ޑިގްރީއެއް އޮތްކަން ބެލޭނެ ނިޒާމެއް ނެތުމުން ދެވަނަ ޑިގްރީއަށް ވެސް ސަރުކާރުން ފައިސާ ދައްކާފައިވޭ: އޮޑިޓް

ސަރުކާރުގެ ހިލޭ ފުރަތަމަ ޑިގްރީ ސްކީމުގެ ދަށުން، ކުރިން ޑިގްރީއެއް ފުރިހަމަކޮށްފައިވާ 271 މީހަކަށް އިތުރު ޑިގްރީއެއް ހެދުމުގެ ފުރުސަތު ދީފައިވާކަން އޮޑިޓަރ ޖެނެރަލްގެ އޮފީހުން މިއަދު ނެރުނު ރިޕޯޓަކުން ހާމަވެއްޖެއެވެ.

އެ ސްކީމުގެ ޕާފޯމަންސް އޮޑިޓް ރިޕޯޓުގައިވާ ގޮތުން، މިކަން ހިނގާފައިވަނީ ސްކީމަށް ވަންނަ ދަރިވަރުންނަކީ ކުރިން ޑިގްރީ ހަދާފައިވާ މީހުންތޯ ޔަގީންކުރާނެ ނިޒާމެއް ނެތުމުންނެވެ. މި 271 މީހުންގެ ކިޔެވުމަށް ސަރުކާރުން 9.3 މިލިއަން ރުފިޔާ ޚަރަދުކޮށްފައިވެއެވެ.

ރާއްޖޭގައި ބިދޭސީން އެންމެ ގިނައިން މަސައްކަތްކުރާ ދާއިރާތަކުން ކިޔަވާ ދަރިވަރުންގެ އަދަދު މަދުކަމާއި، ފިރިހެނުންގެ މެދުގައި ގަބޫލު ވޮކޭޝަނަލް ތަމްރީން ޕްރޮގްރާމުތައް ސްކީމުގައި ނުހިމެނޭކަން ވެސް ރިޕޯޓުގައި ފާހަގަކޮށްފައިވެއެވެ. އަދި ދަރިވަރުން އަމިއްލަ ޖީބުން 60,000 ރުފިޔާއަށްވުރެ ގިނައިން ދައްކަންޖެހޭ ޕްރޮގްރާމުތަކުގެ ނިސްބަތް 15 ޕަސެންޓުން 46 ޕަސެންޓަށް މައްޗަށް ގޮސްފައިވެއެވެ.

މި މައްސަލަތައް ހައްލުކުރުމަށް، ދަރިވަރުންނާއި ކޯސް ދޫކޮށްލާ މީހުންގެ މަޢުލޫމާތު ބެލެހެއްޓޭނެ ނިޒާމެއް ގާއިމުކޮށް، ކިޔެވުން ހުއްޓާލި މީހުންނަށް ޚަރަދުކުރި ފައިސާ އަނބުރާ ހޯދުމަށް އޮޑިޓަރ ޖެނެރަލް ލަފާދީފައިވެއެވެ. މީގެ އިތުރުން، ޤައުމަށް އެންމެ ބޭނުންވާ ދާއިރާތަކަށް އިސްކަންދީ، ވޮކޭޝަނަލް ތަމްރީން ހިމެނޭގޮތަށް ސްކީމު އިސްލާހުކުރުމަށް ވެސް ލަފާދީފައިވެއެވެ.