ރާއްޖޭގައި މަސައްކަތްކުރާ ބަންގްލަދޭޝް ރައްޔިތުންނަށް ގައުމަށް ފައިސާ ފޮނުވުން ފަސޭހަ ކުރުމަށް ބަންގްލަދޭޝް ބޭންކުން އިސްނަގައިފި އެވެ. މި މަޤްޞަދުގައި އެ ގައުމުގެ ބޭންކުތަކުގެ ގޮފިތައް ރާއްޖޭގައި ހުޅުވުމަށް ބަންގްލަދޭޝް ބޭންކުން ހުށަހަޅައިފި އެވެ.
ބަންގްލަދޭޝްގެ ދައުލަތުގެ ނޫސް އޭޖެންސީ ބީއެސްއެސްއިން ރިޕޯޓުކުރި ގޮތުގައި، މިކަމުގައި އެއްބާރުލުން ހޯދުމަށް ބަންގްލަދޭޝް ބޭންކުގެ ގަވަރުނަރު މުހައްމަދު މުސްތާގުރު ރަހުމާން، އެމްއެމްއޭގެ ގަވަރުނަރު އަހުމަދު މުނައްވަރަށް ސިޓީއެއް ފޮނުއްވާފައިވެ އެވެ. ސިޓީ ފޮނުއްވީ މި މަހުގެ 8 ވަނަ ދުވަހު އެވެ. އެ ގައުމުގެ އަމިއްލަ ބޭންކުތަކުން ރާއްޖޭގައި ގޮފިތައް ހުޅުވުމާ ބެހޭ ފީސިބިލިޓީ ދިރާސާތައް ވެސް ވަނީ ނިންމާފައެވެ. އެ ބޭންކުތަކުގެ ތެރޭގައި ބްރެކް ބޭންކާއި ނޭޝަނަލް ބޭންކް ހިމެނެ އެވެ. ބަންގްލަދޭޝް ބޭންކުގެ އިސް އޮފިޝަލަކު ވިދާޅުވީ، އިންޑިއާ، ސްރީލަންކާ އަދި ޕާކިސްތާނުގެ ބޭންކުތައް ރާއްޖޭގައި ހިންގަމުން ދާ ކަމަށެވެ. އެހެންކަމުން ބަންގްލަދޭޝްގެ ބޭންކުތަކަށް ވެސް އެ ފުރުސަތު ލިބެން ޖެހޭ ކަމަށް އެ އޮފިޝަލް ވިދާޅުވި އެވެ.
މި ފިޔަވަޅު އަޅަން ނިންމީ ރާއްޖެއިން ރަސްމީ ގޮތުން ބަންގްލަދޭޝަށް ފޮނުވާ ފައިސާ ފާހަގަކުރެވޭ މިންވަރަކަށް މަދުވެފައިވާތީ އެވެ. 2024-2025 ގައި 141.1 މިލިއަން ޑޮލަރު ފޮނުވި އެވެ. 2025-2026 ގައި އެ އަދަދު 16.4 ޕަސެންޓް ދަށަށް ގޮސް 118 މިލިއަން ޑޮލަރަށް ވެއްޓިފައިވެ އެވެ. ރާއްޖޭގައި 100,000 އަށް ވުރެ ގިނަ ބަންގްލަދޭޝް ރައްޔިތުން މަސައްކަތް ކުރެ އެވެ. ބޭންކުތަކާއި ފައިސާ ފޮނުވާ އޭޖެންސީތަކުން ރުފިޔާ ބަލައިނުގަންނާތީ، މީގެ ތެރެއިން ގިނަ ބަޔަކު ކަޅު ބާޒާރުން ބޮޑު އަގުގައި ޑޮލަރު ގަނެ އެވެ. އަދި ހުންޑީ ފަދަ ނުރަސްމީ ގޮތްތަކުން ފައިސާ ފޮނުވަމުން ދެ އެވެ.
ބަންގްލަދޭޝް ބޭންކުން މީގެ ކުރިން ވެސް ހުށަހެޅުންތަކެއް ވަނީ ހުށަހަޅާފައެވެ. އޭގެ ތެރޭގައި އޭޝިއަން ކްލިއަރިންގ ޔޫނިއަން މެދުވެރިކޮށް ރުފިޔާއިން ފައިސާ ފޮނުވުން ހިމެނެ އެވެ. އަދި ދެ ގައުމުގެ މަރުކަޒީ ބޭންކުތަކުގެ މެދުގައި ކަރަންސީ ސްވޮޕް އެއްބަސްވުމެއް ހެދުން ވެސް ހިމެނެ އެވެ. އެމްއެމްއޭގެ ޖަވާބަށް މިހާރު އިންތިޒާރުކުރަމުން ދާ ކަމަށް އެ ބޭންކުން ބުނެފި އެވެ. ފަންނީ މަޝްވަރާތަކަށް ހާއްސަ ވަފުދެއް ފޮނުވަން ތައްޔާރު ކަމަށް ވެސް އެ ބޭންކުން ބުނެފައިވެ އެވެ.
ކޮމެންޓު ފޮނުވާ