ވޯލްޑް ކަޕްގައި ބްރެޒިލް ބަލިކުރަން ޖަޕާނަށް އޮތީ ވަރަށް ހަނި ފުރުސަތެއް!

މިރޭ ވޯލްޑް ކަޕްގެ ގަދަ 32 ގައި ބްރެޒިލްއާ ދެކޮޅަށް ޖަޕާން ނުކުންނައިރު، މެޗުން މޮޅުވެ ކުރި ހޯދުމަށް ޖަޕާނަށް އޮތީ ވަރަށް ހަނި ފުރުސަތެއް ކަމަށް ތަފާސްހިސާބުތަކުން ދައްކައިފިއެވެ.

އޮޕްޓާގެ ލަފާކުރުންތައް ދައްކާގޮތުން، ފަސް ފަހަރު ވޯލްޑް ކަޕް ކާމިޔާބުކޮށްފައިވާ ބްރެޒިލް އަތުން ޖަޕާން މޮޅުވުމުގެ ފުރުސަތަކީ އެންމެ 19.7 އިންސައްތައެވެ. އަދި މެޗުގެ ފުރިހަމަ ވަގުތުގެ ތެރޭގައި ބްރެޒިލް މޮޅުވުމަށް 57.3 އިންސައްތައިގެ ފުރުސަތެއް އޮތްއިރު، މެޗު އެއްވަރުވެގެން އިތުރު ވަގުތަށް ދިއުމުގެ ފުރުސަތު އުޅެނީ 24.3 އިންސައްތައިގައެވެ. މި ނަތީޖާތައް ނެރެފައިވަނީ ދެ ޓީމުގެ ކުރީގެ މެޗުތަކަށް ބަލައި 25،000 އަށްވުރެ ގިނަ ފަހަރު އެކި ގޮތްގޮތަށް ދިރާސާކުރުމަށް ފަހުގައެވެ.

އޭޝިއާ ބައްރުން މުބާރާތުގައި ނުވަ ގައުމު ވާދަކުރި ނަމަވެސް، ނޮކްއައުޓް ބުރަށް ދަތުރުކުރެވުނީ ހަމައެކަނި ޖަޕާނާއި އޮސްޓްރޭލިއާއަށެވެ. މިއީ އޭޝިއާގެ ފުޓުބޯޅައަށް ލިބުނު ދަށް ނަތީޖާއެއްގެ ގޮތުގައި ގިނަ ބަޔަކު ސިފަކުރެއެވެ. ޖަޕާނާއި ބްރެޒިލްގެ ކުރީގެ ކުރިމަތިލުންތަކަށް ބަލާއިރު، މިހާތަނަށް ކުޅުނު 14 މެޗުގެ ތެރެއިން 11 މެޗު ކާމިޔާބުކުރީ ބްރެޒިލްއިންނެވެ. ދެ މެޗު އެއްވަރުވެގެން ނިމުނުއިރު ޖަޕާނަށް މޮޅުވެވުނީ އެންމެ މެޗަކުންނެވެ. ނަމަވެސް އެއީ އެންމެ ފަހުން މިދިޔަ އޮކްޓޯބަރު މަހު ޓޯކިޔޯގައި ކުޅުނު އެކުވެރިކަމުގެ މެޗެވެ. އެ މެޗުގައި ބްރެޒިލްއިން ދެ ލަނޑު ޖަހާފައި ވަނިކޮށް، ފަހަތުން އަރައި 3-2 އިން ޖަޕާން ވަނީ މޮޅުވެފައެވެ. އެހެންކަމުން މިއީ ޖަޕާނަށް އޮތް އުންމީދެކެވެ. މިއީ ޖަޕާނަށް ވޯލްޑް ކަޕްގެ ނޮކްއައުޓް ބުރުން ކުރިއަށް ދިއުމަށް ލިބޭނެ ވަރަށް ބޮޑު އިމްތިހާނަކަށް ވާނެއެވެ.