ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހި ފުލުހުންގެ ޚިދުމަތުގެ އެގްޒެކެޓިވް މެނޭޖްމަންޓް ބޯޑުގެ މެންބަރުންނާ މިއަދު ބައްދަލުކުރައްވައި، މުއައްސަސާގެ ހިންގުން ހަރުދަނާކުރުމާ ގުޅޭގޮތުން މަޝްވަރާކުރައްވައިފިއެވެ.
ފުލުހުންގެ މައި މަރުކަޒު ކަމަށްވާ ޝަހީދު ޙުސައިން އާދަމް ބިލްޑިންގގައި ބޭއްވެވި މި ބައްދަލުކުރެއްވުމުގައި ހޯމްލޭންޑް ސެކިއުރިޓީ މިނިސްޓަރ ޢަލީ އިޙްސާނާއި ކޮމިޝަނަރ އޮފް ޕޮލިސް އަޙްމަދު މުޙައްމަދުގެ އިތުރުން އެގްޒެކެޓިވް ބޯޑުގެ މެންބަރުން ބައިވެރިވެވަޑައިގަތެވެ. މި ބައްދަލުވުމުގައި މައިގަނޑު ގޮތެއްގައި އަލިއަޅުވާލައްވާފައިވަނީ ފުލުހުން ފޯރުކޮށްދޭ ޚިދުމަތުގެ ފެންވަރު އިތުރަށް މަތިކުރުމަށާއި، މުއައްސަސާގެ ސްޓްރެޓީޖިކް ލަނޑުދަނޑިތައް ހާސިލުކުރުމަށް ކުރެވިދާނެ މަސައްކަތްތަކުގެ މައްޗަށެވެ.
މި ބައްދަލުވުމުގައި ވާހަކަފުޅުދައްކަވަމުން ރައީސް ވަނީ، ރައްޔިތުންގެ އިހުސާސްތަކާއި ބޭނުންތަކަށް އިސްކަންދީގެން މަސައްކަތްކުރާ ނަމޫނާ މުއައްސަސާއެއްގެ ގޮތުގައި ފުލުހުން ދެމިއޮތުމުގެ މުހިންމުކަން ފާހަގަކުރައްވާފައެވެ. އަދި މުޅި ރާއްޖެއަށް ފުލުހުންގެ ޚިދުމަތް ފުޅާކުރަމުންދާ މި ދަނޑިވަޅުގައި، އިދާރީ ހިންގުން ހަރުދަނާކުރުމުގައި ބޯޑުން އަދާކުރާ މުހިންމު ދައުރުގެ މައްޗަށް އެމަނިކުފާނު އަލިއަޅުވާލެއްވިއެވެ.
މިކަމާ ގުޅިގެން ކޮމިޝަނަރ އޮފް ޕޮލިސް އާއި ބޯޑުގެ މެންބަރުން ވަނީ ރައީސަށް ޔަގީންކަމެއް އަރުވާފައެވެ. އެބޭފުޅުން ވިދާޅުވީ، ރައްޔިތުންގެ އިތުބާރު ހޯދައި، ގައުމުގެ އަމަންއަމާންކަމާއި ރައްކާތެރިކަން ކަށަވަރުކުރުމާއެކު، ފުލުހުންގެ ސްޓްރެޓީޖިކް މަގުސަދުތައް ހާސިލުކުރުމުގައި ފަސްޖެހުމެއްނެތި ސާބިތުކަމާއެކު ދެމިތިއްބަވާނެ ކަމަށެވެ.
ކޮމެންޓު ފޮނުވާ