މި އަހަރުގެ ކުރީކޮޅުން ފެށިގެން މާލޭ ވިޔަފާރި ބަނދަރުން މުދާ ބޭލުމުގައި ދިމާވަމުންދިޔަ ދަތިތަކަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހައްލު ހޯދައި، އާންމު އުސޫލުން އަލުން މަސައްކަތްތައް ފަށައިފިއެވެ.
މި މައްސަލަ ކުރިމަތިވާން މެދުވެރިވި އެންމެ ބޮޑު އެއް ސަބަބަކީ ބޭރުގައި ހިނގަމުންދާ ހަނގުރާމަތަކާ ގުޅިގެން ކޮލޮމްބޯ ޕޯޓުގައި ބޯޓުފަހަރު ތޮއްޖެހުން ބޮޑުވެ، ރާއްޖެއަށް މުދާ ގެނައުމަށް ހުރަސްތަކެއް އެޅުމެވެ. އޭގެ ސަބަބުން މާލޭ ބަނދަރުގެ އޮޕަރޭޝަންތަކަށްވެސް ބޮޑެތި ދަތިތަކަކާ ކުރިމަތިލާން ޖެހުނެވެ. މީގެ އިތުރުން، ރާއްޖެއަށް އެތެރެކުރާ މުދަލުގެ ނިސްބަތާ އަޅާބަލާއިރު މާލޭ ބަނދަރުގެ ޖާގަ ކުޑަވުމާއި، ކޮންޓޭނަރުތައް ބަހައްޓާނެ އެކަށީގެންވާ ޖާގަ ނެތުމަކީވެސް މުދާ ބޭލުން ލަސްވުމަށް މެދުވެރިވާ އަސާސީ އެއް މައްސަލައެވެ.
މިކަމަށް ދާއިމީ ހައްލެއް ހޯދުމުގެ ގޮތުން ސަރުކާރުން މިހާރު ވަނީ ތިލަފުށީ ބަނދަރު ތަރައްޤީކުރުމުގެ މަޝްރޫއު ފަށާފައެވެ. މާލޭ ބަނދަރަށް ދިމާވެފައިވާ ޖާގައިގެ ދަތިކަން ހައްލުކުރެވޭނީ ބައިނަލްއަގުވާމީ ވިޔަފާރި ބަނދަރު ގުޅީފަޅު ނުވަތަ ތިލަފުއްޓަށް ބަދަލުކުރެވިގެންނެވެ. މި މަޝްރޫއު ނިމުމުން، ޒަމާނީ ވަސީލަތްތަކުގެ އެހީގައި މުދާ ބޭލުމުގެ ދުވެލި އެތައް ގުނައެއް އަވަސްވެ، ވިޔަފާރިވެރިންނަށާއި އާންމުންނަށް އޭގެ ލުއިފަސޭހަކަން ލިބިގެންދާނެއެވެ.
ކޮމެންޓު ފޮނުވާ