަށާރަ އަހަރުވެސް ނުފުރެނީހެވެ. ނިޔާޒްގެ ހުށައެޅުމަށް ނާޒް އާނއެކޭ ބުނީ އޭނާގެ ގޮތް ރަނގަޅަށް ދަސް ނުވަނީހެވެ. އޭނާގެ ރީތިކަމާއި ޗާލާކީ ކަމުގެ އަވައިގައި ޖެހިގެންނެވެ. ހަގީގަތުގައި އެދެމީހުންގެ ގުޅުމަށް 17 އަހަރު ވިޔަސް މިވީ ސަތާރަ އަހަރުގެ ތެރޭގައި ނާޒް އާއި ނިޔާޒްގެ މެދުގައި އޮތީ ލޯބީގެ ގުޅުމެއް ނޫނެވެ. މަޖުބޫރު ގުޅުމެކެވެ.
ނިޔާޒާއި ރައްޓެހިވިތާ ހަތަރު މަސްވެސް ނުވަނީ ނާޒްގެ ހިތުން ނިޔާޒްގެ ލޯބި ފިލައިފިއެވެ. އޭނާ ކަންތައް ކުރި ގޮތުންނެވެ. އޭނާ ބޭނުން ވަނީ ލޯބި ނޫންކަމާއި ޝަހުވަތްތެރިކަން ކަން އެނގުމުންނެވެ. އެކަމަކު އޭރު ނާޒަށްވެސް އޮތީ ގޯސް ހެދިފައެވެ. ނިޔާޒް ބޭނުންވި ކަންކަން ކޮށްދެވިފައެވެ. އެރޭގެ ހަނދާންތައް ނާޒްނެތޭނީ ކިހިނެއްހެއްޔެވެ؟ އެއީ އޭނާގެ މުޅި ހަޔަތް ބަރުބާދުވި ރެއެވެ. އަނިޔާވެރިއެއްގެ މުށުތެރޭގައި ހައްޔަރުވީ ރެއެވެ.
އެރޭ ނިޔާޒް އެދުނު ހުރިހާކަމެއް ނާޒްކޮށްދިނީ ލޯބިންނެވެ. ލޯބީގެ މަސްތާއި ދީވަނާ ކަމުގައެވެ. އެކަމާއި މެދު ނާޒްއަށް ވިސްނާލެވުނު އިރު ބާކީ ހަމައެކައްޗެއްވެސް ނެތި އޭނާގެ އަތުން ހުރިހާއެއްޗެއް ބީވެއްޖެއެވެ. އޭގެ އަނެއްރޭވެސް ނިޔާޒްގެ ކޮޓަރިއަށް އައުމަށް ނާޒަށް ނިޔާޒް ދައުވަތު ދިނެވެ. އެކަމަކު ނާޒް ދެކޮޅު ހެދީއެވެ. އެއީ ނިޔާޒްގެ ކޮޓަރިއަށް ނާޒް ދިޔަ ފުރަތަމަ ރޭގައިވެސް އެކޮޓަރީގެ ތެރެއަށް ނިޔާޒް އެހެން އަންހެނުންވެސް ވައްދާކަން ޝައްކެއް ނެތް މިންވަރަށް އޭނާއަށް ޔަޤީން ވިޔަތީއެވެ.
ނާޒް ނިޔާޒާއި ދުރުވާން މަސައްކަތްކުރާ ކަމަށް ހީވުމުން ނިޔާޒު ދިނީ ވަރުގަދަ އިންޒާރެކެވެ. އޭނާއާއި ވަކިވެއްޖެނަމަ ދުނިޔެއަށް މޫނު ދައްކާލަން ނުކެރޭނެ ވަރު ކުރާނެ ކަމުގެ އިންޒާރެވެ. އޭނާގެ އަތުގައި ނާޒްއާއި އެދެމީހުން ބައްދަލުވި ފުރަތަމަ ރޭގެ ވީޑިއޯއެއް އޮތްކަމުގެ އިންޒާރެވެ. ނާޒް އޭނާއާއި ދުރަށްދާނަމަ ނުވަތަ ވަކިވާން މަސައްކަތްކު ރާނަމަ ނުވަތަ އެހެންމީހަކާ ރައްޓެހިވެއްޖެނަމަ އެވީޑިއޯ ލީކުކޮށްލާނެކަމުގެ އިންޒާރެވެ. އެހެންކަމުން ނާޒަށް ޖެހުނީ ހަތިޔާރު ބަހައްޓާށެވެ. އާޚިރުގެ ގިންޏަށްވުރެ ދުނިޔޭގެ ލަދު ބޮޑީއެވެ.
އެދުވަހަށް ފަހު ނާޒް ހުންނަނީ ބިރުންނެވެ. ވެދާނެ ގޮތަކާއި މެދު ކަންބޮޑުވެފައެވެ. ކަންތައް ކުރާނެ މަގެއް އޭނާއަކަށް ނުފެނުނެވެ. އޭނާއަށް ވިސްނުނުގޮތުގައި އޭނާއަށް ކުރެވެން އޮތްހާވެސް ކަމަކީ ނިޔާޒް ބުނާގޮތެއް ހަދައިގެން އުޅުމެވެ. އެހެންނޫނީ އޭނާ ކުރިމަތިލާން ޖެހޭނީ ބަދުނާމާއެވެ. ދުނިޔޭގެ ލަދާއެވެ. އެކަން ފާޅުވެއްޖެނަމަ އެކަން ވީގޮތެއް އެކަކުވެސް ނާހާނެއެވެ. އެންމެންވެސް ނާޒްއަށް ދޭނީ ލަޢުނަތެވެ.
ރަނގަޅު ދިރިއުޅުމަކަށް އެދި އައި ނާޒްދެކެ ލޯބިވި އެތައް ބަޔަކު ނާޒަށް ގެއްލިއްޖެއެވެ. ނާޒް ހައްޔަރުވެފައިވާ އެގައިދުގެ ސަބަބުންނެވެ. އެކަމަކު މިފަހަރު ޝަހީމް ގެއްލޭކަން ނާޒްއެއް ނޭދެއެވެ. އެހެނަސް ނިޔާޒްގެ އަތްދަށުން ސަލާމަތްވެވޭނެ ގޮތެއް އޭނާ އަކަށް ނޭނގެއެވެ. ނިޔާޒް ގެންގުޅޭ ހުރިހާ ވީޑިއޯއެއް އަތުޖެހޭތޯވެސް ނާޒް މަސައްކަތްކޮށްފި އެވެ. ނާޒްގެ އަތުގައި އެއިން އެއްވީޑިއޯ ޖެހުނުވެސް މެއެވެ. ނިޔާޒްގެ ލެޕްޓޮޕުން ޑިލީޓްކޮށްލައި ލެޕްގެ ހާޑުވެސް ހަލާކުކޮށްލިއެވެ. އެކަމަކު މިވީ ސަތާރަ އަހަރު ނާޒް ނިޔާޒްގެ މުށުތެރޭގައި ހޭދަކުރީ އޭނާގެ އަތުގައި އޭގެ ކޮޕީއެއް ނެތްކަން ޔަޤީން ނުވާތީއެވެ. އެވާހަކަ ދައްކައި ޔަޤީންކުރަން ނުކެރުނީ ނިޔާޒްގެ ލެޕްގައި ހުރި ވީޑިއޯތައް ޑިލީޓްކޮށްލައި ހާޑް ޑިސްކު ހަލާކުކޮށްލީ ނާޒްކަން ނިޔާޒަށް އެނގިދާނެތީއެވެ.
މޫނު ފޮހެލައި ތާޒާވެލައިގެން ނާޒް ސިޓިންގ ރޫމަށް ނުކުތް އިރު މަޣުރިބު ނަމާދަށް ގޮވަނީއެވެ. މަންމަ އާއި ވާހަކަ ދައްކަން އިނދެފައި ތެދުވެގެން ދަމުން ހުކުރު ދުވަހުގެރޭ ޕާޓީ އޮންނާނޭ މިގެއަށްވެސް ކާޑު ފޮނުވާނަމޭ ޝަހީމް ބުނި އަޑު އިވުނެވެ. ނާޒުގެ ހިތުގައި ޖެހުނެވެ. ޝަހީމްވެސް އޭނާއަށް ގެއްލެނީކަން އެނގުމުންނެވެ.
ނާޒްގެ ލޮލުގައި އަޅައިގަތީ ސޯފާ ސެޓުގެ މޭޒުމަތީގައި މަންމައަށް ޝަހީމް ގެނެސްދީފައި އޮތް ފޮތެކެވެ. ދީނީ ފޮތެކެވެ. ނާޒްއަކީ ދީނީ ކަންކަމަށް މާބޮޑު ސަމާލުކަމެއް ދެމުން އައި މީހަކަށް ނުވާތީ އޭނާ އެފަދަ ފޮތް ފޮތް ކިޔައެއް ނުހަދައެވެ. އެކަމަކު އޭނާ އެފޮތް ބަލާލާ ހިތްވީ އެފޮތުގެ ތެރެއިން އޭނާއަށް ހިދާޔަތެއް ލިބުމަށް އަޒަލުގައި މިންވަރުވެގެން ވިޔަތީއެވެ.
އެއީ ދުޢާ ފޮތެކެވެ. އެކިކަންކަމަށް ކުރާނޭ ދުޢާ އޭގައި ވެއެވެ. ނާޒް އެފޮތް ބަލާލިއެވެ. އޭގައި އިސްތިހާރާ ނަމާދާއި ބެހޭ މައުލޫމާތާއި އެނަމާދުގެ ދުޢާވަނިކޮށް ނާޒަށް ފެނުނެވެ. ފޮތް ހިފައިގެން ނާޒްވަނީ ކޮޓަރިއަށެވެ. ޝަހީމްވެސް އޭނާއަށް ގެއްލެނީކަން އެނގުމުން ވެފައިވާ ދެރަ އާއި ވެސް އެކުގައެވެ.
މަޣުރިބު ނަމާދުކޮށްގެން ނާޒް ޒިކުރުކޮށް ދުޢާތައް ކުރިއެވެ. ހިތްނިޔަސް ޚާލިސް ކޮށެވެ. އެއްވެސް ޝައްކެއް ވަސްވާހެއް ހިތުގައި ނުބާއްވައެވެ. އެހެން ހުރިހާ ކަމަކުން ހުސްވެގެން ހުރެއެވެ. އޭނާ އަށް މަގު ދެއްކެވުން އެދިއެވެ. އޭނާގެ ފާފަތަކަށް ތައުބާ ލެއްވެވުން އެދިއެވެ. މަލާމާތެއް ފުރައްސާރައެއް ލިބުމެއް ނުވާ ގޮތުގައި ނިޔާޒްގެ އަތްދަށުން މިންޖުކޮށްދެއްވުން އެދިއެވެ.
ނާޒް ނަމާދުކޮށް ދުޢާކުރަން އިންދައި ނިޔާޒް ގުޅަން ފަށައިފިއެވެ. ނާޒް ފޯނަށް ބަލާލިއެވެ. ފޯނު ނެގުމުގެ ކުރީން ވެސް ނިޔާޒް އެދޭނީ ކޮންކަމަކު ކަން ނާޒްއަށް އެނގެއެވެ. ފައިސާއަށެވެ. ނުވަތަ އޭނާ އާއި އެކު ގެސްޓް ހައުސަކަށް ނުވަތަ ރިޒޯޓަކަށް ދާށެވެ. ނާޒްގެ ލޮލުން ކަރުނަ އޮހިގަތެވެ. އަދި ދެއަތް އުފުލައި އޭނާގެ ކިބައިން މިންޖުކޮށްދެއްވުން އެދި ދުޢާތަކުރާރު ކުރަންފެށިއެވެ.
ދެވަނަ ފަހަރަށް ކޯލު އަންނަން ފެށުމުން ނާޒް ފޯނުނަގައި ކަންފަތުގައި ޖައްސާލިއެވެ. އޭނާ ހަލޯއޭ ބުނީ ނާއުންމީދާއި މާޔޫސްކަމާއި ރިހުން އެކުލެވިފައިވީ އަޑަކުންނެވެ. ނިޔާޒްގެ ފޯނުން ގުޅީ އޭނާގެ އެކުވެރި ސަމީރެވެ. ނާޒްއަށް ދިނީ ނިޔާޒްގެ މަރުގެ ޚަބަރެވެ. ޑައިވިނަށް ގޮސް އުޅެނިކޮށް އޭނާ ކުއްލި ގޮތަކަށް މަރުވީއެވެ. ސަމީރު ނާޒްއަށް އެހަބަރު ދިނީ ނާޒް ނިޔާޒުދެކެ ވަރަށް ލޯބިވާ ކަމުގައި އޭނާއަށް ޔަޤީން ކުރެވިފައިވާތީއެވެ. ނިޔާޒްގެ މޫނު ދެކެން ނާޒް ބޭނުންވާނެކަމަށް ބަލައިގެންނެވެ.
އެޚަބަރުން ނާޒްއަށް ލިބުނީ ހިތާމައެއް ނޫނެވެ. ހިތްހަމަޖެހުމެކެވެ. ސަތާރަ އަހަރު އޭނާ ބަންދުވެފައި ހުރި ގައިދުން ސަލާމަތްވީ ކަމުގެ އިހްސާސް ކުރެވުނެވެ. ނާޒްއަށް ރޮވެން ފެށުނެވެ. އެކަމަކު އެއީ އުފަލުގެ ކަރުނަ ކަމެއް ނުވަތަ ހިތާމައިގެ ކަރުނަކަމެއް ނާޒްއަކަށް ނޭނގެއެވެ.
ނާޒްވެސް ނިޔާޒްގެ މޫނުދެކެން ސަހަރާއަށް ދިޔައެވެ. އެކަމަކު އެއީ ކޮންމެހެން ނިޔާޒުގެ މޫނު ދެކޭކަށް ނޫނެވެ. ނިޔާޒްގެ ފޯނާއި ލެޕްޓޮޕް ފަދަ ތަކެތި ވީތަނެއް ބެލުމަށެވެ. ނާޒްއަށް ނިޔާޒަށްވުރެ މުހިއްމީ އެތަކެއްޗެވެ.
ކަފުންކޮށްފައި އޮތް ނިޔާޒްގެ މޫނު ފެނިފައި ނާޒްގަތީ ބިރެވެ. އެމޫނުވަނީ ކިލަނބު ކަޅުކުލައި ގައެވެ. މޫނުމަތިން ފެންނަނީ ހާސްކަމާއި ބިރުވެރިކަމުގެ އަސަރެވެ. އެއީ ފަހަރުގައި ނޭވާ ހާސްވެގެން މަރުވީވި މީހަކަށް ވީތީ ކަމުގައިވެސް ވެދާނެއެވެ. ނުވަތަ އޭނާގެ ނުބައި ކަމާއި ފާފަތަކުގެ ސަބަބުން ކަމުގައިވެސް ވެދާނެއެވެ.
ސަމީރު އަތުން ނިޔާޒްގެ ފޯނު އަތުލައިގެން ނާޒް އައީ ގެއަށެވެ. ނިޔާޒްގެ އަންހެނުންގެ ގޭގައިވީ އޭނާގެ ލެޕްޓޮޕްވެސް ގެނެސްދިނުމަށް އެދިފައެވެ. އެއީ ނިޔާޒް މަރުވިޔަސް އެވީޑިއޯގެ ކޮޕީއެއް ނިޔާޒް އަތުގައި އޮވެ އެހެން މީހެއްގެ އަތުގައި ޖެހިދާނެތީ ނާޒް ގަންނާ ކުރައްވާ ބިރެއްގެ ސަބަބުންނެވެ. އެހެންކަމުން ވެވުނު ކޮންމެ ގޮތަކުން އެކަން ޔަޤީންކުރަން ނާޒް ބޭނުމެވެ.
ގެއަށް އައިގޮތަށް ނިޔާޒްގެ ފޯނުގެ ލޮކް ހުޅުވައި ނާޒް ހާވަން ފެށިއެވެ. ފޮޓޯތަކާއި ވީޑިއޯ ތަކެވެ. މެސެޖްތަކާއި ނޯޓްތަކެވެ. އެކަމަކު އެފަދަ އެއްވެސް ފޮޓޯއެއް ވީޑިއޯ އެއް އެފޯނަކުން ނުފެނުނެވެ. ނާޒް ފޯނުގައިވާ މެސެޖްތައް ބަލަމުން ދަނިކޮށް އެހެން ފިރިހެނަކާއި ނިޔާޒް މެސެޖުން ދައްކާފައިވާ ނާޒްއާއި ގުޅޭ މެސެޖް ކޮންވަޒޭޝަނެއް ފެނުނެވެ. އެއީ މީގެ ދެމަހެއްހާ ދުވަސްކުރިންނެވެ. އެމީހާ ގާތުގައި ނިޔާޒް ބުނެފައިވަނީ ސަފާރީގައި އުޅެނިކޮށް އޭނާގެ ލެޕްޓޮޕް ކަނޑަށް ވެއްޓި ގެންގުޅުނު އެކަހަލަ ހުރިހާއެއްޗެއް ގެއްލިފައިވާ ކަމުގައެވެ. އަދި ނާޒްގެ ވީޑިއޯ އަކީ އޭނާ ވަރަށް ކުރިން ނެގި ވީޑިއޯއެއް ކަމަށާއި އެވީޑިއޯ ނެގިތާ މާގިނަ ދުވަހެއް ނުވަނީސް އޭރު ގެންގުޅުނު ލެޕްގެ ހާޑު ހަލާކުވެގެން ގެއްލުނީކަމަށެވެ. އަދި ނާޒް އޭނާ ބުނާ ކޮންމެ ގޮތަކަށް އުޅޭތީ ފަހުން އެކަހަލަ ކަމެއް ނުކުރީ ކަމުގައިވެސް ބުނެފައި އޮތެވެ.
ނާޒްއަށް ބޮލުގައި ދެއަތުން ހިފެހެއްޓުނެވެ. އޭނާ އިންތިޒާރު ކުރި ހަޤީޤަތް ހާމަ ވުމުންނެވެ. ނިޔާޒްގެ އެލެޕްގެ ހާޑު ލައިޓަރަކުން ހޫނުކޮށް ހަލާކުކޮށްލީ ނާޒްއެވެ. އޭގެ ފަހުން ސަތާރަ އަހަރުވީއެވެ. އޭނާގެ ހަޔާތުން އެތައް ދުވަހެއް ބޭކާރުވެ ރަނގަޅު އެތައްބަޔަކު އޭނާއަށް ނުލިބި ގެއްލުނީއެވެ. އޭނާއަށް އެންމެ ހިއްވަރެއް ކޮއްލަން ނުކެރިގެންނެވެ. ވާނެ ގޮތެއްވާން ދޫކޮށްލާފައި ނިޔާޒް އާއި ވަކިވާން ނުކެރިގެންނެވެ.
ނާޒް ހަނދާން އެބަހުއްޓެވެ. ނިޔާޒްގެ އަތުގައި އެވީޑިއޯ އޮތް ކަމަށް ބުނިރޭ ނާޒް ރުއިވަރެވެ. އެކަމުން ސަލާމަތް ކޮށްދެއްވުމަށް އޭނާ ﷲ އަށް ދުޢާ ދަންނަވައި ވީ ތައުބާއެވެ. މުއުޖިޒާތަކުން ނަމަވެސް އެކަމުން ސަލާމަތް ކޮށްދެއްވުން އެދުނެވެ. ﷲ އޭނާގެ ދުޢާ އިޖާބަ ކުރެއްވިއެވެ. އެކަމަކުވެސް ނާޒްގެ ކޮށި ވިސްނުމަށް އެކަން ދޭހައެއް ނުކުރެވުނެވެ. ސަތާރަ އަހަރުން ވަންދެން ނިޔާޒްގެ މުށުތެރޭގައި އެފާފަތައް ކުރުންމަތީ އޭނާއަށް ދެމި ހުރެވުނީއެވެ.
ނިޔާޒް ނާޒްއަށް އިންޒާރު ދިން ހަފްތާގެ ހުކުރު ދުވަހު ނިޔާޒް ހުކުރަށް ދިޔަވަގުތު ބަލާފައި ނިޔާޒްގެ ކޮޓަރިއަށް ނާޒް ދިޔައެވެ. ﷲ ތަޢާލާ ނާޒްއަށް މަގު ފަހިކޮށް ދެއްވެވުމަށް މިންވަރު ކުރައްވާފައިވީތީ، ނިޔާޒަށް ބޭރަށް ދެވުނީ ކޮޓަރީގެ ތަޅުނުލައެވެ. ލެޕްޓޮޕްވެސް ހުރީ ހުޅުވާފައި ސައިޑް ކަބަޑް މަތީގައެވެ. ނާޒް ވަގުތު ނަގާ ނުލައި މަސައްކަތްފެށިއެވެ. އެއިން ނާޒް އަށް ފެނުނީ ނާޒްއާއި ނިޔާޒްގެ އެންމެ ކްލިޕެކެވެ. އެކަމަކު އެހެން އަންހެން ކުދިންނާއި އެކު ނިޔާޒް ނަގާފަވާ ބައިވަރު ކްލިޕްތައް އޭގައި ހުއްޓެވެ.
ލެޕްޓޮޕްއިން ހުރިހާއެއްޗެއް ޑިލީޓްކޮށްލައި ނާޒް އެ ފޯމެޓްކޮއްލިއެވެ. މޭޒުމަތީގައި އޮތް ލައިޓަރެއް ނާޒްއަށް ފެނުނެވެ. އެފެނުމުން ދެން ކަންތައް ކުރާނެ ގޮތްވެސް ނާޒްއަށް ވިސްނުނެވެ، އޭނާ ލެޕްގެ ފަހަތު ކަވަރާއި ހާޑަށް ލައިޓަރުން ހޫނުކޮށް އަންދާލިއެވެ. ނާޒް އެހެން ހެދީ އޯވަ ހީޓްވެގެން ލެޕް ހަލާކުވީކަން ނިޔާޒްއަށް ވިސްނައި ދިނުމަށްޓަކައެވެ.
ނާޒްއަށް ރޮވުނެވެ. ސަތާރަ އަހަރަށްފަހު އޭނާ މިންޖުވީތީއެވެ. އެކަމަކު އޭނާ ހިތާމަވެސް ކުރިއެވެ. އޭނާގެ ދުޢާ ﷲ ތައާލާ އިޖާބަކުރައްވައި މީގެ އެތައް އަހަރެއް ކުރިންވެސް އޭނާއަށް ސަލާމްތަވާނެ މަގެއް ދައްކަވައި އެކަން ނޭނގި އޮތަތީއެވެ. އެދުވަހު އޭނާ އެލެޕް އަންދާލުމަށްފަހު ނިޔާޒްގެ ގާތަށް ދިޔުން ހުއްޓާލިނަމަ އޭނާއަށް މިހާރު އައު ދިރިއުޅުމެއް ހޯދިއްޖައީހެވެ. އަދި އޭނާ ބުރަ މަސައްކަތުން ހޯދާ ފައިސާ ނިޔާޒަށް ނުދީ ފަރުޖެއްސުނީހެވެ. އެކަމަކު ދެން ކުރާނެ ކަމެއް ނެތެވެ. ވީކަމެއް ވެނިމުނީއެވެ. ނިޔާޒްގެ ހީލަތްތެރި ރޭވުންވެސް ގެއްލި ދިޔައީއެވެ. އެހީލަތުގައި ނާޒުގެ އުމުރުން 17 އަހަރު ގެއްލި ދިޔައިރު އޭނާގެ ޒުވާން އުމުރުވެސް ގެއްލި ހިނގައްޖެއެވެ.
ނާޒް ފުން ނޭވާއެއްލިއެވެ. ޝަހީމް ނުލިބުނަކަސް އޭނާގެ ޝަކުވާއެއް ނެތެވެ. އެހެނީ ޝަހީމަށް ވުރެ ރަނގަޅު އެހެން މީހަކު އޭނާގެ ހަޔާތަށް އަތުވެދާނެއެވެ. ކައިވެނި ހަމަޖެހި އިއުލާނު ވުމަށްފަހު ޝަހީމް އެކައިވެނި ނުކުރާކަށް ނާޒްވެސް ބޭނުމެއް ނޫނެވެ. އެހެން ނޫނަސް ނާޒްއަކީ ތާން ނުދޮންނަ ބާފޮށައަކަށް ވީހިނދު ޝަހީމް ފަދަ މާތް އަބުރުވެރި މީހަކާއި ނާޒްއާއި އަރާ އަރަފޯދިގެން ނުވާކަމަށް އޭނާވެސް އިއުތިރާފް ވެއެވެ. ޝަހީމްގެ ލޯބި އޭނާއަށް ހައްޤުނޫންކަމުގައި އަމިއްލައަށްވެސް ޤަބޫލުކުރޭ މެއެވެ.
– ނިމުނީ –
