އުމުރުން 13 އަހަރު ނުފުރޭ ކުދިންނަށް ސޯޝަލް މީޑިއާ ބޭނުންކުރެވޭނީ ހަމައެކަނި ބެލެނިވެރިންގެ ބެލުމުގެ ދަށުން ވަކި ވަގުތުތަކެއްގައި ކަމަށް ހަމަޖައްސާ ގާނޫނެއް ފާސްކުރުމަށް ޔޫރަޕިއަން ޔޫނިއަން (އީޔޫ) އިން ތައްޔާރުވެއްޖެ އެވެ.
ޔޫރަޕިއަން ކޮމިޝަނުގެ ރައީސް އުރުސުލާ ފޮން ޑެއިލަޔަން އިއްޔެ ބްރަސަލްސްގައި ވިދާޅުވީ، އޮންލައިން މާހައުލުގައި ޒުވާން ޖީލު ރައްކާތެރި ކުރުމަށްޓަކައި އީޔޫން މިހާތަނަށް ހިންގާ އެންމެ ބޮޑު މަޝްރޫއު ފެށުމުގެ ގޮތުން، މި ފިޔަވަޅުތައް އެޅުމަށް ތައްޔާރުވެފައިވާ ކަމަށެވެ.
ފޮން ޑެއިލަޔަން ސިފަކުރެއްވި ގޮތުގައި، މި ގާނޫނުގެ ދަށުން ސޯޝަލް މީޑިއާ ބޭނުންކުރުމުގައި ކުދިންގެ އުމުރަށް ބަލައި މަރުހަލާތަކަކަށް ބަހާލެވިގެންދާނެ އެވެ. އެގޮތުން 13 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރެވޭނީ މައިންބަފައިން، ބަލަދުވެރިން ނުވަތަ މުދައްރިސެއްގެ ބެލުމުގެ ދަށުން، ކަނޑައެޅޭ ވަކި ވަގުތުތަކެއްގައި އެކަންޏެވެ. ކުއްޖާގެ އުމުރު މައްޗަށްދާ ވަރަކަށް މި ހަނިކުރުންތަކަށް ލުއިތަކެއް ދެވޭނެ ކަމަށް އޭނާ ވިދާޅުވި އެވެ.
"ޕްލެޓްފޯމްތަކުގައި އުމުރާ ގުޅޭ ހަނިކުރުންތަކެއް ހުންނަންޖެހޭކަން ވަރަށް ސާފު،" ފޮން ޑެއިލަޔަން ވިދާޅުވި އެވެ. "ސުވާލަކީ މިހާރު ކުދިންނަށް އިންޓަނެޓުން ނުރައްކާ ކުރިމަތިވޭތޯ ނުވަތަ ނޫންތޯއެއް ނޫން. ސުވާލަކީ ކުދިންނަށް އިންޓަނެޓުގައި ރައްކާތެރި ފެށުމެއް ހޯދައިދިނުމަށް އަޅުގަނޑުމެންނަށް ކުރެވޭނީ ކޮން ކަމެއްތޯ."
މި ގާނޫނު ބިނާވެފައިވަނީ ދާއިރާގެ ތަޖުރިބާކާރުންގެ ލަފާގެ މައްޗަށެވެ. ރަސްމީ ހުށަހެޅުމެއް ހޫނު މޫސުމުގެ ޗުއްޓީއަށް ފަހު ހުށަހަޅުއްވާނެ ކަމަށާއި ސެޕްޓެމްބަރު މަހު ބާއްވާ 'ސްޓޭޓް އޮފް ދަ ޔޫނިއަން' ހިތޯބުގައި މިކަން ރަސްމީކޮށް އިއުލާން ކުރައްވާނެ ކަމަށް ފޮން ޑެއިލަޔަން ވިދާޅުވި އެވެ.
"ސޯޝަލް މީޑިއާ ޕްލަސް"ގެ ނަމުން އޭނާ ސިފަކުރެއްވި މި ފިޔަވަޅުތަކުގެ މައިގަނޑު އަމާޒަކީ ސޯޝަލް މީޑިއާ ޕްލެޓްފޯމްތައް ކަމުގައި ވިޔަސް، އުމުރާ ނުގުޅޭ އަދި ދެވިހިފާ ފަދަ ސިފަތައް އެކުލެވޭ އިންޓަނެޓްގެ އެހެން ހިދުމަތްތައް ވެސް މީގެ ތެރޭގައި ހިމެނޭނެ އެވެ.
ދުނިޔޭގެ އެކި ގައުމުތަކުން މިހާރު ވެސް ދަނީ ކުޑަކުދިން ސޯޝަލް މީޑިއާ ބޭނުންކުރުމުގެ މައްޗަށް ހަރުކަށި ފިޔަވަޅުތަކެއް އަޅަމުންނެވެ. އޮސްޓްރޭލިއާ، އިނގިރޭސިވިލާތް، ޗައިނާ، އިންޑިއާ އަދި އެމެރިކާއިން ވަނީ މިފަދަ ގާނޫނުތައް ތައާރަފުކޮށްފައި، ނުވަތަ ތައާރަފުކުރުމުގެ މަގުމަތީގަ އެވެ.
ކޮމެންޓު ފޮނުވާ