މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، އަމިއްލަ އިސްނެގުމަށް ހާމަކުރަންޖެހޭ މައުލޫމާތުތައް ފުރިހަމައަށް އާންމުކުރި ފުރަތަމަ ސަރުކާރު ހިއްސާވާ ކުންފުންޏަކަށް (އެސްއޯއީ) ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ވެއްޖެއެވެ.
މިކަން ހާމަކުރައްވާފައިވަނީ އިންފޮމޭޝަން ކޮމިޝަނަރު އަހްމަދު އާހިދު ރަޝީދު 'އެކްސް' ގައި ކުރެއްވި ޕޯސްޓެއްގައެވެ. އޭނާ ވިދާޅުވީ އާރްޓީއައި ގާނޫނުގެ ދަށުން މައުލޫމާތު ހާމަކުރުމުގެ ޒިންމާތައް އެޗްޑީސީން މިހާރު ފުރިހަމަކޮށްފައިވާ ކަމަށާއި، މިއާއެކު އެ ކުންފުނި ވެފައިވަނީ މި މިންގަނޑަށް ވާސިލްވި ފުރަތަމަ އެސްއޯއީއަށް ކަމަށެވެ.
މި ގާނޫނުގެ 37 ވަނަ މާއްދާ ބުނާގޮތުން، ދައުލަތުގެ މުއައްސަސާތަކުގެ މަސްއޫލިއްޔަތުތަކާއި، ބަޖެޓާއި، މުވައްޒަފުންގެ މުސާރައިގެ ތަފްސީލުތަކުގެ އިތުރުން ނިންމުންތައް ނިންމާ ގޮތްތައް ހިމެނޭހެން 13 ބާވަތެއްގެ މައުލޫމާތު އަމިއްލައަށް އިސްނަގައިގެން ހާމަކުރަން ޖެހެއެވެ. މިކަމަށް މަގުފަހިކުރުމުގެ ގޮތުން އެޗްޑީސީން ވަނީ އެ ކުންފުނީގެ ވެބްސައިޓުގައި ހާއްސަ "އިންފޮމޭޝަން ޑައިރެކްޓްރީ" އެއް ގާއިމުކޮށް، އާންމުންނަށް ފަސޭހައިން މައުލޫމާތު ލިބޭނެ އިންތިޒާމު ހަމަޖައްސާފައެވެ.
ދައުލަތުގެ ކުންފުނިތަކަކީ ރައްޔިތުންގެ ފައިސާއިން ހިންގާ ތަންތަނަށް ވުމުން، ދެފުށް ފެންނަ ގޮތަށް އަމަލުކުރުމަކީ މުހިންމު ކަމެކެވެ. އެޗްޑީސީން ބުނެފައިވަނީ މިއީ ކުންފުންޏަށް ލިބުނު ބޮޑު ފަހުރެއް ކަމަށާއި، އަމާޒަކީ ރައްޔިތުންގެ އިތުބާރު ހޯދައި، އެހެން ކުންފުނިތަކަށް ނަމޫނާ ދެއްކުން ކަމަށެވެ. 2014 ވަނަ އަހަރު އާރްޓީއައި ގާނޫނަށް އަމަލުކުރަން ފެށިފަހުން، ސަރުކާރުގެ ވުޒާރާތަކުން ވެސް މިހާރު އަންނަނީ މިގޮތަށް އަމިއްލަ އިސްނެގުމަށް މައުލޫމާތުތައް ހާމަކުރަމުންނެވެ.
ކޮމެންޓު ފޮނުވާ