ފުށިދިއްގަރުފަޅުގައި ހިންގާ ރަސްމާލޭ މަޝްރޫޢާ ގުޅޭ މުޢާމަލާތްތައް ހާމަކުރުމަށް، އެމްޑީޕީގެ ކުރީގެ ރައީސް އަބްދުﷲ ޝާހިދު ސަރުކާރަށް ގޮވާލައްވައިފިއެވެ.
ޝާހިދު މިކަމަށް ގޮވާލެއްވީ އެމްޑީޕީގެ ފަސްވަނަ ކޮންގްރެސްގައި ވާހަކަފުޅު ދައްކަވަމުންނެވެ. ރަސްމާލެއާއި، ދިވެހި ދައުލަތާ ބޭރުގެ ބޮޑެތި ކުންފުނިތަކާއި ދައުލަތްތަކާ ވެވޭ އެއްބަސްވުންތައް ސިއްރުނުކޮށް ހާމަކުރަން ޖެހޭ ކަމަށާއި، ރައްޔިތުންގެ އިތުބާރު ލިބޭނީ ހާމަކަން ބޮޑުކުރާ ވަރަކަށް ކަމަށް އެމަނިކުފާނު ވިދާޅުވިއެވެ.
ފުށިދިއްގަރުފަޅުގެ މަޝްރޫޢުގެ އެގްރީމެންޓްގައި ސޮއިކުރި ކަމަށް ސަރުކާރުން ބުނި ނަމަވެސް، ޓްރާންސްޕޭރަންސީއާއި ގުޑް ގަވަރނަންސްގެ ކަންފުޅެއް ސަރުކާރުގައި ނެތުމުން، އެ އެގްރީމެންޓްގައި އޮތް އެއްޗެއް ނެތް އެއްޗެއް އެނގޭ މީހަކު ނެތް ކަމަށް ޝާހިދު ވިދާޅުވިއެވެ.
ފުށިދިއްގަރުފަޅު ހިއްކުމާ ގުޅޭ މުޢާމަލާތްތަކުގައި ފުރަތަމަ ފެށުމުން ފެށިގެން އޮޅުވާލުން ހިމެނޭ ކަމަށް ޝާހިދު ވިދާޅުވިއެވެ. ފަޅު ހިއްކުމުގައްޔާއި، ފައިސާ ޚަރަދުކުރި ގޮތުގައްޔާއި، ފަޅަށް ކިޔާ ނަމުގައްޔާއި، ފަޅު ދިން ގޮތުގައްޔާއި، ދިން އެގްރީމެންޓްގައިވެސް އޮޅުވާލާފައިވާ ކަމަށް އެމަނިކުފާނު ވިދާޅުވިއެވެ. އިވޭ އަޑުތަކަށް ބަލާއިރު މިއީ "ޑިސެޕްޓަސް އަބް އިނީޝިއޯ" އެގްރީމެންޓެއް ކަމަށާއި، ކުރިން ސަރުކާރުގެ ބޭފުޅުން ދަސްކޮށްދެއްވި "ވޮއިޑް އަބް އިނީޝިއޯ" ގެ "އެއްބަނޑު ޓްވިންސް" ކަމަށްވެސް ޝާހިދު ސިފަކުރެއްވިއެވެ.
މުޢާމަލާތްތައް ހާމަނުކުރުމުން ރައްޔިތުންނަށް ޖެހިފައިވަނީ ސްޕެކިއުލޭޓް ކުރަން ކަމަށާއި، އޭގެ ނަތީޖާއަކަށް އެކުވެރި ދައުލަތަކާ މޫނުކެނޑުން ވެދާނެ ކަމަށް ޝާހިދު އިންޒާރުދެއްވިއެވެ. ސަރުކާރުން ދައްކާ ވާހަކަ ޤަބޫލުކުރުން ހެޔޮނުވާނެ ކަމަށް ވިދާޅުވެ، މިފަދަ ކަންކަމުން ސަލާމަތްވުމަށް އެމްޑީޕީ އެކަތިގަނޑެއްގެ ގޮތުގައި ތަރުތީބުވުން އަވަސްކުރަން ޖެހޭ ކަމަށްވެސް އެމަނިކުފާނު ވިދާޅުވިއެވެ.
ކޮމެންޓު ފޮނުވާ