ސީރިއާގެ ހާލުގައިޖެހިފައިވާ ރައްޔިތުންނަށާއި އަދި 10 އަހަރުވީ އަހުލީ ހަގުރާމައިގެ ސަބަބުން ރެފިއުޖީންގެ ގޮތުގައި ދިރިއެޅެމުންދާ އެގައުމުގެ ރައްޔިތުންނަށް 600 މިލިއަން ޑޮލަރުގެ އިންސާނީ އެހީތެރިކަން ފޯރު ކޮށްދޭނެކަން، އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން އިއުލާން ކުރައްވައިފިއެވެ.
ބްލިންކަން އަންގާރަ ދުވަހު އިއުލާން ކުރައްވާފައިވާ ގޮތުގައި، އެމެރިކާއިން ސީރިއާއަށް ފޯރުކޮށްދޭ އެހީގެ އަދަދު 596 މިލިއަން ޑޮލަރަށް އަރާނެއެވެ.
އެމެރިކާއިން މި ފޯރުކޮށްދޭ އެހީން، އެހީތެރިކަން ފޯރު ކޮށްދޭނީ، މައިގަޑު ގޮތެއްގައި، ސީރިއާގެ އެތެރޭގައި ގެދޮރު ގެއްލިފައިވާ އެގައުމުގެ ރައްޔިތުންނަށެވެ. މި އަދަދު 13 މިލިއަން މީހުންނަށް އަރައެވެ.
ތުރުކީންވެސް ދަނީ، ސީރިއާގެ 4 މިލިއަން ރެފިއުޖީންނަށް އެހީތެރިކަން ފޯރުކޮށްދީ ބަލަހައްޓަމުންނެވެ. އަދި އިތުރު 2 މިލިއަން ރެފިއުޖީން ދިރި އުޅެމުންދަނީ އަވައްޓެރި ލުބުނާންގައެވެ. އަދި މީގެ އިތުރުން، އުރުދަން، އިރާގު، އަދި މިސްރުން ސީރިއާގެ އިތުރު 1 މިލިއަން ރެފިއުޖީންނަށް ބޯހިޔާވަހިކަން ފޯރުކޮށްދެމުން ދެއެވެ.
Today at #SyriaConf2021, I announced over $596 million in new humanitarian assistance to respond to the Syrian crisis.
We offer support to alleviate the suffering of the world’s most vulnerable people, and urge other donors to increase their contributions to these efforts. pic.twitter.com/HWitSNkv7x
— Ambassador Linda Thomas-Greenfield (@USAmbUN) March 30, 2021
"ސީރިއާގެ ރައްޔިތުންވަނީ، އަދަދު ނުކެރެވޭހާ ވޭނާ ހިތްދަތިކަން ތަހައްމަލް ކޮށްފައި. މީގެ ތެރޭގައި، އެގައުމުގެ ރައީސް އަސަދުގެ ސަރުކާރުންނާއި، ރަޝިއާއިން ބޮން އެޅުމުގެ ސަބަބުން ލިބެމުންދާ އަނިޔާތަކާއި، އައިސިސްގެ އަނިޔާވެރިކާމާއި، އަދި ކެމިކަލް ހަތިޔާރު އެގައުމުގެ ރައްޔިތުންނާއި ދެކޮޅަށް ބޭނުން ކުރުންވެސް ހިމެނޭ،" ސީރިއާއާއި އަދި ސަރަހައްދުގެ މުސްތަގުބަލާ ބެހޭގޮތުން ބާއްވަމުން ގެންދާ 5 ވަނަ ބްރަސަލްސް ކޮންފަރެންސްގައި ވާހަކަ ދައްކަވަމުން ބްލިންކަން ވިދާޅުވެފައި ވެއެވެ.
"މީގެ އިތުރުން، ކޮރަޕްޝަނާއި އަދި ބައްޝާރުލް އަސަދުގެ ސަރުކާރުން، ގައުމުގެ އިގްތިސާދު އެކަށީގެންވާ ގޮތެއްގައި މެނޭޖު ނުކުރުމުގެ ސަބަނުން، ސީރިއާއަށް ކުރިމަޔި ވެގެންގޮސްފައިވާ އިންސާނީ ކާރިސާގެ ހާލަތުވަނީ އިތުރަށް ގޯސްވެގެން ގޮސްފައި. އަދި ދުނިޔެއަށް އައި ކޯވިޑް19 ކާރިސާގެ ސަބަބުން މިހާލަތުވަނީ މިއަށްވުރެވެސް އިތުރަށް ގޯސްވެފަ." ބްލިންކަން ވިދާޅުވިއެވެ.
މި ބައްދަލުވުމުގައި ބްލިންކަން ވަނީ، އެހީތެރިކަން ފޯރުކޮށްދޭ ދުނިޔޭގެ އެހެން ޖަމްޢިއްޔާތަކުންވެސް މި މަސައްކަތުގައި އެހީތެރިކަން ފޯރިދިނުމަށް ގޮވާލައްވާފައެވެ.
