ހދ. ކުޅުދުއްފުށީ އެއާޕޯޓުގެ ރަންވޭ ހިމެނޭ ސަރަޙައްދަށް ޤަވާއިދާ ޚިލާފަށް އާއްމުން ނުވަނުމަށް ސިޓީ ކައުންސިލުން އަންގަވައިފިއެވެ.
ކުޅުދުއްފުށީ ކައުންސިލުން ވިދާޅުވީ، ޝެޑިއުލް ކޮށްގެންނާއި، ޗާރޓަރކޮށްގެން ކުޅުދުއްފުށީ އެއަރޕޯޓަށް މަތިންދާ ބޯޓު ޖައްސާގަޑިތަކާއި، އެނޫންވެސް ގަޑިތަކުގައި ރަންވޭ ހިމެނޭ ސަރަހައްދަށް އާންމުން ވަދެ ނުކުމެވާކަމުގެ ޝަކުވާ ލިބެމުންދާކަމަށެވެ. އެގޮތުން ކުޑަކުދިންނާއި ބޮޑެތި މީހުން ރަންވޭ ހިމެނޭ ސަރަހައްދަށް ވަދެ ނުކުމެވާކަން ފާހަގަކުރެވިފައިވާކަމަށް ކައުންސިލުން ވިދާޅުވެއެވެ.
މިފަދަ ކަންކަމަކީ ބައެއްގެ ފުރާނައަށް ގެއްލުން ލިބޭފަދަ ނުރައްކާތެރި ހާދިސާއެއް ހިނގާފާނެ ކަމަކަށްވާތީ މިފަދަ ކަންކަން ނުކުރުމަށް ކުޅުދުއްފުށީ ކައުންސިލުން ވަނީ ނަސޭހަތްތެރިވެފައެވެ. އަދިި މަތިންދާ ބޯޓު ޖައްސާ ސަރަހައްދަށް ޢާންމުން ވަދެ ނުކުމެ އުޅުމަކީ މަނާކަމެއްކަމަށްވެސް އެ ރަށު ކައުންސިލުން ވިދާޅުވެފައިވެއެވެ.
1200 މީޓަރު ދިގު އަދި 30 މީޓަރު ފުޅާ ރަންވޭއަކާއެކު ތަރައްޤީކޮށްފައިވާ ހދ. ކުޅުދުއްފުށީ އެއަރޕޯޓަށް ޝެޑިއުލް ދަތުރުތައް ރަސްމީކޮށް ފަށާފައިވަނީ 9 އޯގަސްޓް 2019 ގައެވެ
ކޮމެންޓު ފޮނުވާ