އޯޕަން މުބާރާތުގެ ފައިނަލަށް ސަންކުއިކް ލިލީ އާއި ޝުގަ ކޯން

މިހާރު ކުރިޔަށްދާ ރަމަޟާން ކްރިކެޓް ކާނިވަލުގެ އޯޕަން ޓޭޕްބޯލް ކްރިކެޓް މުބާރާތުގެ ފައިނަލަށް ސަންކުއިކް ލިލީ އާއި ޝުގަ ކޯން ދަތުރުކޮށްފިއެވެ.

މި މުބާރާތުގެ ފައިނަލުގެ ފުރަތަމަ ޖާގަ ސަންކުއިކް ލިލީން ހޯދީ ސެމީ ފައިނަލް ފުރަތަމަ މެޗުން ވެލް ލެފްޓްގެ މައްޗަށް ކުރި ހޯދައިގެންނެވެ. މި މެޗު ސަންކުއިކް ލިލީން ކާމިޔާބުކުރީ 39 ލަނޑުން މޮޅުވެގެންނެވެ. މެޗުގައި ސަންކުއިކް ލިލީ އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު ދެ ކުޅުންތެރިން ނުބައިވެގެން ވަނީ 121 ލަނޑު ހަދާފައެވެ. ޖަވާބުގައި ވެލް ލެފްޓް ކުޅެން އަރައި އަށް އޯވަރު ހަމަވިއިރު ހަ ކުޅުންތެރިން ނުބައިވެގެން ހެދިފައިވަނީ 82 ލަނޑެވެ.

މުބާރާތުގެ ސެމީގެ ދެވަނަ މެޗުގައި ކޭޑީއެމުން ވަނީ ކުޅެން އަރައި އަށް އޯވަރުގެ ތެރޭގައި ތިން ކުޅުންތެރިން ނުބައިވެގެން 104 ލަނޑު ހަދާފައެވެ. ޖަވާބުގައި ޝުގަ ކޯނުން ކުޅެން އަރައި އަށްވަނަ އޯވަރުގައި ހަ ކުޅުންތެރިން ނުބައިވެގެން 107 ލަނޑު ހަދާ މެޗު ކާމިޔާބުކުރިއެވެ.

އެއާއެކު މި މުބާރާތުގެ ފައިނަލަށް ސަންކުއިކް ލިލީ އާއި ޝުގަ ކޯން ދަތުރުކުރިއިރު، ފައިނަލް މެޗު ކުޅޭނީ މިއަދު ހަވީރެވެ.