ގައިގައި ހުރިވަރެއްލާފައި ދޮރުފަތް ޖެހުމަށްފަހު ސިޔާން ގޭތެރެއަށް ވަދެގެން އައެވެ. އޭރު އޭނާ ހީވަނީ ރުޅިއަރައިގެންފައިވާ ކުޅަނދުރެއް ހެންނެވެ. ރީތިކޮށް ފައި ބިންމަތީގައި ޖެހޭ ހެނެއްވެސް ހިއެއް ނުވެއެވެ. ކޮޓަރި ދޮރު ހުޅުވާލުމަށްފަހު އޭނާ ފުރަތަމަވެސް ބަލާލީ އެނދަށެވެ. 3 އަހަރުގެ މަންހާ ނިދާފައި އޮތް އިރު އަންހެނުން މުނީޒާ ފެންނާކަށް ނެތެވެ. މުނީޒާ ގޭގައި ނެތުމުން ސިޔާންގެ ރުޅި އަނެއްކާ އިންތިހާއަށް މައްޗަށް ހިނގައްޖެއެވެ. ރުޅިއައިސްގެން އޭނާ ތުރުތުރު އަޅައެވެ. އޭނާ ހީކުރީ އޭނާގެ ލޯ އޭނާއަށް ކެހި ދިނީ ކަމަށެވެ. އެއީ އޭނާއަށް ހީވި ހީވުމެއް ކަމަށެވެ. އޭނާ ކަޅަށް ޖެއްސިޔަސް އަންހެނުން މުނީޒާ ހިލޭ މީހަކާ އެކަހަލަ ގުޅުމެއް ނުބާއްވާނެ ކަމަށެވެ. އޭގައި ސަބަބުތަކެއް ވެސް ހުއްޓެވެ.

ސިޔާން ހީކޮށްގެން ހުރި ގޮތުގައި މިއަދާއި ހަމައަށް އައިރުވެސް މުނީޒާއަކަށް އޭނާގެ އުޅުމާއި ބެހޭ ގޮތުން މާބޮޑު އެއްޗެއް ނޭނގެއެވެ. އޭގެއިތުރަށް މުނީޒާއަކީ ޒަމާނީ މިދުނިޔެއާއި ވަރަށް ދުރުގައި އެކަނިވެރިކަމާއި އެކު ދިރިއުޅޭ މީހެކެވެ. އޭނާގެ މާގިނަ ރައްޓެހިން ތަކެއް ނުތިބޭނެއެވެ. ފޯނުން މީހުންނާ ވާހަކަދައްކައެއް ނުހަދާނެއެވެ. ފޭސްބުކް ޓުވިޓާ ފަދަ ސޯޝަލްމީޑިޔާގެ އެއްވެސް ވަޞީލަތެއްގެ ބޭނުމެއް ނުހިފާނެއެވެ. ސިޔާން ނޫން މީހެއްގެ ފަހަތަކަށް ސައިކަލަކަށް ނާރާނެއެވެ. ސިޔާންގެ ފޯނާއި ވޮލެޓާއި ހާވައެއް ނުހަދާނެއެވެ. އޭނާއަށް ލިބެނީ ކިހާ ފައިސާއެއްތޯ ނާހާނެއެވެ. ހަގީގަތުގައި ސިޔާން ފައިދާ ނަގަނީ އެކަންކަމުންނެވެ. މުނީޒާގެ ދުނިޔެއާއި ބީރައްޓެހި އެ ދިރިއުޅުމުގެ ސަބަބުން ސިޔާން ދެކެމުން އައީ އެއީ އޭނާ ބޭނުން ކޮންމެ ކަމަކަށް މަގުފަހިވެފައިވާ ދޮރެއް ކަމުގައެވެ. އޭނާ އުޅޭ ގޮތުގެ ވާހަކަ ދޫދޫ މަތިން ނަމަވެސް މުނީޒާއާއި ހަމައަށް ނުފޯރާނެ ކަމުގެ ޔަޤީންކަން އޭނާއަށް އޮތެވެ. އެހެން ކަމުން ސިޔާން ޚަރަދުކޮށް ވަގު އަނބީންގެ ގޮތުގައި ގެންގުޅޭ ތިން ހަތަރު އަންހެނުން އަބަދުވެސް ތިބެއެވެ. ސިޔާންގެ އުޅުމާއި މެދު ރައްޓެހިން ދެމުންއައި ނަޞޭހަތްތަކަށް އޭނާ ދިނީ ބީރުކަންފަތެކެވެ. ފިރިމީހާ ވަގުއަނބީން ގެންގުޅޭނަމަ ފިރިމީހާއަށް ނޭނގުނަސް އަނބިމީހާވެސް ވަގުފިރީން ގެންގުޅޭނެކަމުގައި މުސްކުޅިން ބުނާބުނުން އޭނާހެދީ އެވޭލާ މީހުންގެ ފުލޯކް ވާހަކައަކަށެވެ. އޭނާ ރައްޓެހިން ދެއްކި އެވާހަކަތަކަށް މަލާމާތްކޮށް ހަޖޫ ޖެހިއެވެ.

މުނީޒާ ގެއަށް އައިސްވަނީ ސިޔާން އެރުޅިގަނޑުގައި ކެކި ކެކި ހުއްޓައެވެ. މުނީޒާ ނަލަހެދި ރީތިވެލައިގެން ހުރިވަރު ފެނިފައި ސިޔާންގެ ވިސްނުން ދިޔައީ ދުނިޔޭގެ ހަވާއިން ބޭރަށެވެ. މުނީޒާ ލާފައިވާ ލޭސްފޮތީގެ ރަތްކުލައިގެ ހެދުމާއި މޫނާއި ތުންފަތުގައި ހާކާފައިވާ މޭކަޕްތަކާއި ގައިގައި އަޅާފައިވާ ގަހަނާތައް ފެނުމުން ސިޔާންއަށް ހީވި ހީވުން މިއަދު ޔަޤީންވީއެވެ.

ސިޔާން ފެނިފައި މުނީޒާއަށްވެސް ހުއްޓެވި ފަހަތަށް ޖެހެވުނެވެ. ސިޔާންގެ ކަންތައް ހުންނަ ގޮތް އެންމެ ރަނގަޅަށް އެނގޭނީވެސް މުނީޒާއަށެވެ. އެހެން ކަމުން މުނީޒާ ކަންބޮޑުވީ ސިޔާންގެ ކުރިމަތީގައި ދައްކާނެ ވާހަކައަކާއި މެދުގައެވެ. ކަންކަން ހަމަޖައްސައިލާނެ ގޮތަކާއި މެދުގައެވެ. މުނީޒާއަށް ވުރެ ކުރިން ސިޔާން ގެއަށް އަތުވެދާނެ ކަމަކަށް އޭނާވެސް ހިއެއް ނުކުރެއެވެ. އާއްމުކޮށް ސިޔާން ގެއަށް އަންނާނީ ފަތިހުއެވެ. އެގޮތުގައި އަހަރުތަކެއް ފާއިތުވެ ހިނގައްޖެއެވެ.

"ތިޔައައީ ކޮންތާކު ތެޅިތެޅިފައި ހެއްޔެވެ؟" ސިޔާން އަޑުގެ ނެތްތަނަށް ހަޅޭލަވައިގަތެވެ. އެއްވެސް އެއްޗެއް ނުބުނެ މުނީޒާ ކޮޓަރިއަށް ވަންނަން ހިނގައިގަތުމުން ސިޔާން މުނީޒާގެ ކުރިބެއްދިއެވެ. އަދި އެއަށްވުރެ ބާރަށް ހަމަ އެސުވާލު ތަކުރާރުކުރިއެވެ. ލާނެތްގޮތަކަށް މުނީޒާ ހީލިއެވެ. އެއާއި އެކު ސިޔާންއަށް އޭނާގެ ނަފުސް ކޮންޓްރޯލެއް ނުކުރެވުނެވެ. މުނީޒާގެ ކަންކަށީގައި އެތިފަހަރެއް އަޅާވިހެލިއެވެ. ދެވަނަ ފަހަރަށް ސިޔާން ހޫރާލި އަތުގައި މުނީޒާ ހިފެހެއްޓިއެވެ. ސިޔާންއަށް ސިހުން ލިބުނީ އެވަގުތުގައެވެ.

"ބޭނުން ނެތިއްޔާ ވަރިކޮށްފައި ދާންއުޅޭ، ވަގު އަނބީން ކަލެއަށް ގެންގުޅެވެންޏާ މަށަށްވެސް އެގޮތް އޮންނާނެދޯ" ސިޔާން އަށްވުރެ ބާރަށް މުނީޒާ އެހެން ބުނުމުން ސިޔާންއަށް ހީވީ މީހަކު އޭނާގެ ބޯމައްޗަށް ބޮޑު ދަގަނޑު ގަނޑެއް ވައްޓާލީ ހެންނެވެ. އޭނާ ހުއްޓުން އެރިއެވެ. ގަނޑުވިއެވެ. ދުވަހަކުވެސް އޭނާގެ ކުރިމަތީގައި އަނގަހުޅުވާ ބާރަށް ބަހެއް ނުބުނާ މުނީޒާ އޭނާއަށް ޖަވާބުދީ ޖަދަލުކުރަން ފެށި ގޮތުންނެވެ. އޭނާގެ ބަސްމަގާއި ރާގު ހުރި ގޮތުންނެވެ. ސިޔާން އަކަށް ބުނާނެ އެއްޗެއްވެސް ނޭނގުނެވެ.

"އަހަރެންނަށްވެސް މީހުންވާނެ، ސިޔާން ތިޔައުޅޭގޮތަށް އުޅެވިދާނެ، އަހަރެންނަށްވެސް މިހާރު ދުނިޔެ އެބަ ދަސްވޭ" އެހެން ބުނެފައި މުނީޒާގޮސްވަނީ ކޮޓަރިއަށެވެ.

ގެއަށް ވަދެ ދޮރުފަތްޖެހި ވަރަށްވުރެބާރަށް ދޮރުފަތް ޖަހާފައި ސިޔާންގެއިން ނުކުމެއްޖެއެވެ. ސައިކަލަށް އަރާފައި ދުއްވާލި އިރުވެސް ހީވީ މަރުކުޑަތަންވެގެން އުޅޭ މީހަކު ހެންނެވެ. ވައިރޯޅިއެއްހެން ފައިބައިގެން އެދިޔަގޮތަށްގޮސް އޭނާވަނީ ބީޗުގައި ހުރި ކެފޭއަކަށެވެ. އެތާނގައި އިނދެ އޭނާ ސިގިރެޓަކަށްފަހު ސިގިރެޓެއް ހުލިކުރަމުން ވިސްނަމުން ދިޔައެވެ.

ސިޔާންގެ ހިތަށް ތަދުވެއްޖެއެވެ. ލޯބިވާ މީހަކު ބޭވަފާތެރިވީ ކަމުގެ ފުރިހަމަ އިހްސާސްކުރެވިއްޖެއެވެ. ހަޔާތުގެ މަގު ދެކަފިވެއްޖެއެވެ. އޭނާއަކަށް އެކަން ހަނދާންނައްތައެއް ނުލެވޭނެއެވެ. މުނީޒާއަކަށް އިތުބާރެއްވެސް ނުކުރެވޭނެއެވެ. އިތުބާރާއި ނުލައި ދިރިއުޅުން ކުރިޔަށް ގެންދާނެ ގޮތެއް އޭނާއަކަށް ނުވިސްނުނެވެ. ރައްޓެހިން ގާތުގައި ދެއްކިފައިވާ ވާހަކަތަކުގެ ސަބަބުން އެއިން މީހަކާއި މަޝްވަރާއެއްކޮށް ޚިޔާލެއް އަހާލާކަށްވެސް ސިޔާން އަކަށް ފުރުޞަތެއް ނެތެވެ.

ހަދާނެ ގޮތް ހުސްވެ ފިކުރު ބޮޑުވެފައި ސިޔާން އިންދާ އެތަނަށް މުނީޒާގެ ސްކޫލުދައުރުގެ ރައްޓެސެއް ކަމުގައިވާ ނިޔާމާ އައެވެ. ސިޔާން އޭނާ އިން މޭޒަށް ނިޔާމާ ގެނެސް ވާހަކަތައް ކިޔައިދިނެވެ. މުނީޒާ ބަދަލުވި ވާހަކައެވެ. މުޅިން އެހެން ގޮތަކަށް އުޅެންފެށިވާހަކައެވެ. އެވާހަކަތައް އަޑު އެހުމަށްފަހު ނިޔާމާފެށީ ހޭށެވެ. ސިޔާން ގާތަށް އަނެއްކާވެސް އައީ ރުޅިއެވެ.

ނިޔާމާ ސިޔާންއަށް ހުރިހާ ވާހަކައެއް ކިޔައިދިނެވެ. މުނީޒާ އެހެން މީހެއްގެ ގާތަށް ނުދާކަމާއި އެއީ ރޭވުމެއް ކަމެވެ. ސިޔާމްގެ ވިޔާނުދާ އުޅުން އިސްލާހްކުރުވުމަށް މުނީޒާ ބަދަލުވީ ކަމެވެ. އެހެން ނަމަވެސް އެއީ ހަމަ ހަޤީޤީ ބަދަލަކަށް ވެދާނެ ކަމުގެ ބިރު އޮތް ކަމަށާއި، ސްކޫލު ދައުރުއްސުރެ މުނީޒާ އާއި ހިތާވެގެން އުޅުނު ހަފީޒް މުނީޒާގެ ފަހަތުން އަޅުވާލެވޭތޯ އުޅޭވާހަކަވެސް ބުންޏެވެ. އަދި މުނީޒާ އަންނަނީ ސިޔާން އިސްލާހްނުވާނަމަ ހަފީޒްއާއި ގުޅެން ވިސްނަމުން ކަމުގައިވެސް ބުންޏެވެ.

ނިޔާމާއާއި ދެކެވުނު އެވާހަކަތަކަށްފަހު ސިޔާން އަވަސްއަވަހަށް ގެއަށް އައެވެ. ސިޔާން ކޮޓަރީގެ ދޮރު ހުޅުވާލި އިރު ބާރުބާރަށް އޭނާގެ ހިތްތެޅެމުން ދިޔައެވެ. މުނީޒާއާއި ކުރިމަތިލާނެ ގޮތެއް ނޭނގޭތީއެވެ. ވާހަކަ ފަށާނެ ކޮޅެއް ނޭނގޭތީއެވެ. ސިޔާން ކޮޓަރިއަށް ވަތްއިރު މުނީޒާއާއި ދަރިފުޅު އޮތީ ނިދާފައެވެ. ޝިޔާން މަޑުމަޑުން ގޮސް މުނީޒާގެ މަގަތުން އިށީނެވެ. އަދި މުނީޒާގެ މޫނަށް ބަލައިލިއެވެ. އެމޫނުގައިވާ މައުސޫމްކަށް ސިޔާންއަށް ފެނުނީ އަލަށެވެ. ސިޔާން ވިސްނާލިއެވެ.

ތެދެކެވެ. ދެކުދީން ލިބުނު ފަހުން މުނީޒާގެ ލޫޅާފަތިކަން ގެއްލިއްޖެއެވެ. މީހާގެ ސިފަ ބަދަލު ވެއްޖެއެވެ. އެކަމަކު އެއީވެސް ސިޔާން އަށްޓަކައި އޭނާގެ ދިރިއުޅުމާއި ހަށިގަނޑަށް އައި ބަދަލުކަން ސިޔާންއަށް އިހްސާސްވެއްޖެއެވެ. މުނީޒާއަށް ބޭނުންވާ ކަންކަން އެންމެ ފުރިހަމައަށް ސިޔާންއަކަށް ކޮށެއް ނުދެވެއެވެ. އޭނާބޭނުންވަނީ ކޮންކަމެއްތޯ ނުވަތަ ކޮން އެއްޗެއްތޯ އަހައި ނުލެވޭތާވެސް އަހަރުތަކެއް ވެއްޖެއެވެ. ހަރަދު ކުރާނެ ފައިސާވެސް މުނީޒާއަތަށް ނުދެވޭތާ ވީދުވަހެއް ސިޔާން އަކަށް ނޭނގުނެވެ. ގޭތެރެ ބެލެހެއްޓުމާއި ދަރީންގެ ކަންތައް ކުރުމުގައި އަވަދިނެތި އުޅެނީ މުނީޒާއެވެ. ސިޔާން އަށް ކުރެވުނުހާވެސް ހިލޭ އަންހެނުންނާއި އެކު މަޖާކުރުމެވެ.

މުނީޒާގެ މޫނަށް އެތައް އިރެއް ވާންދެން ބަލަށް ސިޔާން އިނެވެ. އެމޫނުގައިވާ ހުރިހާ ހިތާމައެއް އެއްފަހަރުން ދޭހަކުރެވޭތޯ އޭނާ މަސައްކަތް ކުރާ ކަހަލައެވެ. އޭނާގެ ހިތުގައި މުނީޒާއާއި މެދު އިންތިހާ ދަރަޖައިގެ ލޯތްބާއި ކުލުނު އަދިވެސް އެބައޮތްކަން އޭނާއަށް އެނގުނީ މިހާރުއެވެ. މުނީޒާ ވަރަށް ކެތްކޮށްފިއެވެ. އެތައް އަހަރެއް ވޭތުކޮށްފިއެވެ. އެކަމަކު އެންމެ ދުވަހަކު އަނގަ ހިމޭނުންލައިގެން ނުވަތަ އަތް އިސްނުކޮށް ސިޔާން އަކަށް ކެތެއް ނުކުރެވުނެވެ.

މުނީޒާ ކުއްލިއަކަށް ދެލޯ ހުޅުވާލިއެވެ. ސިޔާން ދިޔައީ ސިއްސައިގެންނެވެ. އޭނާ ހީކުރީ މުނީޒާ އޮތީ ނިދާފައިކަމަށެވެ.  އެކަމަކު އެހެނެއް ނޫނެވެ. މުނީޒާވެސް އޮތީ ސިޔާންއަށްޓަކައި ކުރާ އިންތިޒާރެއްގައެވެ. އެއަތުގެ ތެރޭގައި އޮވެލާނެ ވަގުތުކޮޅަކަށް އެދިއެދިއެވެ. ދެޖިސްމުގައިވާ ހޫނުކަމާއި ލޯބީގެ ރާހަތް ލިބުން އެދިއެދިއެވެ.

ސިޔާން މުނީޒާގެ ގާތުގައި އޮށޯތެވެ. އަދި މައާފަށް އެދުނެވެ. ކުރިޔަށް އޮތްތަނުގައި އިސްލާހްވެ ރަނގަޅު ގޮތުގައި އުޅުމަށް ވައުދުވެ އަޒުމު ކަނޑައެޅިއެވެ. ލޯބިވާ މީހަކު އެހެން މީހަކުގެ ގާތަށް ދިޔުމުން ކުރެވޭނެ އިހްސާސްތައް އޭނާއަށް ވިސްނިއްޖެއެވެ.

-ނިމުނީ-