ރައީސް ޑރ. މުހައްމަދު މުއިއްޒުއަށް ތުހުމަތުކޮށް 'އަދަދު' ނޫހުން ގެނެސްދިން ޑޮކިއުމެންޓްރީއާ ގުޅިގެން ނެރެފައިވާ ގެގް އޯޑަރުގެ އިސްތިއުނާފީ އަޑުއެހުން ހައިކޯޓުގައި ސިއްރުކޮށްފިއެވެ.
މިދިޔަ މަހުގެ 10 ވަނަ ދުވަހު ކްރިމިނަލް ކޯޓުން ނެރުނު މި އަމުރުގައި އަންގާފައިވަނީ އެ ޑޮކިއުމެންޓްރީ ދައުރު ނުކުރުމަށާއި، އޭގައިވާ އެއްވެސް ވާހަކައެއް ސީދާކޮށް އަދި ނުސީދާކޮށްވެސް ނުދެއްކުމަށެވެ. މި އަމުރު ހައިކޯޓުގައި އިސްތިއުނާފުކުރީ 'އަދަދު' ނޫހުގެ ސީއީއޯ ހުސެއިން ފިޔާޒު މޫސާގެ ފަރާތުންނެވެ. ބާ ކައުންސިލުންވެސް ތަދައްހުލްވެފައިވާ މި މައްސަލައިގެ އަޑުއެހުން މިއަދު ހެނދުނު 9:00 އަށް ތާވަލުކުރި ނަމަވެސް، ކޯޓުން ވަނީ އެ އަޑުއެހުން ސިއްރުކޮށްގެން ކުރިއަށް ގެންގޮސްފައެވެ.
ކްރިމިނަލް ކޯޓުގެ އަމުރާ ހިލާފުވި ކަމަށް ބުނެ އެ ނޫހުގެ ދެ ނޫސްވެރިން ކަމަށްވާ ލީވާން އަލީ ނަސީރާއި މުހައްމަދު ޝަހުޒާން ޖަލަށްލުމަށްފަހު، ހުކުމް ތަންފީޒުކޮށް ނިމުމުން މިހާރު ވަނީ މިނިވަންކޮށްފައެވެ. މީގެ އިތުރުން، މި ޑޮކިއުމެންޓްރީގެ މައްސަލައިގައި ފިޔާޒުގެ އިތުރުން ނޫހުގެ އެޑިޓަރު ހަސަން މުހައްމަދުގެ މައްޗަށް ދައުލަތުން ގަޒުފުގެ ދައުވާ އުފުލާފައިވާއިރު، އެ މައްސަލައިގެ ޝަރީއަތް ކްރިމިނަލް ކޯޓުގައި މިހާރު ދަނީ ހިނގަމުންނެވެ.
ކޮމެންޓު ފޮނުވާ