މައްސަލަ ބޮޑުވި ޔޫރަޕިއަން ސުޕަ ލީގުގައި ބައިވެރިވި އިނގިރޭސި ޕްރިމިއަރ ލީގުގެ ކްލަބްތަކުން މުބާރާތުން ވަކިވެއްޖެއެވެ.
މުބާރާތުގައި ބައިވެރިވި 12 ކްލަބްގެ ތެރެއިން ޕްރިމިއާ ލީގުން ބައިވެރިވި 6 ކްލަބްވެސް ރަސްމީކޮށް މުބާރާތުން ވަކިވެފައި މިވަނީ ގިނަ ބަޔެއްގެ ފާޑުކިޔުން ވަރަށް ބޮޑަށް ސުޕަ ލީގަށް އަމާޒުވެފައި ވަނިކޮށެވެ.
މިދިޔަ އާދިއްތަ ދުވަހު ޔުއެފާ އާއި ފީފާ އިން އިންޒާރު ދެމުން ދަނިކޮށް ސުޕަ ލީގު އިއުލާނުކުރިއިރުގައި ފައުންޑަރުންގެ ގޮތުގައި ތިބި 12 ކްލަބްގެ ތެރޭގައި އިންގްލެންޑްގެ ހަ ކްލަބް ހިމެނެ އެވެ. އެއީ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، ޗެލްސީ، ޓޮޓެންހަމް އަދި އާސެނަލް އެވެ
އިނގިރޭސި ހަ ކްލަބްގެ އިތުރުން ދެން މުބާރާތުގައި ބައިވެރިވެފައިވަނީ ބާސެލޯނާ، ރެއާލް މެޑްރިޑް، އެތުލެޓިކޯ މެޑްރިޑް، ޔުވެންޓަސް، އިންޓަ މިލާން އަދި އޭސީ މިލާނުންނެވެ. މިއިން އެއްވެސް ކްލަބުން މުބާރާތުން ވަކިވުމާ ގުޅޭގޮތުން އަދި ރަސްމީކޮށް އެއްޗެއް ބުނެފައެއް ނެތެވެ.
ސުޕަ ލީގު ކާމިޔާބުނުވާނެ ކަމަށް ބެލެވިފައިވާއިރު، މީގެ ކުރިން މި ލީގުގައި ނުހިމެނޭ ބައެއް ކުލަބުތަކުންވެސް ވަނީ ސުޕަ ލީގާ ދެކޮޅަށް ވާހަކަދައްކާފައެވެ. އެގޮތުން ޖަރުމަނުގެ ގަދަ ދެ ބާރު ކަމަށްވާ ބަޔާން މިއުނިކާއި، ބޮރޫޝިއާ ޑޯޓްމުންޑް އަދި ފްރާންސްގެ ޗެމްޕިއަން ޕީއެސްޖީންވެސް ވަނީ ސުޕަ ލީގުގައި ނުކުޅޭނެ ކަމަށް ބުނެފައެވެ.
ސުޕަ ލީގާ ދެކޮޅަށް ކްލަބްތަކުގެ ސަޕޯޓަރުން އެ ޓީމުތަކުގެ ހޯމް ސްޓޭޑިއަމް ބޭރުގައި އަޑުއުފުލައި ބެނާ ހަރުކުރުމުގެ އިތުރުން މުޒާހަރާކުރި އެވެ. އަދި އިނގިރޭސި ސަރުކާރުން ވެސް ވަނީ ސުޕަ ލީގާ ދެކޮޅަށް ޕްރިމިއާ ލީގުން އަޅާ ކޮންމެ ފިޔަވަޅަކަށް ތާއީދުކުރާނެ ކަމަށް ބުނެފަ އެވެ. ސުޕަ ލީގުގައި ބައިވެރިވި އެއްވެސް ޓީމެއްގެ ކޯޗެއް އެ އަށް ތާއީދުކޮށް ވާހަކަ ދައްކާފައިނުވެއެވެ. ސުޕަ ލީގުގައި ބައިވެރިނުވާން ކްލަބްތަކުން ނިންމި ނިންމުމަށް ކުޅުންތެރިން ވަނީ މަރުހަބާ ކިޔައިފައެވެ.
ކޮމެންޓު ފޮނުވާ