އީގަލް ހިލްސް އެއްބަސްވުމުގެ ސަބަބުން ސަރުކާރަށް ލޯނެއް ނަގަން ނުޖެހޭނެ: ހައުސިން މިނިސްޓަރު

ރަސްމާލޭގައި ވޯޓަރފްރަންޓަކާއި މެރީނާއެއް ތަރައްގީކުރުމަށް ޔޫއޭއީގެ އީގަލް ހިލްސް ކުންފުންޏާ ހަވާލުކުރުމާ ގުޅިގެން ކުރެވެމުންދާ ފާޑުކިއުންތަކަށް ހައުސިން މިނިސްޓަރު ޑރ. އަބްދުﷲ މުއްތަލިބު ޖަވާބުދެއްވައިފިއެވެ. ލިންކްޑްއިންގައި ޝާއިއުކުރެއްވި ލިޔުމެއްގައި މިނިސްޓަރު ވިދާޅުވީ، ދުބާއީގައި ސޮއިކުރެވުނު މި އެއްބަސްވުމުން ސަރުކާރަށް ލިބޭ ފައިދާއަކީ އެއްފަހަރު ލިބޭ ފައިސާއެއް ނޫން ކަމަށާއި، އެއްބަސްވުން ހަދާފައިވަނީ ދައުލަތަށް ދެމެހެއްޓެނިވި ގޮތެއްގައި އާމްދަނީ ލިބޭ ގޮތަށް ކަމަށެވެ.

މިނިސްޓަރު ވިދާޅުވި ގޮތުގައި، ޓީޖީއެސްޓީއާ އެކު މާސްޓަރ ޑިވެލޮޕަރުގެ އާމްދަނީގެ 10 އިންސައްތަ އަދި ކޮންމެ މުދާ ގަނެވިއްކުމަކުން 4 އިންސައްތަ ދައުލަތަށް ލިބޭނެއެވެ. މަޝްރޫއުގެ ފައިސާ ދައުރުވާނީ ރާއްޖޭގެ އެސްކްރޯ އެކައުންޓަކާއި ދިވެހި ބޭންކުތައް މެދުވެރިކޮށް ކަމަށާއި، ސަރުކާރުން ލޯނެއް ނަގަން ނުވަތަ ސޮވެރިން ގެރެންޓީއެއް ދޭން ނުޖެހޭނެ ކަމަށާއި، ޓެކުހުގެ ލުޔެއް ވެސް ނުދެވޭނެ ކަމަށް މިނިސްޓަރު ވިދާޅުވިއެވެ.

މަޝްރޫއު ނިމުމުން އަހަރަކު މަދުވެގެން އެއް މިލިއަން ފަތުރުވެރިން ޒިޔާރަތްކުރާނެ ކަމަށާއި، ދައުލަތަށް 11 ބިލިއަން ޑޮލަރަށް ވުރެ ގިނަ އާމްދަނީއާއި 54،000 އަށް ވުރެ ގިނަ ވަޒީފާ އުފެދޭނެ ކަމަށް މިނިސްޓަރު ލަފާކުރެއްވިއެވެ. މީގެ އިތުރުން، ސަރުކާރުގެ ބަޖެޓުން ހަރަދެއް ނުކޮށް ހުޅުމާލޭގައި 3 ކޮޓަރީގެ 5،000 އެޕާޓްމަންޓް މި އެއްބަސްވުމުގެ ދަށުން އަޅާނެއެވެ.

ރަސްމާލޭގައި ފްރީހޯލްޑް މިލްކުވެރިކަމެއް ނުދެވޭނެ ކަމަށާއި، އެތަނުގައި ހިނގާނީ ދިވެހި ގާނޫނު ކަމަށް މިނިސްޓަރު ކަށަވަރުކޮށްދެއްވިއެވެ. މުދާ ގަތުމުން ބޭރުމީހުންނަށް ދާއިމީ ރެޒިޑެންސީ ނުވަތަ ރައްޔިތުކަން ނުލިބޭނެ ކަމަށާއި، ރަސްމާލޭގެ 500 ހެކްޓަރު ދިވެހިންނަށް ޚާއްސަކޮށް، 150،000 އަށް ވުރެ ގިނަ މީހުންނަށް ބޯހިޔާވަހިކަން ފޯރުކޮށްދެވޭނެ ކަމަށް ވެސް މިނިސްޓަރު ވިދާޅުވިއެވެ.