ކްރިމިނަލް ކޯޓުގެ ޝަރީއަތުގެ މަޖިލީހެއްގައި ބޭއަދަބީ ބަސްމަގު ބޭނުންކޮށް، ކޯޓުގެ ހުރުމަތް ކެނޑުމުގެ ކުށުގައި އއ. ތޮއްޑޫ ރަތްވިލާގޭ، ޢަލީ އަދުހަމް ނުވަ މަސް ދުވަހަށް ޖަލަށް ލުމަށް ހުކުމްކޮށްފިއެވެ.
އަދުހަމްގެ މައްޗަށް މި ހުކުމް އިއްވާފައިވަނީ، އޭނާގެ މައްޗަށް ސާބިތުވެފައިވާ މުޅިން އެހެން ދެ މައްސަލައެއްގެ ހުކުމް އިއްވުމަށް ބޭއްވި ޝަރީއަތުގެ މަޖިލީހުގައެވެ. ޝަރީއަތުގައި އޭނާ ވަނީ ފަނޑިޔާރުގެ ނަސޭހަތް ގަބޫލުނުކޮށް، ޝަރީއަތަށް ގޮންޖަހައި ބޭއަދަބީކޮށް އަމަލުކޮށްފައެވެ. އެފަދަ އަމަލުތައް ތަކުރާރު ނުކުރުމަށް ފަނޑިޔާރު އެތައް ފަހަރަކު އިންޒާރު ދެއްވުމުންވެސް އޭނާ ވަނީ އެކަމަށް ބޯލެނބުމަށް ދެކޮޅުހަދާފައެވެ. ދިވެހިރާއްޖޭގެ ކޯޓުތަކުގެ ގާނޫނު އޮންނަ ގޮތުން، ކޯޓުގެ ހުރުމަތް ކަނޑައިފިނަމަ އިތުރު ދައުވާއަކަށް ނުގޮސް، ހަމަ އެ ވަގުތު އެ މީހަކާމެދު ފިޔަވަޅު އެޅުމުގެ އިޚްތިޔާރު މައްސަލަ ބައްލަވާ ފަނޑިޔާރަށް ލިބިގެންވެއެވެ.
އެ ދުވަހު ކޯޓަށް އޭނާ ހާޒިރުކުރެވުނީ އަމީނިއްޔާ ސްކޫލުގެ އާ އިމާރާތުގެ މަސައްކަތްކުރާ ސަރަހައްދަށް ހުއްދަ ނެތި ވަދެގަތުމާއި، އެތަނުން އަށާރަ ދަގަނޑު ބިޑި ވަގަށް ނެގުމުގެ ކުށުގެ ދައުވާގެ ހުކުމް އިއްވުމަށެވެ. ކޯޓުގެ ހުރުމަތް ކެނޑުމުގެ އަދަބުގެ އިތުރުން، އެ ދެ ކުށްވެސް އޭނާގެ މައްޗަށް ވަނީ ސާބިތުވެފައެވެ.
ޝަރުއީ ނިޒާމުގައި ކޯޓުގެ ހުރުމަތް ކެނޑުން ކަމަށް ބަލަނީ އިންސާފު ގާއިމުކުރުމުގެ މަސައްކަތަށް ހުރަސްއެޅޭ ފަދަ އަމަލުތައް ކުރުމާއި މަޖިލީހުގެ ނިޒާމު ގެއްލުވާލުމަށެވެ. އޭގެ ތެރޭގައި ފަނޑިޔާރުންނާއި ކޯޓުގެ މުވައްޒަފުންނާ ހަޑިހުތުރު ބަހުން މުއާމަލާތްކުރުމާއި، ކޯޓުގެ އަމުރުތަކަށް ގަސްދުގައި ނުކިޔަމަންތެރިވުން ހިމެނެއެވެ.
ކޮމެންޓު ފޮނުވާ