އެމެރިކާގެ ކުރީގެ ރައީސް ޑޮނަލްޑް ޓްރަމޕްގެ ސަރުކާރުން، އިސްރާއީލުގެ ސިފައިން ހުޅަގު އައްސޭރީގައި ތިބޭތިބުން ސިފަކުރުމަށް ބޭނުން ކުރަމުން އައި ބަސްމަގު ބަދަލުކޮށް، އިސްރާއީލުގެ ބާރުގެ ދަށުގައި ހުޅަގު އައްސޭރި އޮންނަ އޮތުމަކީ، އިސްރާއީލުން ފަލަސްތީނުގެ ބިން ހިސޯރުކޮށްގެ ތިބޭ ތިބުމެއް ކަމުގައި ގަބޫލު ކުރާކަމަށް އެމެރިކާގެ މިހާރުގެ ރައީސް ޖޯ ބައިޑްގެ ސަރުކާރުން ހާމަ ކޮށްފިއެވެ.
ބައިންޑްންގެ ސަރުކާރުން މިކަން ސާފު ކޮށްދީފައި މިވަނީ، ދާދިފަހުން އެމެރިކާގެ ސަރުކާރުން ނެރުނު ރިޕޯޓެއްގައި، އިސްރާއިލުގެ ސިފައިން ފަލަސްތީނުގެ ބިންތަކުގައި ގަދަ ބާރުން ތިބޭތިބުން ސިފަކުރުމުގައި، "އިސްތިއުމާރު ކުރުން" މިބަސް މިނޫން މާނައެއްގައި ބޭނުން ކޮށްފައިވުމާއި ގުޅިގެން، މިކަން ސާފު ކޮށްދިނުމުގެ ގޮތުންނެވެ.
އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާން ނެޑް ޕްރައިސް ރިޕޯޓަރުންނަށް މައުލޫމާތު ދެމުން ވިދާޅުވެފައިވަނީ، އިންސާނީ ހައްގުތަކާ ގުޅޭގޮތުން އެ ޑިޕާޓްމަންޓުން ނެރުނު ރިޕޯޓުގައި "އޮކިއުޕޭޝަން" (ހިސޯރު ކޮށްގެ ތިބުން) މިބަސް ބޭނުން ކޮށްފައި ނުވިނަމަވެސް، އިސްރާއީލުގެ ސިފައިން ފަލަސްތީނުގެ ހުޅަގު އައްސޭރީގެ ބިންތަކުގައި ތިބޭ ތިބުމަށް އެއީ އިސްތިއުމާރު ކުރުން ކަމުގައި އެމެރިކާއިން ގަބޫލުކުރާ ކަމުގައެވެ.
"މިއީ އެމެރިކާގެ ސިޔާސީ ދެޕާޓީގެ، ފާއިތުވެ ހުރިހާ ސަރުކާރެއްގައިވެސް، އެތައް އަހަރެއްވަންދެން މިމައްސަލާގައި ދެކެމުން އައިސްފައިވާ ގޮތް،" ތަރުޖަމާ ވިދާޅުވިއެވެ.
އެހެންނަމަވެސް، އިސްރާއީލަށް އާދަޔާ ޚިލާފަށް ތާޢީދު ކޮށްފައިވާ އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި، ނެރެފައިވާ އިންސާނީ ހައްގުތަކާބެހޭ އަހަރި ރިޕޯޓުގައި، "އިސްރާއީލާއި އަދި ހިފާފައިވާ ބިންތަކުގައި" މިގޮތަށް ލިޔެފައިވާ އިބާރާތް ވަނީ "އިސްރާއީލާއި ހުޅަގު އައްސޭރި އަދި ގާޒާ" މި އިބާރާތަށް ބަދަލު ކޮށްފައެވެ.
ޖޯ ބައިޑްންގެ ސަރުކާރުގައި، އަންގާރަ ދުވަހު ނެރުނު އިންސާނީ ހައްގުތަކާބެހޭ ފުރަތަމަ ރިޕޯޓުގައި، ވަނީ، ޓްރަމްޕްގެ ސަރުކާރުގައި ނެރުނު ރިޕޯޓުގައި ހިމަނާފައިވާ ބަސްމަގު އެގޮތުގައި ބޭނުން ކޮށްފައެވެ. އެހެންނަމަވެސް ބައިޑްގެ ސަރުކާރުން ބުނެފައިވަނީ، ރިޕޯޓުގައި މި ބަސްމަގު ހިމަނާފައިވަނީ، މިމައްސަލާގައި އެމެރިކާގެ ނިންމުން ވަކިގޮތަކަށް ހާމަކުރުމުގެ މަގުސަދުގައި ނޫންކަމުގައެވެ.
އެމެރިކާގެ ސްޓޭޓްޓް ޑިޕާޓްމަންޓްގެ އިންސާނީ ހައްގުތަކާބެހޭ އިސް އޮފިޝަލެއްކަމުގައިވާ، ލީސާ ޕެޓަރސަން ވިދާޅުވެފައިވަނީ، މި ރިޕޯޓުގައި އާންމުގޮތެއްގައި ނަންތައް ބޭނުންކޮށްފައި ހުންނާނީ އުފެދުމުގައި ތަންތަނަށް ދީފައި ހުރި ނަންތައް ކަމަށާއި، މިގޮތުން، އިސްރާއީލު، ހުޅަގު އައްސޭރި އަދި ގާޒާ، މި ނަންތައް މިގޮތަށް ބޭނުން ކޮށްފައި ހުންނާނީ ކިޔުންތެރިންގެ ފަސޭހައަށްޓަކާ ކަމަށެވެ.
އެމެރިކާގެ ކުރީގެ ސެކެޓްރީ އޮފް ސްޓޭޓް މައިކް ޕޮމްޕެއޯވަނީ، ފާއިތުވެދިޔަ ތަނުގައި، ހިފާފައިވާ ބިންތަކުގައި އިސްރާއީލުން ގެތައް އިމާރާތް ކުރަމުންދާ ސަރަހައްދުތަކަށް އެމެރިކާ ސަރުކާރުގެ އެންމެ އިސް އޮފިޝަލުންގެތެރޭގައި ހިމެނޭ އޮފިޝަލަކު ޒިޔާރަތް ނުކުރުމަށް ގެންގުޅެމުން އައި ސަގާފަތް މުގުރާލުމަށްފަހު މި ސަރަހައްދަށް ޒިޔާރަތް ކޮށްފައެވެ.
އަދި މި ޒިޔާރަތުގައި ޕޮމްޕެއޯ ވިދާޅުވެފައިވަނީ، މި ސަރަހައްދުގައި އިސްރާއީލިން އަޅަމުން ގެންދާ ގެތަކަކީ ބައިނަލްއަގުވާމީ ގާނޫނުތަކާ ޚިލާފަށް އަޅަމުން ގެންދާ ގެތަކެއްކަމަށް އޭނާ ގަބޫލު ނުކުރައްވާ ކަމަށެވެ. އަދި ޓްރަމްޕް ވަނީ އޭނާގެ ވެރިކަމުގައި، މިސަރަހައްދު އިސްރާއީލުގެ ޗާޓާއި ގުޅުވާލުމަށް އިސްރާއީލުން ކުރަމުުންދާ މަސައްކަތްތަކަށް އެމެރިކާއިން ތާއީދު ކޮސްފާނެކަމުގެ ފެހި ސިގްނަލްވެސް ދެއްވާފައެވެ.
ޓްރަމްޕްގެ ވެރިކަމުގައި ވެރިކަމުގައި، އެމެރިކާއިންވަނީ، ޖެރޫސެލަމްއަކީ އިސްރާއީލުގެ ވެރިރަށުގެ ގޮތުގައި ގަބޫލު ކޮށްފައެވެ. އަދި މީގެ އިތުރުން، ގޯލާންގެ އުސް ބިންތައް ސީރިއާ އަތުން އަތުލާ އިސްރާއީލު ޗާޓާއި ގުޅުވާލުމަށްވެސް ޓްރަމްޕްގެ ވެރިކަމުގައި އެމެރިކާއިން ވަނީ ތާއީދު ކޮށްފައެވެ.
އެމެރިކާގެ މިހާރުގެ ސެކެޓްރީ އޮފް ސްޓޭޓް އެންތަނީ ބްލިންކަން ވިދާޅުވެފައިވަނީ، ޖެރޫސެލަމްއަކީ އިސްރާއީލުގެ ވެރިރަށުގެ ގޮތުގައި ޓްރަމްޕްގެ ސަރުކާރުން ނިންމާފައިވާ ނިންމުން މިހާރުގެ ސަރުކާރުން ބަދަލު ނުކޮށްފާނެ ކަމަށާއި އެހެންނަމަވެސް، ފަލަސްތީނުގެ މިނިވަން ދައުލަތެއް ގާއިމްކުރުމަށް އިތުރަށް މަސައްކަތް ކުރުމަށް މިސަރުކާރުން ބޭނުންވާ ކަމުގައެވެ.
