ޔޫރަޕިއަން ސުޕަ ލީގުގެ މައްސަލައިގައި ޔޫރަޕްގެ ކްލަބްތައް ތަމްސީލުކުރާ ކްލަބް އެސޯސިއޭޝަން (އީސީއޭ)ގެ ޗެއާމަނަކަށް ހުރި ޔުވެންޓަސްގެ އަންދްރެއާ އަގްނެލީ މަގާމުން ވަކިވުމުން ހުސްވި އެ މަގާމަށް ޕީއެސްޖީގެ ރައީސް ނާސިލް އެލް-ހެއްލާފީ ހަމަޖައްސައިފި އެވެ.
އީސީއޭ އިން ބުނީ ހެއްލާފީ ފަދަ ފުޓްބޯޅައިގެ ނުފޫޒުގަދަ ފަރާތެއް މި ދަނޑިވަޅުގައި އީސީއޭ އަށް ވަރަށް މުހިއްމު ކަމަށެވެ. އަދި ސުޕަ ލީގު ފަދަ ފުޓްބޯޅައިގެ މިސްރާގު ބަދަލުކުރަން ގެންނަ ޕްރޮޖެކްޓްތަކާ ދެކޮޅަށް ކެރިގެން ކުރިމަތިލާން ކެރޭ ޗެއާމަނެއް އީސީއޭގައި ހުންނަން ޖެހޭ ކަމަށާއި އެ ރޯލު ހެއްލާފީ އަށް އަދާކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
ހެއްލާފީ ބުނީ އޭނާ އަށް އިތުބާރުކޮށް މި ފަދަ ދަނޑިވަޅެއްގައި އީސީއޭ ބޯޑުން އެ ޒިންމާ ހަވާލުކުރުމަކީ ލިިބިގެންދިޔަ ވަރަށް ބޮޑު ފަހުރެއް ކަމަށެވެ. އަދި ޔޫރަޕިއަން ސުޕަ ލީގާ ދެކޮޅަށް މެޖޯރިޓީ ކްލަބްތަކުން ކުރަމުންދާ މުހިއްމު މަސައްކަތެއް ހިނގާ މި ދަނޑިވަޅެއްގައި އީސީއޭ އަށް ވެސް ބޮޑު ޒިންމާއެއް އެބައޮތް ކަމަށް ހެއްލާފީ ވިދާޅުވި އެވެ.
ހެއްލާފީ ވަނީ ސުޕަ ލީގުގެ ދައުވަތު ޕީއެސްޖީ އަށް ލިބުނު ކަމަށާއި އެކަމަކު އެ ޕްރޮޕޯސަލަށް ނޫނެކޭ ބުނީ ޔުއެފާއާ އެކު ކުރިއަށްދާން ބޭނުންވާތީ ކަމަށެވެ.
ކޮމެންޓު ފޮނުވާ