އަތުގެ ނުފުށުން ފުހެލައި ރާޒީ ބެލީ ކަރުނަތައް ފޮރުވޭތޯއެވެ. އެއްވެސް ކަމެއް ހާމަކުރާކަށް އޭނާ ބޭނުމެއް ނޫނެވެ. ހިންދިރުވާލީ ހުރިހާ ހިތާމައެއް އަރުން އެތެރެކުރެވޭތޯއެވެ. އޭރު ދުރުން ގާތް ރައްޓެއްސަކު ދޮންމަންމަ ފަރިހި ކިޔާއަޑު އިވެއެވެ.

"ހިތިކަރުނައިން ފުރިގެން އެވާ އެއްތަށި އެތެރެ ކޮށްފީމުއޭ،

ހިތިވޭނުގައި މިއަޒާބުގައި، ދެއްވަން ދެވަނަ ތަށި ގެންނަނީ"

ރާޒީއަށް ހީވީ ޅެންކިޔަން ޖޯލީގައި އޮތް ޒުވާނާ އެ ބަޔާންކޮށްދެނީ ރާޒީގެ ހާލު ކަމަށެވެ. އެކަމަކު އެހެނެއް ނޫނެކެވެ. އެއީ އޭނާގެ އެކަނި ހާލެއް ނޫނެވެ. އެތައް ބައެއްގެ ހާލެވެ. ފޮނިއުއްމީދުތަކާއި ހުވަފެންތަކާއިއެކު، ބުރަ މަސައްކަތުން ދިރިއުޅުމެއް ބިނާކުރަމުން އައި އެތައް ބައެއްގެ އުއްމީދުތައް ފުނޑުފުނޑުވީއެވެ. ދުނިޔެ ބަނަވީއެވެ. އޭނާ ފަދައިން އޭނާގެ އެކުވެރިންގެ ތެރެއިން އެތައް ބަޔަކު ބޭރުގައި ތިބީ އިންތިޒާރުގައި، އެމީހުންނާއި ޖެހޭންދެކަށެވެ.

ރިޒޯޓުގެ މައި އޮފީހުގެ ލޮބީގެ ސޯފާގައި ރާޒީ އިނީ ދަތްދޮޅީގައި އަތްވިދެލައިގެންނެވެ. އިސްދަށަށް ޖަހައިގެންނެވެ. ޝަކުވާތަކުން ފުރިފައިވާ ހިތަށާއި ޟަމީރަށް ވިސްނައިދޭން އޭނާ ބޭނުމެވެ. އެކަމަކު ބޭއިންސާފައި އަނިޔާ އެއީ، އިންސާފާއި ހަމްދަރުދީކަމުގައި ވިސްނައިދޭނެ ލަފުޒުތަކެއް އޭނާގެ ހިތަކަށް ނައެވެ.

ކޯވިޑް-19ގެ އާލަމީ ވަބާ އާއިއެކު ދިރިއުޅުން ގެއްލި ދިޔަ އެތައް ބިލިޔަން މީހުންގެ ތެރެއިން ރާޒީއަކީ އެކެކެވެ. އޭގެ ތެރޭގައި އޭނާގެ ރަހުމަތްތެރީންވެސް ހިމެނެއެވެ. އެމީހުންނަކީ ރިޒޯޓު މުވައްޒަފުންނެވެ. މިއަދު ވަޒީފާނެތް މީހުންނެވެ.

އޮފީސް ތެރެއިން އައި ކުއްޖާ ރާޒީއަށް ދިއްކޮށްލީ ސިޓީ އުރައެކެވެ. ކޮން އެއްޗެއްކަން އެނގޭތީ ހުޅުވާވެސް ނުލައި ރާޒީ ނުކުތީއެވެ. ކިއޫގައި ތިބި ރަހުމަތްތެރިންވެސް އެމީހަކާއި ޖެހުނީމާ އެމީހަކު އޮފީސް ތެރެއަށް ވަދެއެވެ. ސިޓީއުރަ ހިފައިގެން ނުކުމެގެން ދެއެވެ.

އެއިން އެކަކަށްވެސް އެމީހުންގެ ކުރިމަގު ބުނެދޭކަށް ނޭނގެއެވެ. ދެންވާނީ ކިހިނެއްކަމެއް ދާންވީ ކޮންތާކަށް ކަމެއް ނޭނގެއެވެ. ވިސްނެނީ އާއިލާ އާއި މެދުގައެވެ. އެމީހުންނަށް ވާނޭ ގޮތަކާއި މެދުގައެވެ. ހިތްރޮނީ އެމީހުންގެ ހާލާއި މެދުގައެވެ.

ނިކަ ގަސްދަށުގައި ހުރި ލަކުޑި ގޮނޑީގައި އިށީނދެފައި، ރާޒީ ސިޓީއުރަ ހުޅުވާލިއެވެ. އެއީ ވަޒީފާއިން ވަކިކުރި ކަމުގެ ޗިޓެވެ. ދެން އޮތީ 1000 ރުފިޔާގެ މުސާރަ ސްލިޕެވެ. އެއީ މިމަހުގެ މުސާރައެވެ. ރާޒީގެއަށް ގިސްލެވެން ފެށުނެވެ. މަޑުމަޑުން ވީއްލެމުން އައި އަޑު، ބާރުވެ ހަށިގަނޑުން ފުރާނަ ނިކުންނަ ފަދައިން އޭނާ ރޮއެގަތެވެ. މޫނުގައި އަތް އެޅިއެވެ. އޭނާގެ ދުނިޔެ އަނދިރިވީއެވެ.

ކޯވިޑް-19 ފެށުމާއި އެކު ފުރަތަމަ މަހުގެ ތެރޭގައި ރިޒޯޓުން މުވައްޒަފުންގެ މުސާރަތައް ކުޑަކުރިއެވެ. %50 ޕަސެންޓަށެވެ. ހާލަތު ރަނގަޅުވުމުން އަލުން އިއާދަ ކުރާނެ ކަމަށް ބުންޏެވެ. އެއްވެސް މުވައްޒަފަކު ޝަކުވާއެއް ނުކުރެއެވެ. އެކަމަކު މުޅި ރާއްޖެ ފުރަބަންދުވެ، ބޯޑަރުތައް ބަންދުކޮށް ފަތުރުވެރިން އައުން މުޅިން ހުއްޓުމާއިއެކު، ރިސޯޓުން ކޮންމެ މުވައްޒަފަކަށް މުސާރައަށް ދިނީ އެންމެ 1000ރ އެވެ. އެކަމަކު އެމިންވަރަށްވެސް ރާޒީ އާއި އެހެން ދިވެހި މުވައްޒަފުންވެސް ރުހުނެވެ. ކެތްކުރިއެވެ.

ރިޒޯޓުގެ އިސްމަޤާމުތަކުގައި ތިބި ބިދޭސީ އެހެން މުވައްޒަފުން ފުރަފުރައިގެން ދިޔައީ އެމީހުންގެ ޤައުމަށެވެ. އާއިލާގެ ގާތަށެވެ. އެކަމަކު މުޅިދުނިޔެ ކޯވިޑް-19ގައި އަވަދިވަމުން ދިޔައިރު، ރާޒި އާއި އެހެންވެސް އެކުވެރިން ތާށިވެ ބަންދުވެފައި ތިބީ ރިޒޯޓުތަކުގައެވެ. އެމީހުން ތިބީ ކައިގެން ދެއަތް އުރާލައިގެނެއް ނޫނެވެ.

ހިންގަމުން އަންނަތާ 25 އަހަރުވީ އެރިޒޯޓުގެ މަރާމާތުތައް ފެށީ، ފުރަ ބަންދުގެ ތެރޭގައެވެ. އެންމެންވެސް ދުށީ އެއީ އެމީހުންގެ އަމިއްލަ ގެދޮރުކަމަށެވެ. އެމީހުންގެ އަމިއްލަ މުސްތަޤުބަލް ކަމަށެވެ. ހިތާމައިގެ ރޭތައް ނިމި އަލުން އުފާވެރި ފަތިހަކަށް އަލި ވިލޭއިރު، ފަތުރުވެރިންނަށް މަރުހަބާ ކިޔާނީ މިއަދުގެ ޤުރުބާނީން ލިބުނު އުފަލެއްގެ ގޮތުގައިކަމަށެވެ. އެކަމަކު ކަންވެ މިނިމުނީ އެހެން ގޮތަކަށެވެ.

ކޯވިޑް-19ގެ ހާލަތު ރަނގަޅުވެ، ފަތުރުވެރިކަން އަލުން ފެށުނު އިރު، މެނޭޖްމެންޓް ބަދަލުވީއެވެ. މީހުންނާއި ހާލަތު ބަދަލުވީއެވެ. ރިޑަންޑަންސީގެ ގޮތުގައި ގަނޑުކޮށް މުވައްޒަފުން ވަޒީފާއިން ވަކިކުރެވޭގޮތަށް މަޖިލީހުން ޤާނޫނު ފާސްކުރުމުން އެކަމުގެ ހިތާމަ އާއި ގިލަންވެރިކަން ޖެހުނީ ރާޒީ އާއި އޭނާގެ އެކުވެރިން ފަދަ ރިސޯޓު މުވައްޒަފުންނަށެވެ. މިއަދު ބިދޭސީންނަށް މަޤާމާއި ރިޒޯޓު ދީފައި އެމީހުން މިޖެހުނީ ހުސްއަތާ ފައިބާށެވެ. ދިހަ ބާރަ އަހަރު އެމީހުން ކުރި ޚިދުމަތަކީ އެއްވެސް އެއްޗެއް ނޫނެވެ. ހާލަތުން އަރައި ގަތުމަށް ކެތްތެރިކަމާއި އެކު އެމީހުން ވީ ޤުރުބާނީއަކީ، ކެރިފޯރުންތެރިކަން ހުރި ރިޒޯޓު އޯނަރުންނަށް ފެނުނު މަންޒަރެއް ނޫނެވެ.

ނުވަމަސް ދުވަސްވީއެވެ. ޖެހިގެން އޮތް ރަށުގައި އަނބިދަރީންތިބެ އެމީހުން ގާތަށް ނުދެވެއެވެ. އަހަރުވީ ދަރިފުޅުގެ ތުއްތު ތުއްތު ބަހުރުވައި ދައްކާ ވާހަކަ އަހާލަން އޭނާގެ ގާތަށް ނުދެވިއެވެ. ކިޑްނީ ބައްޔަށް ފަރުވާ ހޯދަން މާލޭގައި އިން މަންމައަށް ރުފިޔާއެއް ނުފޮނުވިއެވެ. މިވީ، 9 މަސް ދުވަހު އެމީހުން އުޅޭނެ ހާލެއް ރާޒީއަށް ތަޞައްވަރުކޮށްލާކަށްވެސް ނޭނގެއެވެ. އެނގޭކަމަކީ ދަތިވާނެ ކަމެވެ. އިންތިހާއަށް ދަތިވާނެކަމެވެ. ކޯވިޑް ފެށުމާއި ހަމައަށް އެމީހުން ބަރޯސާވީ، ރާޒީއަށް ލިބޭ އާމުދަނީއަށެވެ. ރާޒީގެ ހިތްރޮނީ އާއިލާގެ ހާލަށެވެ.

ރާޒީގެ ފޯނު ރިންގުވާފެށީ އެވަގުތުއެވެ. ގުޅަނީ ބައްޕައެވެ.

ބައްޕަ އެދުނީ، ލާރިއެއް ފޮނުވައިދޭށެވެ. މަންމައަށް ބޭނުންވާ ކާބޯތަކެއްޗާއި، އެހެނިހެން ތަކެތި ގަންނާނެ ލާރިއެއް ނެތިގެންނެވެ. މިޓްރާންސްފަރ ކުރަނީއޭ ބުނެފައި ރާޒީ ފޯނު ބޭއްވީއެވެ. ރާޒީއަށް އެނގެއެވެ. މީގެ ކުރިން ދުވަހަކުވެސް ލާރިއެއް ފޮނުވައިދޭށޭ ނުބުނާ ބައްޕަ މިއަދު އެވާހަކަ ބުނާނީ ހާދަ ބޮޑަށް ދަތިވެގެންނެވެ. މުސްކުޅި އުމުރުގައި ބައްޕަ މަސައްކަތް ކުރަނީ މާލޭގައި ސެކިއުރީޓީ ފާމެއްގައެވެ. މަންމައަށްޓަކައެވެ. ކޯވިޑް-19ފެށި ގުރޭޓާމާލެ ފުރަބަންދުވުމުން ބައްޕަގެ ވަޒީފާވެސް ގެއްލުނީއެވެ. އެކަމަކު މިދިޔަ ދުވަސްތަކުގައި ބައްޕަ ރާޒީގެ އެހީ އާއި ނުލައި މެނޭޖްކުރި ގޮތެއް އަހާލަންވެސް ރާޒީއަކަށް ނުކެރުނެވެ.

ފޯނުން ބޭންކް ބެލެންސް ބަލާލަން އެޕް ހުޅުވާލި އިރުވެސް، އެކައުންޓްގައި ފައިސާ ނުހުންނާނެކަން ރާޒީއަށް އެނގެވެ. ކޯވިޑްފެށުމާއި ހަމައަށް އައިރު، އޭނާ ޖަމާކޮށް ރައްކާކޮށްފައި ހުރި ފައިސާ މި ދިޔަ ނުވަމަހުގެ ތެރޭގައި ޚަރަދުކޮށް އެހުސްވީއެވެ. ކުޑައިރުކޮޅެއް ކުރިން ވަޒީފާއިން ވަކިކުރި އިރު، މުސާރައަށް ޖަމާކޮށްދިން އެއްހާސް ރުފިޔާ ފިޔަވައި އެންމެ ލާރިއެއްވެސް އޭނާގެ އެކައުންޓްގައި ނެތެވެ.

ރާޒީ ހިތަށް އެރިއެވެ. މިއަދާއި ހަމައަށް އޭނާ ރިޒޯޓުގައި މަޑުކުރީ ކީއްކުރަންބާވައެވެ. މިމީހުންގެ ކިބައިން ކުރާނީ ކޮން އުއްމީދެއް ބާވައެވެ. އެންމެ އުނދަގޫ ދަތިހާލަތުގައި އެމީހުން ތިބީ ރިޒޯޓުގައެވެ. މިތަނުގެ ދިރުން ގެއްލުނަ ނުދޭށެވެ. ޤައުމުގެ ލޭނާރު ކަމުގައިވާ ފަތުރުވެރިކަމުގެ ސިނާއަތު މަރުގެ ތުންފަތްމަތިން ސަލާމަތް ކުރާށެވެ. އެކަމަކު، ހާލަތު ރަނގަޅުވަމުން އުއްމީދުތައް އާވަމުން އައުމާއިއެކު، ރިޒޯޓު މެނޭޖްމެންޓަށް ދިވެހި މުވައްޒަފުންގެ ބޭނުން ކެނޑުނީއެވެ.

އެކައުންޓުގައި އިން އެއްހާސް ރުފިޔާ ބައްޕައަށް ޓްރާންސްފަރކޮށްދީފައި، ރާޒީ ހިނގައިގަތީ މުވައްޒަފުންގެ އެކޮމަޑޭޝަން ބުލޮކަށެވެ. ފޮށިތަންމަތި ހިފައިގެން ރިޒޯޓުން ފުރަން ތައްޔާރުވާށެވެ.

ރާޒީ އެކަމަޑޭޝަން ބްލޮކަށް ވަތްއިރު އެންމެން ފުރަން ތައްޔާރުވަނީ އެވެ. ފޮށިތަންމަތި ތައްޔާރު ކުރަނީއެވެ. ރާޒީ ރަނގަޅަށް ނަޒަރު ހިންގާލިއެވެ. އޭނާގެ ހަޔާތުން 12 އަހަރު ހޭދަކުރީ މިތަނުގައެވެ. އެކަމަކު މިއަދު އޭނާއަށް މިތަން ފެންނަނީ ތަފާތު ނަޒަރަކުންނެވެ. މަތި މައްޗަށް ހުރި ބަންކުބެޑްތަކުގައި ގުޅަކެރުވިފައިވާ ބެޑްޝީޓްތަކެވެ. އެނދުތައްމަތީގައި ތަރުތީބެއްނެތި ހުރި އަންނައުނުތަކެވެ. މުޅިތަނުގެ ތެރޭގައި ހިފާފައިވާ ފެންމުޑުވަހެވެ. މިއީ ރާޒީ އާއި އޭނާގެ 40 ވުރެ ގިނަ އެކުވެރިން ދިރިއުޅޭތަނެވެ.

ގެންދާނެ މާގިނަ އެއްޗެއް ނެތެވެ. އަންނައުނު ކޮޅާއި، ފޯނުން ލަވަޖަހަން ގެންގުޅުނު ސްޕީކަރާއި އެފަދަ ބައެއް އެއްޗެހި މެނުވީއެވެ. ކުޑަ ދަތުރު ދަބަހަކަށް އޭނާގެ ހުރިހާއެއްޗެއް އެޅުނެވެ. އެކަމަކު، މިރިޒޯޓާއި، މިރިޒޯޓުގެ އެހެން މުވައްޒަފުންނާއިއެކު ހޭދަކުރި އުފާވެރި ހަނދާންތައް ރައްކާކުރެވޭނެ ވަރުގެ ޖާގައެއް ނެތެވެ. އެކަމަކު ދެން އެހުރިހާކަމެއް ވެގެން ދާނީ މާޒީއަށެވެ.

ރާޒީވެސް ދަބަސް ކޮނޑުއަޅުވައިގެން ނުކުތެވެ. އެހެން ރައްޓެހިންނާއިއެކު ފާލަމާއި ދިމާއަށް ހިނގައިގަތެވެ.

މިއަދަކީ، 9 މަސްދުވަހަށް ފަހު، ރިޒޯޓުގެ މުވައްޒަފުން އެމީހުންގެ ރަށްރަށަށް އެނބުރިދާ ދުވަހެވެ. މުޅި ރިޒޯޓު ބަންދުކޮށްފައި އޮންނަތާ 3 މަސްދުވަސްވެފައި ވުމާއިއެކު، ރަށްރަށަށް އެނބުރިދާ މުވައްޒަފުންގެ ކަރަންޓީންވެސް ފުރިހަމަކުރީ ރިޒޯޓުގައި ތިބެގެނެވެ. އެހެންވީމާ އޮތް ކުޑަ ނަމަވެސް އުފަލަކީ ރަށަށްދާގޮތަށް އާއިލާ އާއި އަނބިދަރީންނާއި ބައްދަލުވާނެ ކަމެވެ.

"ރާޒީ ރަށަށް ގޮސް ކީއްކުރާނީ" ފަހަތުން އައިސް ކޮނޑަށް އަތްވައްޓާލަމުން، އެހެން އެކުވެރިޔަކު ބުންޏެވެ.

"ނޭނގެ. އެކަމަކު ކޮންމެވެސް ކަމެއްކޮށްގެންތާ. އަނގަޔާއި އަތާ ދިމާވާނީ." ރާޒީ ހީލިއެވެ. ޖަވާބުގައި އޭނާވެސް ހީލިއެވެ. އަދި ރާޒީގެ ބުރަކަށީގައި މަޑުމަޑުން ޖަހާލީ، ހިއްވަރު ކުރާށޭ ބުނަމުންނެވެ.

ރިޒޯޓުގެ ވަޒީފާއިން ވަކިކުރި 49 މުވައްޒަފުން، ފެރީ ދޯންޏަށް އެރުމުން އެދޯނި ރިސޯޓުގެ ފާލަމާއި ފެއަށް ޖައްސާލުމާއި އެކު ރާޒީ މޫނުގައި ދެއަތް އެޅިއެވެ. ޙަޔާތުގެ އުފާވެރި އެތައް ހަނދާނެއް ދޫކޮށް މިއެންމެން މިފުރީއެވެ. ދެން މިއެކުވެރިން ދާނީ އެކި ދިމާއަށެވެ. އެކި މީހުން އެކި މަގުންނެވެ. އަލުން ބައްދަލުވާނެ ކަމެއް ނުވަތަ ނުވާނެ ކަމެއް ވެސް ނޭނގެއެވެ.

ރަށުގެ ފަސްގަނޑުމަތީގައި، ފައިޖެހުމާއިއެކު ރާޒީއަށް ލިބުނީ އުފަލެވެ. ހިއްވަރެވެ. ހިތްއެދި ރޮނީ މިފަސްގަނޑަށް އެނބުރިއައުމަށް ކަމުގައިވާތީއެވެ.

ހަމަ ހިމޭންކަން ވެރިވެފައިވާ ރަށުގެ މަގުތަކުން ހިނގަމުންގޮސް، ރާޒީ ގޭގެ ދޮރާށި މައްޗަށް ހުއްޓުނެވެ. ހަދަން ފަށައި ނުނިމި ހުރި ގެގަނޑުގައި އަދި އުޅެވޭވަރު ކުރެވިފައި ހުރީ އެންމެ ދެކޮޓަރިއެވެ. ބޭރުގޭތެރެވެސް އަދި އޮތީ ހިޔާ ނުކުރެވިއެވެ. ބޮޑު އާއިލާއެއް ބަލަހައްޓަމުން 12 އަހަރުގެ ތެރޭގައި އޭނާއަށްވީ މިވަރެވެ.

ގޯތި ތެރެއަށް ވަތް އިރު އަންހެނުން އިނީ ކުޑަދަރިފުޅު ގޮނޑިއެއްގައި ބައިންދައިގެން ކާންދޭށެވެ. ދެވަނަ ދަރިފުޅު އިނީ އަނބެއްގައި ދަތްލައިގެންނެވެ. ބައްޕަ ފެނުމާއިއެކު ދުވެފައި އައިސް ބައްޕަގެ ގައިގައި ބައްދައިގެންފިއެވެ.

ގޮނޑީގައި އިން ކުޑަދަރިފުޅު، ރާޒީއަށް ބަލާލީ ބީރަށްޓެހި ނަޒަރަކުންނެވެ. ދުރުގޮތަކަށެވެ. ވާނީވެސް އެހެންނެވެ. އެދަރިފުޅަށް އަހަރުވި އިރު، 9 މަސް ދުވަހު ރާޒީ ހުރީ ދަރިފުޅާއި ދުރުގައެވެ. ގާތަށް ނާދެވިފައެވެ.

އަންހެނުން ދަރިފުޅަށް ކާންދޭން އިނީ ހުސްބަތްކޮޅަކަށް ކުޑަހަކުރުކޮޅެއް އަޅައިގެންނެވެ. ކާތަށި ފެނުމާއިއެކު ލޮލުން ކަރުނަތައް ފައިބައިގެންފިއެވެ. އަހަރެންގެ ދަރީން ހަމަ މިހާ ނިކަމެތިވީ ހެއްޔޭ ރާޒީގެ ހިތްބުންޏެވެ. ދޮށީދަރިފުޅުގެ ގައިގައި ރާޒީ ބާރަށް ބައްދާލައި އުރާލިއެވެ. ލޮލުގެ ކަރުނަތައް ފުހެލިއެވެ.

"ލަތީފުބޭ ފިހާރައިގައި އޮތް ދަރަނި ނުދައްކާތީ މިއަދު އައި. ލާރި ނުދައްކަންޏާ އެއްޗެހި ނުދެވޭނެ އޭ ބުނީ." ރާޒީއަށް ބަލާލާފައި އަންހެނުން ބުންޏެވެ. އެއަށް ބުނާނެ އެއްޗެއް ރާޒީއަކަށްވެސް ނޭނގެވެ. ވިޔަފާރި ކުރާ މީހުން ލާރި ނުދެންޏާ ނުވަތަ ނުދެވެންޏާ ލަތީފުބޭގެ ވިޔަފާރިވެސް މުޅިން ހުއްޓި ބަނގުރޫޓްވާނެކަން ރާޒީއަށްވެސް އެނގެއެވެ.

ދޮށީދަރިފުޅު އުނގަށްލައިގެން އަންހެނުން ގާތުގައި، ރާޒީ ޖޯލީގައި އިށީނެވެ.

"ރާޒީއަށް މަންމަމެންނަށް ލާރި ނުފޮނުވޭތީ، ކާފަ ހައްޖަށްދާން އެއްކުރި ލާރި، ކާފަ މަންމަމެންނަށް މިދިޔަ ދުވަސްތަކުގައި ފޮނުވީ. ދެން ކުދިންނަށް ކާއެއްޗެހި ހޯދަން ކާފަދޭ ލާރިން މިފުއްދަނީ. އެކަމަކު، މިމަހާއިހަމައަށް އައިރު، ކާފަ އަތުގައި ހުރި ހުރިހާ ލާރިއެއްވެސް ހުސްވެއްޖެ." މަޑުމަޑުން އަންހެނުން ވާހަކަ ދައްކަމުން ދިޔައެވެ.

ރާޒީއަކަށް ހަދާނެ ގޮތެއް ނޭނގެއެވެ. ދާނެ ދިމާއެއް ނޭނގެއެވެ. އެހީއެއްވެދޭން އެދޭނީވެސް ކާކުގާތުގައި ކަމެއް އޭނާއަކަށް ނުވިސްނެވެ.

ކޮނޑަށް ގޯންޏެއް ލައިގެން އައި މުސްކުޅި ކާފަ ރާޒީފެނުމާއި އެކު ހުއްޓީ ބިންމަތީގައި ގޯނި ބަހައްޓާފައި ގާތަށް އައުމަށް އަތުން ހަނައަޅާލިއެވެ. ކާފަހުރީ ތެމިފައެވެ. އެއީ ގޮނޑުދޮށުން މޫދަށް އެރިގެންކަން އެނގެއެވެ. ރާޒީ ކާފަގާތުގައި ގޮސްހުއްޓުމުން ހިނިތުންވެލާފައި ކާފަ ގޯނީގެ ތުން ހުޅުވައި ރާޒީއަށް ދައްކާލިއެވެ. އަސްތާ! މާވަހަރެކެވެ. ހުދަންބަރެކެވެ. ކާފަ އެއައީ މާވަހަރެއް ހޮވައިގެންނެވެ.

ރާޒީ އުޑާއިދިމާއަށް މަތި ބަލާލިއެވެ. ހިތް ޝުކުރުން ފުރުނެވެ. ހާސްކަމާއި ހިތްދަތިކަން ފިލައިގެން ދިޔައެވެ. އެކަމަކު ދެވަނަ ސިކުންތުގައި އޭނާ ދެރަވިއެވެ. އޭނާއަށް ހާސްކަން ފިލިނަމަވެސް އޭނާގެ އެކުވެރިންނަށް އެމީހުންގެ އާއިލާތަކަށް ވާނެ ގޮތާއި މެދުގައެވެ. ޔަޤީނުންވެސް އެންމެނަށް މާވަހަރެއް ނުލިބޭނެއެވެ. ދިރިއުޅުމުގެ ދަތިތަކާއި ވޭން އެމީހުންވެސް ތަހައްމަލުކުރަން ޖެހޭނެއެވެ.

– ނިމުނީ –