ދުނިޔޭގެ އެންމެ ދޮށީ މީހާ ކަމަށްވާ އިނގިރޭސިވިލާތުގެ އެތެލް ކެޓަހަމް، ހުކުރު ދުވަހު އޭނާގެ 117 ވަނަ އުފަން ދުވަސް ފާހަގަކޮށްފި އެވެ.
ލަންޑަނުން ބޭރުގައި ގާތްގަނޑަކަށް 25 މޭލު ދުރުގައި އޮންނަ ސަރީގެ ކެއާ ހޯމެއްގައި ދިރިއުޅޭ ކެޓަހަމް އަކީ 117 އަހަރު ވަންދެން ދިރިހުރި އިނގިރޭސިވިލާތުގެ ފުރަތަމަ މީހާ ކަމަށް، ގިނިސް ވޯލްޑް ރެކޯޑްސް (ޖީޑަބްލިއުއާރް) އިން ބުނެއެވެ.
"އަހަރެންގެ އާއިލާއާއި ރަހްމަތްތެރިންނާ އެކު ވަރަށް ފުރިހަމަ ދުވަހެއް ފާހަގަކުރެވިއްޖެ. އަދި އަންނަ އަހަރު ދިމާވާނެ ކަންތައްތައް ދެކިލުމަށް އަހަރެން އިންތިޒާރު ކުރަން،" ކެޓަހަމް އިނގިރޭސިވިލާތުގެ ޕީއޭ މީޑިއާއަށް ބުންޏެވެ.
ދުނިޔޭގެ އެންމެ ދޮށީ ފިރިހެނާ، ބްރެޒިލްގެ ޖުއާއޯ މާރީނިއޯ ނޭޓޯ ވެސް އޭނާ ދިރިއުޅޭ ބްރެޒިލުން ކެޓަހަމް އަށް އުފާވެރި އުފަން ދުވަހެއްގެ ތަހުނިޔާ ފޮނުވި ކަމަށް ޖީޑަބްލިއުއާރް އިން ރިޕޯޓް ކުރެއެވެ.
ކެޓަހަމްގެ 116 ވަނަ އުފަން ދުވަހަށްފަހު، މިދިޔަ އަހަރުގެ ސެޕްޓެމްބަރު މަހު ރަސްގެފާނު ޗާލްސް، އޭނާއާ ބައްދަލުކުރައްވާފައިވެއެވެ. އެ ބައްދަލުވުމުގައި، ޗާލްސްގެ އުމުރުފުޅުން 21 އަހަރުގައި 1969 ވަނަ އަހަރު ޕްރިންސް އޮފް ވޭލްސްގެ މަގާމަށް އިސްކުރި ހަނދާން އައުކޮށް، "އޭރު ހުރިހާ އަންހެން ކުދިން މަނިކުފާނުދެކެ ލޯބިވި، އަދި މަނިކުފާނާ ކައިވެނިކުރަން ބޭނުންވި" ކަމަށް ކެޓަހަމް ޗާލްސްއަށް ދެންނެވިއެވެ.
ކެޓަހަމް ދިރިހުރި 117 އަހަރު ދުވަހުގެ ތެރޭގައި ދެ ބޮޑު ހަނގުރާމަ، ޓައިޓޭނިކް އަޑިއަށްދިޔުން، ރަޝިޔާގެ އިންގިލާބު އަދި ކޮވިޑް-19 ބަލިމަޑުކަން ފަދަ ބޮޑެތި ހާދިސާތައް ދުނިޔެއަށް ކުރިމަތިވެފައިވެއެވެ. އުމުރުން 110 އަހަރުގައި 2020 ވަނަ އަހަރު ކޮވިޑް ޖެހި، އެ ބަލިން ސަލާމަތްވި އެންމެ ދޮށީ މީހުންގެ ތެރޭގައި ކެޓަހަމް ހިމެނޭ ކަމަށް ޖީޑަބްލިއުއާރް އިން ބުނެއެވެ.
1909 ވަނަ އަހަރުގެ އޮގަސްޓް 21 ވަނަ ދުވަހު އިނގިރޭސިވިލާތުގެ ދެކުނުގައި އޮންނަ ހެމްޕްޝަޔާގެ ޝިޕްޓަން ބެލިންޖާގައި، އަށް ކުދިންގެ ތެރެއިން ދެވަނައަށް ހަނގު ކުއްޖެއްގެ ގޮތުގައި އުފަންވި ކެޓަހަމް އަކީ، ރަސްގެފާނު ހަތްވަނަ އެޑްވަޑްގެ ވެރިކަމުގައި އުފަންވި މީހުންގެ ތެރެއިން ދިރިހުރި އެންމެ ފަހު މީހާއެވެ.
އުމުރުން 18 އަހަރުގައި، ކެޓަހަމް އެކަނިމާއެކަނި އިންޑިއާއަށް ދަތުރުކޮށް، އަސްކަރީ އާއިލާއެއްގެ ކުދިން ބެލެހެއްޓުމުގެ މަސައްކަތް ކުރިއެވެ. ފަހުން 1931 ވަނަ އަހަރު ޑިނާ ޕާޓީއެއްގައި އިނގިރޭސި އަސްކަރިއްޔާގެ މޭޖަރ ނޯމަން ކެޓަހަމް އާ ބައްދަލުވެ، ދެ އަހަރު ފަހުން ދެ މީހުން ކައިވެނިކުރިއެވެ.
ބޭރު ގައުމުތަކަށް ބަދަލުވުމުގެ ކުރިން، އެ ދެމަފިރިން ސޯލްސްބަރީގައި ދިރިއުޅުއްވިއެވެ. ފަހުން ހޮންގކޮންގ އަށް ބަދަލުވެ، ކެޓަހަމް އެތަނުގައި ކިންޑަގާޓަން އެއް ހުޅުވިއެވެ. އޭގެފަހުން އިނގިރޭސިވިލާތަށް އެނބުރި ގޮސް، ދެ އަންހެން ކުދިން ބޮޑުކުރިއެވެ. ނަމަވެސް އެ ދެ ދަރިން ވެސް މިހާރު ވަނީ މަރުވެފައެވެ. ފިރިމީހާ މަރުވީ 1976 ވަނަ އަހަރުއެވެ. ކެޓަހަމްގެ ތިން ކާފަދަރި އަދި ފަސް މުނިކާފަދަރި ދުނިޔޭގައި އެބަތިއްބެވެ.
ކެޓަހަމް މިހާ ދޮށީ އުމުރަކާ ހަމައަށް ދިޔަނަމަވެސް، ކަށަވަރުކުރެވިފައިވާ އިންސާނުންގެ އެންމެ ދިގު ދިރިއުޅުމުގެ ރެކޯޑަކާ ހަމައަށް ދިޔުމަށް އޭނާއަށް އަދި ދުވަސްކޮޅެއް ބާކީ އެބައޮތެވެ. އެ ރެކޯޑް މިހާރު އޮތީ ފަރަންސޭސިވިލާތުގެ ޖޭން ކަލްމަންޓަށެވެ. އޭނާ 1997 ވަނަ އަހަރު ދުނިޔެ ދޫކުރީ 122 އަހަރާއި 164 ދުވަހުގައެވެ.
ކޮމެންޓު ފޮނުވާ