އެތުލެޓިކޯ އަނެއްކާވެސް އެއްވަނައަށް

ސްޕެނިޝް ލަލީގާގައި އެޓްލެޓިކޯ މެޑްރިޑާއި ހުއެސްކާއާ ދެކޮޅަށް ކުޅުނު  މެޗު އެތުލެޓިކޯއިން ކާމިޔާބުކޮށް ޕޮއިންޓް ތާވަލްގެ އެއްވަނައަށް އަނެއްކާވެސް އަރައިިފިއެވެ.

އެތުލެޓިކޯގެ ދަނޑުގައި ކުޅުނު މިމެޗް އެޓީމް ކާމިޔަބުކުރީ 2-0 ލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އެތުލެޓިކޯއިންނެވެ. ބުދަ ދުވަހުގެ ރޭ އެންމެ ފަހުގެ ޗެމްޕިއަން ރެއާލް މެޑްރިޑް އެޓީމްގެ މެޗު ކާމިޔާބުކޮށް ޕޮއިންޓް ތާވަލްގެ އެއްވަނައަށް އަރާފައިވުމުން ތާވަލްގެ އެއްވަނައަށް އަލުން އެރުމަށްޓަކައި އެތުލެޓިކޯ ކޮންމެހެން މޮޅުވުން މުހިންމު މިމެޗްގައި އެޓީމްގެ ފުރަތަމަ ލަނޑު މެޗްގެ 39 ވަނަ މިނެޓްގައި ޖަހާދިނީ އެންޖެލް ކޮރޭއާއެވެ. އަދި އެޓީމްގެ ދެވަނަ ލަނޑު މެޗްގެ 80 ވަނަ މިނެޓްގައި ޖަހާދިނީ ޔަނިކް ކަރެސްކޯއެެވެ. މިއީ ޔޫރަޕިއަން ސުޕަރ ލީގުން އެތުލެޓިކޯ ވަކިވިކަން އިއުލާން ކުރިފަހުން އެޓީމް ކުޅުނު ފުރަތަމަ މެޗެވެ.

މިކާމިޔާބީއާއެކު އެތުލެޓިކޯ މިހާރު އުޅެނީ ކުޅުނު 32 މެޗުން ލިބިފައިވާ 73 ޕޮއިންޓާއެކު ތާވަލްގެ އެއްވަނައިގައެެވެ. އަދި ދެވަނައިގާ މިިވަގުތު އޮތް ރެއާލް އާއި ދެމެދު 3 ޕޮއިންޓްގެ ތަފާތެއް އެބަހުއްޓެވެ. އަދި މިމުބާރާތުގައި ކޮންމެ ޓީމަކަށް ބާކީ 6 މެޗް އޮތުމުން ސީޒަންގެ ނިމުން ލަލީގާގައި ދާނީ ވަރަށް ވާދަވެރިކޮށް ކަމަށް މިހާރުވަނީ ޔަގީން ކުރެވިފައެެވެ. އަދި ކުރިއަށް ހުރި މެޗްތަކަށް ބަލާލާއިރު އެންމެ ފާހަގަކޮށްލެވޭ ކުރިމަތިލުމެއްގެގޮތުގައި ފާހަގަ ކޮށްލެވެނީ މިއަންނަ މަަހުގެ 8 ވަނަ ދުވަހު އެތުލެޓިކޯ އާއި މިވަގުތު ތާވަލްގެ ތިންވަނައިގާ އޮތް ބާސެލޯނާގެ ކުރިމަތިލުމެވެ.

ބާސާ މިހާރު އެއްމެޗް މަދުން ކުޅެފައިވުމުން ތާވަލްގެ ތިންވަނައިގާ އޮތް ނަމަވެސް ނުކުޅެ އޮތް މެޗް ކާމިޔާބުކޮށްފި ނަމަ އެތުލެޓިކޯއާއި ދެމެދުގައިވާ ފަރަގު 2 ޕޮއިންޓަށް ކުޑަވެގެންދާނެއެެވެ. އަދި އެހެން ވެއްޖެނަމަ ތާވަލްގެ އެއްވަނައަށް އެރުމުގެ ފުރުސަތު މިދެޓީމަށް އެމެޗް ކާމިޔާބުކޮށްފިނަމަ ލިބިގެންދާނެއެެވެ. އަދި އެމެޗް އެއްވަރު ވެއްޖެނަމަ އެކަމުގެ ފައިދާ ނެގުމުގެ ފުރުސަތު ރެއާލްއަށްވެސް އޮންނާނެއެވެ.