އައްޑޫ ރީޖަނަލް ފްރީ ޒޯން އިފްތިތާޙްކޮށް، ވިޔަފާރިތަކަށް ފުރުޞަތު ހުޅުވާލައިފި

އައްޑޫ ސިޓީގެ އިޤްތިޞާދަށް ހެޔޮ ބަދަލުތަކެއް ގެނުވާނެ "އައްޑޫ ރީޖަނަލް ފްރީ ޒޯން" ރަސްމީކޮށް އިފްތިތާޙްކޮށް، އެ ސަރަޙައްދުން ޖާގަ ހޯދުމުގެ ފުރުޞަތު އާންމުކޮށް ހުޅުވާލައިފިއެވެ.

އައްޑޫ ހައިސްކޫލުގައި ބޭއްވި ޚާއްޞަ ރަސްމިއްޔާތެއްގައި މި ފްރީ ޒޯން އިފްތިތާޙްކޮށްދެއްވީ އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދާއި، ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާންއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް، ރާއްޖޭގެ ދެކުނުގެ އިޤްތިޞާދު ފުޅާކޮށް ހަރަކާތްތެރިކުރުމުގެ މަޤްޞަދުގައި ފެށިގެންދިޔަ ވަރަށް މުހިންމު މަސައްކަތެކެވެ.

ހިތަދޫ ސަރަޙައްދީ ބަނދަރުގައި ޤާއިމްކުރާ މި ފްރީ ޒޯންގެ މަސައްކަތަށް ހިތަދޫ ޕޯޓް ލިމިޓެޑް ސަރަޙައްދުން 1.7 ހެކްޓަރުގެ ބިމެއް ކަނޑައަޅާފައިވާއިރު، ފުރަތަމަ މަރުޙަލާގައި 20،000 އަކަފޫޓުގެ ސަރަޙައްދެއް އިންވަކިކޮށް މަސައްކަތް ފަށަން ވަނީ ތައްޔާރުވެފައެވެ. ފްރީ ޒޯންތަކަކީ މުދާ އެތެރެކޮށް، އަލުން ބޭރުކުރުމުގެ ކުރިން ޑިއުޓީ ނުދައްކައި ރައްކާކުރެވޭނެ ނިޒާމެކެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މަޢުލޫމާތު ދޭގޮތުގައި، މި ސަރަޙައްދުގައި ޑިއުޓީ ފްރީ ސްޓޯރޭޖާއި، ވެހިކަލް ރީފާބިޝްމެންޓާއި، މެނުފެކްޗަރިންގެ އިތުރުން ބޮންޑެޑް ސްޓޯރޭޖް އަދި ރީ-އެކްސްޕޯޓް ކުރުމުގެ ޚިދުމަތްތަކަށް ޖާގަ ދޫކުރުމަށް ވަނީ ނިންމާފައެވެ. އަދި ބިން ދޫކުރާނެ ރޭޓްތައްވެސް މިހާރު ވަނީ ކަނޑައަޅާފައެވެ.

މި މަޝްރޫޢު ކާމިޔާބުކުރުމަށްޓަކައި އައްޑޫގެ ވިޔަފާރިވެރިންގެ ފުރިހަމަ އެއްބާރުލުމާއި ޝައުޤުވެރިކަން ބޭނުންވާކަމަށް އެމްޕީއެލްގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ލައްމާން ވަނީ ފާހަގަކުރައްވާފައެވެ. ފްރީ ޒޯނުން ޖާގަ ބޭނުންވާ ފަރާތްތަކަށް ޝައުޤުވެރިކަން ފާޅުކުރުމުގެ ފުރުޞަތު މިހާރު ހުޅުވާލާފައިވާއިރު، އަންނަ ޖޫން މަހުގެ 11 ވަނަ ދުވަހުގެ ނިޔަލަށް އެ ފުރުޞަތު އޮންނާނެއެވެ. އޭގެ ފަހުން، ވިޔަފާރިތަކުން ކުރަން ބޭނުންވާ މަސައްކަތްތަކުގެ ތަފްސީލާއި، ބޭނުންވާ ބިމުގެ ބޮޑުމިނާއި ލީސް އެއްބަސްވުމާ ގުޅޭ ތަފްސީލްތަކާއެކު ޕްރޮޕޯސަލް ހުށަހެޅުމަށްވެސް ފުރުޞަތު ދެވޭނެކަމަށް އެމްޕީއެލްއިން ބުނެއެވެ.

މިއަހަރުގެ ކުރީކޮޅު ފެށި މި މަސައްކަތަކީ އެމްޕީއެލްއާއި، އިޤްތިޞާދީ ވުޒާރާއާއި، ކަސްޓަމްސް އަދި ސަރުކާރުގެ ކަމާބެހޭ އެހެނިހެން މުއައްސަސާތައް ގުޅިގެން ކުރިއަށްގެންދާ މުހިންމު މަޝްރޫޢެކެވެ.