އަމިއްލަ އާއިލާގެ މީހުންނަށް ބަޔަކު ވަޅިން ބިރުދައްކައި ފޭރުނު މައްސަލައެއްގައި ބައިވެރިވި ކަމުގެ ތުހުމަތުގައި ހއ. ހޯރަފުށި، ލިލީޒް، ޒާހިރު ޢަލީދީދީ (44) ހައްޔަރުކޮށް، ކްރިމިނަލް ކޯޓުން މީނާގެ ބަންދު 15 ދުވަހަށް ޖަހައިފި އެވެ.
ފުލުހުން މީނާގެ މައްޗަށް ކުރަނީ ބިރުދެއްކުމާއި، ހުއްދަ ނޫން ގޮތުގައި މީހުން ހިފަހެއްޓުމުގެ ތުހުމަތެވެ. ކޯޓު އަމުރުގައިވާ ގޮތުން، ހާދިސާގެ ކުރިން ފޭރުނު މީހުންނާއެކު މީނާ ހަރަކާތްތެރިވެ، އެމީހުން މީނާއާއެކު އޭނާގެ ގެއަށް ގޮސްފައިވެ އެވެ. ފޭރުމަށްފަހު ހައްޔަރުކުރެވެންދެން މީނާ ގެއަށް އެނބުރި ނުދާ ކަމަށާއި، އަމަލުގައި ބައިވެރިވި މީހަކު ހައްޔަރުކުރަން ހިންގި އޮޕަރޭޝަނެއްގައި އެ މީހާއާއެކު މީނާ ހުއްޓައި ހައްޔަރުކުރީ ކަމަށް ފުލުހުން ބުނެ އެވެ.
ބަންދުގެ މަޖިލީހުގައި ދިފާއުގައި ވާހަކަ ދައްކަމުން މީނާ ބުނީ، ފޭރުނު ބަޔަކީ ގޭމެއް ކުޅެމުން ދިމާވި މީހުންކަމަށާއި، އެމީހުން މީނާ ހިފަހައްޓައި ގޭގެ ތަޅުދަނޑި ނަގައިގެން ގޮސް ގޭ މީހުން ފޭރުނީ ކަމަށެވެ. އެމީހުންނާ އެއްވެސް ގުޅުމެއް ނެތް ކަމަށްވެސް މީނާ ކޯޓަށް ބުނެފައިވެ އެވެ.
ކޮމެންޓު ފޮނުވާ