ބެންކް އޮފް މޯލްޑިވްސް މެދުވެރިކޮށް ދޫކޮށްފައިވާ ކޯވިޑް-19 ރިކަވަރީ ލޯނުތަކުގެ ގްރޭސް ޕީރިއަޑް އިތުރުކުރުމުގެ ފުރުސަތު ހުޅުވާލައިފި އެވެ.
ފިނޭންސް މިނިސްޓްރީން ކުރި އިޢުލާނެއްގައި ބުނީ ކޯވިޑް-19ގެ ސަބަބުން ދިވެހިރާއްޖޭގެ އިގުތިސާދަށް ކުރިމަތިވި ހީނަރުކަމުން އަރައިގަތުމަށް، ބީއެމްއެލް މެދުވެރިކޮށް ސަރުކާރުން ތަޢާރަފުކުރި ރިކަވަރީ ލޯނުތަކުގެ ގްރޭސް ޕީރިއަޑް 6 މަހުގެ މުއްދަތަކަށް އިތުރުކުރުމަށް ބޭނުންވާ ވިޔަފާރިތަކަށް، އެ ފުރުސަތު މިހާރު ހުޅުވާލާފައި ވާކަމަށެވެ.
މިފަދަ ލުޔެއް ދިނުމަށް ނިންމީ، މި ސްކީމަކީ ކޯވިޑް-19އާ ގުޅިގެން ވިޔަފާރިތަކަށް ވަރކިންގ ކެޕިޓަލް ފޯރުކޮށްދީ، އިގުތިސާދީ ދަތިކަމުން އަރައިގަތުމަށް އެހީތެރިވެދިނުމުގެ ގޮތުން ފެށި ސްކީމަކަށް ވެފައި، ލޯނު އަނބުރާ ދެއްކުމުގައިވެސް ލުއިފަސޭހަ ގޮތްތަކެއް ފަހިކޮށްދިނުމުގެ މަގުސަދުގައި ކަމަށް ފިނޭންސް މިނިސްޓްރީން ބުނެއެވެ.
ރިކަވަރީ ލޯނުތަކުގެ ގްރޭސް ޕީރިއަޑް މިހާތަނަށް ހަމަވެފައިވާ ވިޔަފާރި ތަކަށްވެސް އިތުރު 6 މަހުގެ މުއްދަތަކަށް ގްރޭސް ޕީރިއަޑް އިތުރުކޮށް، ޖުމްލަ 12 މަހުގެ ގްރޭސް ޕީރިއަޑްއަކަށް އެދުމުގެ ފުރުސަތު ވެސް އޮންނާނެ ކަމަށް މިނިސްޓރީން ބުނެއެވެ. އަދި ގްރޭސް ޕީރިއަޑް އިތުރުކުރުމަށް ހުށަހަޅާ ހުށަހެޅުންތައް ބަލައިގަތުމުގައި، ލޯން އިވެލުއޭޓްކުރުމުގައި ފިނޭންސް މިނިސްޓްރީންނާއި ބީއެމްއެލުން ގެންގުޅެފައިވާ މިންގަނޑުތަކަށް ބެލުމަށް މިނިސްޓްރީން ވަނީ ނިންމާފައެވެ.
ގްރޭސް ޕީރިއަޑް އިތުރުކުރުމަށް ބޭނުންވާ ފަރާތްތަކުން އެފަރާތުގެ ލޯނުގެ ގްރޭސް ޕީރިއަޑް ހަމަވުމުގެ 30 (ތިރީސް) ދުވަސް ކުރިން ބީ.އެމް.އެލް އަށް އީމެއިލް މެދުވެރިކޮށް އަންގަންޖެހެއެވެ. އަދި ލޯން ސްކީމްގެ ދަށުން ލިބޭ 6 މަހުގެ ގްރޭސް ޕީރިއަޑް ހަމަވެފައި، ނުވަތަ 30 ދުވަސް ނުވަތަ އެއަށްވުރެ ކުރު މުއްދަތަކަށް ވެފައިވާނަމަ، 01 އޭޕްރިލް 2021 ގެ ކުރިން ބީއެމްއެލަށް އެންގުމަށްވެސް މިނިސްޓްރީން ވަނީ އެދިފައެވެ.
ގްރޭސް ޕީރިއަޑް އިތުރުކުރުމަށް އެދި އީމެއިލް ކުރާނީ [email protected] އަށެވެ.
ބީއެމްއެލް މެދުވެރިކޮށް ކޯވިޑް-19 ރިކަވަރީ ލޯނުގެ ގޮތުގައި 419 ވިޔަފާރިއަކަށް 585.9 މިލިއަން ރުފިޔާއާއި 8 މިލިއަން ޑޮލަރު ސަރުކާރުން، ޖަނަވަރީ މަހުގެ ނިޔަލަށް ވަނީ ދޫކޮށްފައެވެ.
ކޮމެންޓު ފޮނުވާ