ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައި ކުރީގެ ރައީސް އިބްރާހީމް މުހައްމަދު ސޯލިހު އެމްޑީޕީގެ ޓިކެޓަށް ވާދަކުރައްވަންވީ ސަބަބެއް ވިސްނިވަޑައި ނުގަންނަވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެސްއެސްޓީވީގެ "ބާރުހަތަރެއް" ޕްރޮގުރާމުގައި ވާހަކަ ދައްކަވަމުން ނަޝީދު ވިދާޅުވީ، އެ މަނިކުފާނު ވެރިކަމަށް ގެންނެވުމަށް ތާއިދު ކުރައްވާ މީހުން މަދު ނޫން ނަމަވެސް، މި ފަހަރު އެ މަނިކުފާނުގެ ތާއިދު ފުރިހަމައަށް އޮތީ އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލަށް ކަމަށެވެ. އަދި ރިޔާސީ ޓިކެޓަށް ސޯލިހު ވާދަކުރެއްވިޔަސް، އެ ނިންމެވުމަށް އެއްވެސް ބަދަލެއް ނާންނާނެ ކަމަށް ވިދާޅުވިއެވެ.
"ކޮންމެ ބޭފުޅަކު [ވެރިކަމުގެ ޓިކެޓަށް] ކުރިމަތިލި ނަމަވެސް އަޅުގަނޑު ހުންނަ ގޮތުގައި އަޅުގަނޑު ހުންނާނީ. ނޫން، އަޅުގަނޑު މި ހުރީ ފައްޔާޒަށް ތާއިދު ކޮށްގެން،" ނަޝީދު ވިދާޅުވިއެވެ.
ސޯލިހު ރިޔާސީ ޓިކެޓަށް ވާދަކުރައްވާނަމަ، ވޯޓު ކަރުދާހުގައި އެ މަނިކުފާނުގެ ނަން އޮންނާނެތޯ ސުވާލު ކުރެއްވުމުން ވެސް ނަޝީދު ވިދާޅުވީ، އެ މަގާމަށް ސޯލިހު ވާދަކުރައްވަންވީ ސަބަބެއް ވިސްނިވަޑައި ނުގަންނަވާ ކަމަށެވެ.
ނަޝީދު މިފަދައިން ވިދާޅުވެފައި މިވަނީ، ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ޓިކެޓަށް އެ މަނިކުފާނު ވާދަކުރެއްވުމަށް ޕާޓީގެ ގިނަ މެންބަރުން ގޮވާލަމުންދާ ކަމުގެ އަޑުތައް ފެތުރިފައިވާ ދަނޑިވަޅެއްގައެވެ.
މީގެ ކުރިން އެކަކު އަނެކަކަށް ބަހުގެ ހޫނު ހަމަލާތަކެއް ރައްދު ކުރެއްވި ނަޝީދާއި ފައްޔާޒު އެކުގައި މަސައްކަތް ކުރައްވާތާ މިހާރު އަހަރަކަށްވުރެ ގިނަ ދުވަސް ވެއްޖެއެވެ. އެ ދެ ބޭފުޅުން ވަނީ "ބޮޑު ބަދަލު"ގެ ނަމުގައި ގާނޫނުއަސާސީއާއި ވެރިކަން ހިންގުމުގެ ނިޒާމަށް ގެންނަން ޖެހޭ ކަމަށް ފެނިވަޑައިގަންނަވާ ބަދަލުތަކެއް ވެސް ހުށަހަޅުއްވައިފައެވެ. އޭގެ ތެރޭގައި ދައުލަތުގެ އެންމެ އިސްވެރިޔާއާއި ސަރުކާރުގެ އިސްވެރިޔާއަކީ ދެ ބޭފުޅެއް ކަމުގައި ހަމަޖެއްސުމުގެ އިތުރުން، ރައްޔިތުންގެ މަޖިލީހާއި މިނިވަން މުއައްސަސާތަކާ ގުޅޭ ބޮޑެތި ބަދަލުތައް ވެސް ހިމެނެއެވެ.
ފައްޔާޒުގެ ޓިކެޓަށް ނަޝީދު ތާއިދު ކުރައްވާކަން ކުރިން އިއުލާނު ކުރައްވާފައިވާ އިރު، އެމްޑީޕީގެ ރިޔާސީ ޓިކެޓަށް ވާދަކުރައްވާ ބޭފުޅުންގެ ތެރޭގައި އެ ޕާޓީގެ ކުރީގެ ރައީސް އަބްދުﷲ ޝާހިދާއި ކުރީގެ ނައިބު ރައީސް ފައިސަލް ނަސީމު ވެސް ހިމެނިވަޑައިގަންނަވާ ކަމުގެ އަޑުތައް ވަނީ ފެތުރިފައެވެ.
ކޮމެންޓު ފޮނުވާ