ސަރުކާރު ހިއްސާވާ ކުންފުނިތަކުން މުވައްޒަފުން މަދުކުރުމަށް ގެންގުޅޭ ސިޔާސަތުގެ ސަބަބުން ރާއްޖޭގެ މަސްވެރިކަމުގެ ސިނާއަތަށް އޭގެ ހެޔޮ އަސަރު ކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް އޮފީހުން ގެނެސްދޭ "ދަ ޕަލްސް" ޕޮޑްކާސްޓުގެ ދެވަނަ އެޕިސޯޑުގައި ވާހަކަފުޅުދައްކަވަމުން އެމަނިކުފާނު ފާހަގަކުރެއްވި ގޮތުގައި، ފެނަކަ އަދި އާރްޑީސީ ފަދަ ކުންފުނިތަކަށް ބޭނުންވާ ވަރަށްވުރެ ގިނައިން މީހުން ވެއްދުމުގެ ނަތީޖާއަކަށްވީ ރަށްރަށުން މަހަށްދާ މީހުންގެ އަދަދު އިންތިހާއަށް ދަށްވެގެން ދިޔުމެވެ. އެހެންކަމުން، ކުންފުނިތަކުގެ މުވައްޒަފުން މަދުކުރުމަށް ސަރުކާރުން ތަންފީޒުކުރާ ސިޔާސަތާއެކު، މަސްވެރިކަމުގެ ދާއިރާ ހިމެނޭހެން މުޅި އިޤުތިޞާދަށް އޭގެ ފައިދާ ކުރަން ފަށާނެކަމަށް ރައީސް ވިދާޅުވިއެވެ.
މިކަންކަން ހައްލުކުރުމަށް ސަރުކާރުން މަސައްކަތްކުރަމުންދަނީ ވަށާޖެހޭ އިޤުތިޞާދީ ސިޔާސަތެއްގެ ތެރެއިންކަމުގެ ޔަޤީންކަން ދެއްވަމުން، މަސްވެރިކަން ކުރިއެރުވުމަށް މިހާރު ކުރެވެމުންދާ މަސައްކަތްތަކާމެދު ހިތްޕުޅުހަމަޖެހިވަޑައިގަންނަވާކަމަށް ރައީސް ވިދާޅުވިއެވެ. މީގެ އިތުރުން، މާލޭގައި ޒަމާނީ ފެންވަރުގެ މަސްމާރުކޭޓެއް ތަރައްޤީކުރުމަށް ހުރި ހުރަސްތައް ނައްތަވައިލައްވައި، އެކަމަށް އަވަސް ހައްލެއް ހޯއްދަވައިދެއްވާނެކަމަށްވެސް އެމަނިކުފާނު ވަނީ ވިދާޅުވެފައެވެ.
ކޮމެންޓު ފޮނުވާ