މުއްދަތު ހަމަވެގެން ނުވަތަ އެހެނިހެން ސަބަބުތަކާ ހުރެ ދައުލަތަށް އަނބުރާ ނަގާ ރިސޯޓުތަކުގައި ހުންނަ މުދަލުގެ އަގު ކަނޑައަޅާނެ ގޮތުގެ އާ އުސޫލެއް ޓޫރިޒަމް މިނިސްޓްރީން ގެޒެޓުކޮށްފިއެވެ.
މި އުސޫލުގެ މައިގަނޑު މަގުސަދަކީ ދައުލަތާ ހަވާލުކުރާ ޓޫރިޒަމް ފެސިލިޓީތަކުގައި ހުންނަ މުދަލަށް ހަމަހަމަ އަދި ދެފުށް ފެންނަ ނިޒާމެއްގެ ތެރެއިން އަގުދިނުމެވެ. މިގޮތުން ބަލަށް ކެނޑުމަށްފަހު އަގުދޭނީ ހަމައެކަނި ވިޔަފާރިއާ ސީދާ ގުޅުންހުރި، އިންވެންޓްރީގައި ހިމެނޭ އުފުލޭ މުދަލަށެވެ. މުދަލުގެ އަގު ކަނޑައަޅާނީ އެ އެއްޗެއްގެ މިހާރުގެ ހާލަތާއި، ކުރިމަގުގައި ބޭނުންކުރެވޭނެ މުއްދަތުގެ އިތުރުން ސިނާއަތުގެ އާންމު ރޭޓުތަކަށް ބެލުމަށްފަހުގައެވެ.
އިންވެންޓްރީގައި ނުހިމެނޭ ތަކެތި ގެންދިއުމުގެ ފުރުސަތު ކުރިން އެތަން ހިންގި ފަރާތަށް އޮންނާނެއެވެ. ނަމަވެސް 90 ދުވަހުގެ ތެރޭގައި އެ ތަކެތި ނުގެންގޮސްފިނަމަ، ނީލަމުގައި ވިއްކާލުމުގެ ބާރު މިނިސްޓްރީއަށް ލިބިގެންވެއެވެ. މީގެ އިތުރުން، އެތަން ހިންގި ފަރާތުން މީރާއަށް ދައްކަންޖެހޭ ކުއްޔެއް، ޓެކްސެއް ނުވަތަ ޖޫރިމަނާއެއް އޮތްނަމަ، މުދަލަށް ދޭ އަގުގެ ތެރެއިން އެ ފައިސާ އުނިކުރާނެ ކަމަށް އުސޫލުގައި ބަޔާންކޮށްފައިވެއެވެ.
ރާއްޖޭގައި އެންމެ ފުރަތަމަ ދޫކުރި ރިސޯޓުތަކުގެ ކުލީގެ މުއްދަތުތައް މިހާރު ހަމަވަމުން އަންނައިރު، ޓޫރިޒަމް ގާނޫނަށް ގެނައި ބަދަލާއެކު ވަކި ފީއެއް ދެއްކުމުން 99 އަހަރަށް މުއްދަތު އިތުރުކުރުމުގެ ފުރުސަތު އޮވެއެވެ. 1970 ގެ އަހަރުތަކުގައި ހުޅުވި ކުރުނބާ، ބަނޑޮސް އަދި ބަރޮސް ފަދަ ގިނަ ރިސޯޓުތަކުން މިހާރު ވަނީ މި ފުރުސަތުގެ ބޭނުންހިފައި ކުލީގެ މުއްދަތު އިތުރުކޮށްފައެވެ.
ކޮމެންޓު ފޮނުވާ