އެމެރިކާއިން އީރާނުގެ ބަނދަރުތަކަށް އަޅާފައި އޮތް ހުރަސްތައް ނައްތާލުމާއެކު، އެ ޤައުމުން 40 މިލިއަނަށް ވުރެ ގިނަ ފީފާގެ ތެޔޮ ބޭރުކޮށްފިކަމަށް އީރާނުގެ ޤާނޫނުހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ވިދާޅުވެއްޖެއެވެ.
ދައުލަތުގެ ޓީވީއަށް ދެއްވި އިންޓަވިއުއެއްގައި ޣަލިބާފް ފާހަގަކުރެއްވި ގޮތުގައި، ބަނދަރުތައް ބަންދުކޮށްފައި އޮތް 50 އާއި 60 އާ ދެމެދުގެ ދުވަސްތަކުގެ ތެރޭގައި އީރާނަށް އެންމެ ތެޔޮ ފީފާއެއްވެސް އެކްސްޕޯޓުކުރެވޭނެ ގޮތެއް ނެތިއެވެ. ނަމަވެސް ދަތިކުރުމުގެ ފިޔަވަޅުތަކަށް ލުޔެއް ލިބުމާއެކު ތެޔޮ ބޭރުކުރާ މިންވަރު މިހާރު ވަނީ ވަރަށް ބޮޑަށް އިތުރުވެފައެވެ.
އެމެރިކާއާ އޮންނަ ގުޅުމަށް އަލިއަޅުއްވާލައްވަމުން އޭނާ ވިދާޅުވީ، އީރާނުން އަބަދުވެސް އެންމެ ބޮޑު އިސްކަމެއް ދެނީ ޑިޕްލޮމެޓިކް ހަމަތަކުގެ މަތިން މަޝްވަރާކޮށްގެން މައްސަލަތައް ހައްލުކުރުމަށެވެ. އެހެންނަމަވެސް، މި މަޝްވަރާތައް ނާކާމިޔާބުވެއްޖެނަމަ، ހަނގުރާމައަކަށް ދާންޖެހިއްޖެ ހާލަތެއްގައި އެކަމަށްވެސް އީރާނު އޮތީ ތައްޔާރަށްކަމުގެ އިންޒާރު އޭނާ ވަނީ ދެއްވާފައެވެ.
އީރާނާއި އެމެރިކާގެ ވަފުދުތަކުން ޤަތަރުގެ ދޯހާގައި މަޝްވަރާ ބައްދަލުވުންތަކެއް ބޭއްވުމަށް ހަމަޖެހިފައިވާއިރު، މި ބައްދަލުވުންތަކަކީ ދެ ޤައުމުގެ ދެމެދުގައިވާ ނުތަނަވަސްކަން ކުޑަކުރުމަށް އެޅޭ މުހިންމު ފިޔަވަޅެއްކަމަށް ބެލެވެއެވެ. ތެޔޮ އެކްސްޕޯޓުކުރުން އިތުރުވުމަކީ އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން އަޑިއަޅާލާފައިވާ އީރާނުގެ އިޤްތިޞާދަށް ލިބިގެންދިޔަ ވަރަށް ބޮޑު އާރޯކަމެއްކަމަށް އެ ޤައުމުގެ ސަރުކާރުން ދެކެއެވެ.
ކޮމެންޓު ފޮނުވާ