ހަށިގަނޑުން ބޭރުގައި ލޭ ދައުރުކުރަމުންދާ މެޝިންތަކަށް ބަލަން ޝާފިއު އޮތެވެ. އޭރު އޭނާގެ ލޮލުން ފޭދެމުން ދިޔަ ކަރުނަތައް ކޯތާފަތްމަތީގައި ކޯރު ދެމިގެން ފައިބައެވެ. ކަރުނައިން ތެމިފައިވާ ދެލޮލުން ވަށައިގެންވީ މަންޒަރު ފެންނަނީ ފުސްކޮށެވެ. ވޯޑުގެ ތެރެ އޮތީ ހިމޭންވެފައެވެ. އޭސީން އިވޭ އަޑެއް ނޫނީ އެހެން އެއްވެސް އަޑެއް ނެތެވެ. ޑަޔަލަސިސް ހަދާ މީހުން ބަލަހައްޓަން ތިބޭ ނަރުސްކުދިންނަށް ޚާއްސަ ޖަހައިގެ ތެރޭގައި ނަރުސްކުއްޖަކު ނިދި ތާއްޔާއި ޖެހިޖެހި އިނެވެ. 12 ގަޑިއިރުގެ ދިގު ޑިއުޓީ ނިމޭއިރު އެކުދިންގެ ހާލަކީވެސް އެއީއެވެ.

ޑަޔަލަސިސް ވޯޑުގައި ޝާފިއު ނޫން އެހެން މީހުންވެސް ތިއްބެވެ. އެކަމަކު ކޮންމެ މީހަކުވެސް ވަނީ އެމީހެއްގެ އަމިއްލަ ހިމޭން ދުނިޔޭގައެވެ. ހިތާމަތަކާއި މޮޅިޔާއި ވޭނާއި ކަރުނައިގެ ދުނިޔޭގައެވެ.

ސީލިންގ އަށް ބަލަހައްޓައިގެން ޝާފިއު އޮތެވެ. އޭނާއަށް ފެންނަނީ އެއްވެސް ކުލައެއް ނެތް ހުސްކަމެވެ. ދިރުމެއް ނެތް ކޮންކްރީޓްގެ ހުސްކަމެވެ. އޭނާގެ ހަޔާތް ފަދައިންނެވެ.

ދެކިޑްނީ ފެއިލްވުމާއިއެކު ޝާފިއުގެ ދުނިޔެ ބަދަލުވީއެވެ. ހަޔާތުގެ ދަތުރު މިހިސާބަށް މިނިމުނީއޭ އޭނާގެ ހިތަށް އެރީއެވެ. ދިރިއުޅުމުގައި އޭނާ ހާސިލްކުރަން ބޭނުންވި ހާދަ ގިނަގުނަ ކަންކަން އެބަހުއްޓެވެ. އެކަމަކު މިހާރު އޭނާ ހީކުރާ ގޮތުގައި އެކަންކަމަކީ ދެން ތަޢުބީރެއް ނެތް ހުވަފެނެކެވެ. ބިލާހެކެވެ.

ޝާފިއުއަކީ ރާއްޖެތެރޭގެ އާދައިގެ އާއިލާއަކަށް އުފަން ޒުވާނެކެވެ. ވަރަށް ކުޑައިރު މައިންބަފައިން މަރުވުމުން އޭނާ މާލެއަށް ގެނައީ ބޮޑުދައިތައެކެވެ. އެގޭގައި އޭނާ އުޅުނީ އުފަލަކު ނޫނެވެ. އެކަމަކު ދިރިއުޅުމުގެ ބުރަތައް އުފުލަމުން އަމިއްލަ ފައިމައްޗަށް ކޮޅަށް ތެދުވުމަށް އޭނާ ނުހަނު މަސައްކަތް ކުރިއެވެ. އެކަން ހާސިލްވެސް ކުރިއެވެ.

ޕައިލެޓަކަށް ވުމަކީ އޭނާގެ އަބަދުވެސް އުއްމީދެކެވެ. އޯލެވެލް އާއި އޭލެވެލްގައި ގަދަ ދިހައެއްގެ އެއްވަނައަށް އޭނާއަށް ވާސިލްވެވޭތޯ މަސައްކަތްކުރީ އެހެންވެއެވެ. އެކަމަކު އެއްވަނަ ނުހޯދުނަސް އޯލެވެލް އާއި އޭލެވެލްގެ ގަދަ ދިހައެއްގައި އޭނާ ހިމެނުނެވެ.

ޝާފިއު ޕައިލެޓްކަން ކިޔަވައިގެން އައިސް ވަޒީފާ އާއި ގުޅުނީ ރާއްޖޭގެ އަމިއްލަ އެއާލައިނަކާއެވެ. އޭނާ ކިޔެވީ، ސަރުކާރުން ކިޔަވަން ދޫކުރާ ލޯނު ނަގައިގެން ކަމަށްވާތީ، ޝާފިއުގެ ފުރަތަމަ އަމާޒަކަށް ހެދީ ބޮލުގައި އެޅިފައި އޮތް ބޮޑު ދަރަނި ޚަލާސްކުރުމެވެ. އެހެންކަމުން ލިބެމުން އައި މުސާރައިގެ 80 އިންސައްތަ، ޝާފިއު ދައްކަމުން އައީ ލޯނަށެވެ.

ނާޒްއަކީ ޝާފިއު އާއި އެކު މަސައްކަތް ކުރި ކެބިން ކުރޫއެކެވެ. ދެމީހުން އެކަކު އަނެކަކަށް ފެނި ދެނިވެ ތައާރަފްވެ ގާތްކަމާއި ރަހުމަތްތެރިކަން އުފެދުނީ ވަޒީފާގެ މާހައުލުންނެވެ. އެގާތްކަން މަޑުމަޑުން ބަދަލުވީ ލޯތްބަށެވެ. އެއާއިއެކު ޝާފިއުގެ ހަޔާތަށް އައީ ބަހާރު މޫސުމްގެ އުފާވެރި ކަމެވެ.

ރާއްޖެ ތެރެ އަށާއި ރާއްޖެއިން ބޭރަށް ކުރާ ގިނަ ދަތުރުތަކުގައި ނާޒް އާއި ޝާފިއުއަށް އެކުގައި ދަތުރުރު ކުރެވެއެވެ. ދެދަތުރުގެ ދޭތެރެއިން ލިބޭ ވަގުތުތަކުގައި ދެމީހުން އެކުގައި ކެއުމަށާއި ވިޔަފާރިކުރުމަށް ގޮސް އުޅެއެވެ. އެހެންކަމުން ދެމީހުންނަށް އެކުގައި ގިނަ ވަގުތުތަކެއް އައީ ހޭދަ ކުރެވެމުންނެވެ.

ޝާފިއު ނިންމައިގެން ހުރީ، އޭނާގެ ބޮލުގައި އޮތް ދަރަނި އަދާކުރެވުނުހާ އަވަހަކަށް ނާޒް އާއި އެކު ދިރިއުޅުމެއް ފަށާށެވެ. ހުޅުމާލެއިން ފްލެޓެއް ގަންނާށެވެ. ނާޒް ޝައުޤުވެރިވާ ފެޝަން ވިޔަފާރިއެއް ފަށައިދީ އޭނާ ބޯޓުން ބާލުވާށެވެ. ފްލައިޓް އެޓެންޑެއްގެ ގޮތުގައި ނާޒް މަސައްކަތް ކުރަން ޝާފިއު ބޭނުން ނުވަނީ، އެހެން މީހުންގެ ނަޒަރުން ނާޒް ސަލާމަތް ކުރުމަށެވެ. ނާޒް ގެއްލިދާނެތީ ބިރުގަންނަނީއެވެ.

ބައެއް ދަތުރުތަކަށް ފަހު، ނާޒްއަށް ކުރިމަތިވާ ބައެއް ކަންކަންވެސް ޝާފިއު އާއި ނާޒް ހިއްސާކުރެއެވެ. ބައެއް ފިރިހެނުން ބަލާ ގޮތުން އުނދަގޫވާ ވާހަކައެވެ. ނާޒްގެ ސަމާލުކަން ހޯދުމަށް ހަމަ ގަސްތުގައިވެސް ބައެއް މީހުން ކަންތައްތައް ކުރާ ގޮތުގެ ވާހަކައެވެ. އެކަންކަމަކީ ޝާފިއު ނުތަނަވަސް ކުރުވާ ޚިޔާލުތަކެވެ.

ކިޔަވަން ނެގި ލޯނު އަދާކޮށް ޝާފިއުއަށް ނިންމުނީ 2018ވަނަ އަހަރުގެ މެދުތެރޭގައެވެ. އެއީ އޭނާއަށް ލިބުނު ވަރަށް ބޮޑު ލުޔެކެވެ. އޭނާއަށް އިހްސާސްވީ ބޮލަށްލައިގެން އުޅުނު ހިލަގަނޑަކުން ސަލާމަތްވެވުނީ ކަމަށެވެ. ހަމަ އެއަހަރު ޝާފިއު ނާޒްއަށް ކައިވެނި ހުށައެޅިއެވެ. ރާއްޖޭގެ މަޝްހޫރު ބޮޑު ރިޒޯޓެއްގައެވެ. ރޭގަނޑުގެ ކެއުމުގެ ވަގުތުގައެވެ. އެއުފާވެރި މާހައުލުގައި އެތައް ބަޔަކު، ނާޒް އާއި ޝާފިއުއަށް މަރުހަބާ ކިއެވެ. ފުރަތަމަ ޝާފިއުގެ ހާލު ދެރަވީ އެރޭގައެވެ. ކުރިންވެސް ވަރުބަލިވެ ހޮޑުލެވި އަދި ފައިތިލަމަތި ދުޅަވުން ފަދަ ކަންކަމާއި ދޭތެރެ ދޭތެރެއިން ޝާފިއުއަށް ކުރިމަތިވަމުން އައެވެ. އެރޭވެސް އޭނާ ހީކުރީ ކެވުނު އެއްޗެއްގެ ސަބަބުން ވީ ގޮތެއް ކަމަށެވެ. ހެނދުނު ނިދައި ހޭލި އިރު ލޯމައްޗާއި މޫނު މަތިވެސް ކުޑަކޮށް ދުޅަވެފައި ހުރުމުން އެދުވަހު ދެއްކީ ރިޒޯޓުގެ ޑޮކްޓަރަށެވެ. ފަހުން ރަނގަޅުވުމުން އެއީ މާބޮޑު ކަމަކަށް ޝާފިއުއެއް ނުހެދިއެވެ.

ޝާފިއު އޭނާގެ ހަޔާތުގެ އަމާޒުތައް ހާސިލްކުރުމަށް ފިޔަވަޅަކަށް ފަހު ފިޔަވަޅެއް ކުރިޔަށް އަޅަމުން އައެވެ. ބޭންކުން ލޯނެއް ނަގައި، ހުޅުމާލެއިން ދެކޮޓަރީގެ ލަގްޒަރީ އެޕާޓްމެންޓެއް ގަތެވެ. އެތަނަށް ބަދަލުވުމަށް ފަހުގައި ނާޒް އާއި ދެމީހުން ކައިވެނިވެސް ކުރިއެވެ. އެހާތަނަށް އަތުގައި ޖަމާގައި ހުރިނަމަ ހުރި ފައިސާއެއް ޝާފިއު ހުސްކޮށްލީ ކައިވެނި ޕާޓީއަށެވެ. އޭރު ތަޤުދީރުގައި ރޭވެމުން އައީ ކަޅުއަނދިރި ދުވަސްތަކެއް ކަމުގެ އިޙްސާސެއް ޝާފިއުއަކަށް ނެތެވެ.

ކައިވެންޏަށް 3 މަސްވެސް ނުވަނީސް ޝާފިއު އާއި ނާޒްގެ ހަޔާތަށްވެސް ބިންދާލީ، ދުނިޔޭގެ އެތައް ބިލިއަން ބައެއްގެ ދިރިއުޅުމަށް ބިންދާލި ކޯވިޑް-19ގެ ބިޔަ ރާޅެވެ. މުޅި ދުނިޔެ ބަންދުވެ އެއާލައިންތައް ބަނގުރޫޓްވުމުން ޝާފިއު އާއި ނާޒްގެ ހަޔާތްވެސް ބަދަލުވީއެވެ. އާމްދަނީ ހުއްޓުމުން ޚަރަދު ބޮޑު ދިރިއުޅުމެއް އުޅެމުން އައި ދެމަފިރިންނަށް ޖެހުނީ ވަރަށް ބޮޑު ވޭނެކެވެ.  އެކަމަކު އެވަގުތަށް ލިބުނު ލުޔަކީ، ބޭންކު ތަކުން ލޯންތައް ލަސްކޮށްދިނުން ނަމަވެސް ފަހުން އިންޓަރެސްޓަށް އެރިބައި އަދި މާބޮޑެވެ.

ކޯވިޑް ފެށުނު ފަހުން ދެތިން މަހުގައި ބައި މުސާރަ ލިބުނު ނަމަވެސް، އެއާލައިނަށް ލިބެމުން ދިޔަ ގެއްލުންތަކާއި އެކު މުވައްޒަފުން ވަކިކޮށް މަދު ކުރުމަށް އެޅި ފިޔަވަޅުތަކުގެ ތެރޭގައި ޝާފިއުގެ ވަޒީފާވެސް އަދި ނާޒްގެ ވަޒީފާވެސް ގެއްލުނީއެވެ. އެއާއި އެކު ނާޒްވެސް ދުވަސްކޮޅަކަށް ފުރައިގެން ދިޔައީ އޭނާގެ ރަށަށެވެ. އެހިސާބުން ނިމުނީއެއް ނޫނެވެ. ދެން ހަޔާތަށް ބިންދާލީ އެއަށްވުރެ މާބޮޑު ރާޅެކެވެ.

ވަޒީފާ ގެއްލި ދިރިއުޅުމުގެ އެ ހާސްގަނޑުގެ ތެރޭގައި ޝާފިއުގެ ހަށިގަނޑު އާދަޔާއި ޚިލާފަށް ހިކެން ފެށީއެވެ. ލޮލުގެ ކުލަ ރީނދޫވެ ވަރުބަލިވެ ހޮޑުލެވި، ފައި ފޮއްސިވާން ފެށީއެވެ. އޭނާ ހީކުރީ އެއީ ރަނގަޅަށް ނުނިދޭތީ އާއި ނުކެވޭތީ ސްޓްރެސް ބޮޑުވުމުގެ ސަބަބުން ކުރިމަތިވާންފެށި މައްސަލަތަކެއް ކަމަށެވެ. އޭރު ޝާފިއު ހުރީ ވަރަށް ބޮޑަށް ޑިޕްރެޝަނަށްވެސް ވެއްޓިފައެވެ.

ފުރަތަމަ ޝާފިއު ދިޔައީ ނަފްސާނީ ޑޮކްޓަރެއްގެ ގާތަށެވެ. އެ ޑޮކްޓަރު އޭނާ ފޮނުވީ ކިޑްނީ ބަލިތަކުގެ ޚާއްސަ ޑޮކްޓަރެއްގެ ގާތަށެވެ. ހިތާމަވެރި ޚަބަރު ލިބުނީ ދެނެވެ. ޝާފިއުއަށް ވަމުން ދިޔަ ގޮތަކީ އޭނާގެ ދެކިޑްނީ ފެއިލްވުމުގެ ސަބަބުން ދިމާވަމުން އައި ކަމެއްކަން އެނގުމާއި އެކު އޭނާއަށް ހީވީ އުޑު ބޮލަށް ވެއްޓުނީހެންނެވ. ހިތާމައިގެ މައްޗަށް ހިތާމަ އޭނާގެ ހަޔާތަށް ވެރިވީއެވެ.

އެހިތާމަވެރި ޚަބަރު ނާޒްއަށް ޝާފިއު ދިނީ އޭނާ ރަށުގައި ހުއްޓައެވެ. ނާޒްގެ ޖަވާބު ފިނިވެފައި ކުރެވެ. ދެން އޭނާ ކުރާނީ ކީއްހެއްޔެވެ؟ އެއީ ޝާފިއު އުއްމީދު ކުރި ޖަވާބެއް ނޫނެވެ. ލޯބި ބިނާކުރި ދިރިއުޅުމުގައި ބައިވެރިޔާގެ ފުށުން ލިބުމަށް އެދޭ ޖަވާބެއް ނޫނެވެ.

ޝާފިއު ދިރިއުޅެމުން ދިޔައީ އެކަންޏެވެ. ބަލީގެ ފަރުވާ ފަށައި، ކައުންސިލިންގ ސެޝަންތަކަށް ދިޔައީ އެކަންޏެވެ. ނާޒް ހުރީ ރަށުގައެވެ. ދެ ސަބަބެއް އޮތެވެ. އެއް ސަބަބަކީ ކޯވިޑްގެ ފުރަ ބަންދާއި އެކު މާލެއަށް ދަތުރުކުރެވެން ނެތުމެވެ. ދެވަނަ ސަބަބަކީ އޭނާގެ މިނިވަން ޚިޔާލެވެ.

ނާޒް މާލެ އައީ ހަތަރުމަސްފަހުންނެވެ. ރަށުގައި ހުއްޓައި އޭނާއަށް ވަޒީފާ އަނބުރާ ލިބުނުކަން އެންގުމުންނެވެ. މާލެއަށް އައިސް ނާޒް ޝާފިއުގެ އެޕާޓްމެންޓްގައި ހުރީ ހަފްތާއެއްހައި ދުވަހުގައެވެ. އޭނާ އަމިއްލައަށް އެހެންތަނެއް ކުއްޔަށް ހޯދައިގެން ބަދަލުވީއެވެ.

ނާޒް ވަރިވާން ބޭނުންވެ އެވާހަކަ ދެއްކި ދުވަހު، ޝާފިއު އެއްވެސް އެއްޗެއް ނުބުނެ ހުރީ އަޑު އަހާށެވެ. ބުނާނެ އެއްވެސް އެއްޗެއް ނެތީއެވެ. ހަޔާތުގެ ދަތުރުގައި އެކުގައި ވުމަށް އެދެވުނަސް މިހާރު އެކަން ވާންނެތީއެވެ. ނާޒް ބޭނުންވަނީ، ހާސްކަމެއް ނެތް އުފާވެރި ދިރިއުޅުމެކެވެ. ބަލި ފިރިޔަކަށްޓަކައި ޒުވާންކަން ނަގާލާކަށް އޭނާ ބޭނުމެއް ނުވިއެވެ.

ނާޒް ކުއްވެރި ކުރާކަށް ޝާފިއު ބޭނުމެއް ނޫނެވެ. ހަމަޖެހޭ ދިރިއުޅުމެއް ހޯދުމާއި އުފާވެރި މުސްތަޤުބަލަކަށް އުއްމީދު ކުރުމާއި މަސައްކަތް ކުރުމަކީ ނާޒްއަށް އޮތް ހައްޤެކެވެ. އެހެން މީހަކަށްޓަކައި ހަޔާތް ޤުރުބާން ކުރުމާއި ނުކުރުމަކީ އޭނާގެ އިޚްތިޔާރުން އޮންނާނެ ކަމެކެވެ. އެކަމަށް އެހެން މީހަކު އެއްޗެއް ބުނާކަށް ނުޖެހޭނެވެ.

ކޯޓުގައި ނާޒު ވަރިކރާ ސަބަބު، ހާމަކުރުމުން ޤާޟީއަށްވެސް ލިބުނީ ހައިރާން ކަމެވެ. ޝާފިއުގެ ހިތްހަމަ އެހައި ހެޔޮހެއްޔޭ އަހާލީވެސް އެހެންވެއެވެ. ބަލި ތަންމައްޗަށް ވެއްޓުމުން އަނިބިމީހާ އޭނާ ދޫކޮށްލާފައި ދިޔުމަށް ހަމަ ހަޤީޤަތުގައިވެސް އެދެންތޯ އޭނާ ގާތުގައި އެހިއެވެ. ޝާފިއު ބުނީ ނާޒް އޭނާގެ ގާތުގައި ހުންނަން އެދޭ ކަމަށެވެ. އެކަމަކު ޝާފިއު އާއިއެކު ހަޔާތުގެ ބާކީބައި ވޭތު ކުރުމާއި ނުކުރުމުގެ ނިންމުމަކީ ނާޒް ނިންމަންޖެހޭ އޭނާގެ އަމިއްލަ ނިންމުމެއް ކަމަށެވެ. އެކަމާއިމެދު އޭނާގެ ޝަކުވާއެއް ނެތް ކަމަށެވެ.

ވަރިވުމަށްފަހު ނާޒް ޝާފިއުގެ ގެއިން ނުކުތް ދުވަހު ދެމީހުންކުރެ އެކަކުވެސް އަނެކަކާއި ވާހަކައެއް ނުދައްކައެވެ. އެއްވެސް މީހަކު އަނެކެއްގެ ގާތުގައި ދައްކާނެ ވާހަކައެއް ނެތީއެވެ. އެދޭނެ އެދުމެއް ނެތީއެވެ. ކޮންމެ މީހަކީވެސް ވަކި މީހެކެވެ. މިނިވަން މީހެކެވެ. އެހެންވީމާ، އެމީހަކު ޚިޔާރު ކުރާނެ މަގެއް އެއީ އެމީހަކަށް އޮތް ނިންމުމެކެވެ.

ޚިޔާލުތަކުގެ ދުނިޔެއިން ޝާފިއުއަށް ނުކުމެވުނީ ނަރުސްކުއްޖާ އައިސް ގޮވާލީމައެވެ. ޑަޔަލަސިސް ހަދައި ނިމުނީއެވެ. އަނެއްކާވެސް ދެދުވަސް ފަހުން އޭނާ އަންނާނީ މިތަނަށެވެ. މިއަދު މިއީ އޭނާގެ ދުނިޔެއެވެ. އެކަމަކު ޝާފިއު ހިއްވަރު އެލުވައެއް ނުލައެވެ. ދެކިޑްނީ ފެއިލްވެފައިވާ ހާލުގައިވެސް އޭނާ ދިރިއުޅެން ދަސްކޮށްފިއެވެ. ގޭގައި އިނދެ އާމުދަނީ ހޯދޭނެ މަގުފަހިކޮށްފިއެވެ. އޭނާގެ އަމިއްލަ މަސައްކަތުންނާއި ހެޔޮ އެދޭ މީހުންނާއި ރައްޓެހިންގެ މަސައްކަތުން ކިޑްނީ ޓްރާންސް ޕްލާންޓް ހެދޭނެހައި ފައިސާ ޖަމާކޮށްފިއެވެ. މިއަދު އޭނާ ހުރީ ކިޑްނީއެއް ހަދިޔާކުރާނޭ ދީލަތި މީހެއްގެ އިންތިޒާރުގައެވެ.

– ނިމުނީ –