ޤައުމީ އެއާލައިން މޯލްޑިވިއަނުން ފެށި "ދެކުނު ކަނެކްޓިވިޓީ" މަޝްރޫޢުގެ ދަށުން މިހާތަނަށް 1800 އަށްވުރެ ގިނަ ފަސިންޖަރުން ދަތުރުކޮށްފިއެވެ. މިއީ ދެކުނުގެ އަތޮޅުތައް ވައިގެމަގުން ގުޅާލުމަށް މިދިޔަ ފެބްރުވަރީ މަހުގެ 1 ވަނަ ދުވަހު ފެށި ޚިދުމަތެކެވެ.
ދެކުނުގެ ހަތަރު އަތޮޅު ކަމަށްވާ ގއ، ގދ، ފުވައްމުލައް އަދި އައްޑޫ ސިޓީ ގުޅާލުމަށް ފެށި މި މަސައްކަތުގެ ދަށުން މިހާތަނަށް 296 އަށްވުރެ ގިނަ ފްލައިޓު ވަނީ ބާއްވާފައެވެ. މޯލްޑިވިއަނުން މަޢުލޫމާތު ދޭގޮތުގައި މި ދަތުރުތަކުގައި ޖުމްލަ 1857 ފަސިންޖަރުން ވަނީ އުފުލާފައެވެ. މިގޮތުން ކޮންމެ ހަފްތާއަކު ފުވައްމުލަކަށް 9 ދަތުރު، ކާޑެއްދޫއަށް 6 ދަތުރު އަދި ކޫއްޑޫއަށް 3 ދަތުރު އަންނަނީ ކުރަމުންނެވެ.
ޒަމާނުއްސުރެ ރާއްޖޭގެ ވައިގެ ދަތުރުފަތުރު ބައްޓަންކުރެވިފައި އޮންނަނީ ވެލާނާ އިންޓަރނޭޝަނަލް އެއަރޕޯޓާއި ފަތުރުވެރިންގެ އާރައިވަލްތަކުގެ ޝެޑިއުލްއަށް ބިނާކޮށެވެ. އަތޮޅުތެރޭގެ އެއް އެއަރޕޯޓުން އަނެއް އެއަރޕޯޓަށް ދަތުރުކުރުމުގައި ވިޔަފާރީގެ ގޮތުން ޑިމާންޑް ކުޑަވުމަކީ ކުރިން މިފަދަ ޚިދުމަތެއް ފެށުމަށް އޮތް އެންމެ ބޮޑު ގޮންޖެހުމެވެ. ނަމަވެސް، މިހާރު ފަށާފައިވާ ކަނެކްޓިވިޓީ ދަތުރުތަކުގެ ސަބަބުން ދެކުނުގެ ރައްޔިތުންނަށް ދުރާލާ ދަތުރުތައް ރާވަން ފަސޭހަވެ، އެ ސަރަޙައްދުގެ ވިޔަފާރިއާއި ފަތުރުވެރިކަމަށް އިތުރު ކުރިއެރުންތަކެއް ލިބިގެންދާނެކަމަށް މޯލްޑިވިއަނުން ޤަބޫލުކުރެއެވެ.
މީގެ އިތުރުން، މިއީ އައްޑޫ އިންޓަރނޭޝަނަލް އެއާޕޯޓަށް ސީދާ ފްލައިޓުތައް ބޭއްވުމަށް ބޭނުންވާ ބެޑް ކެޕޭސިޓީއަށް ވާސިލުވުމަށް އެޅޭ ވަރަށް މުހިއްމު ފިޔަވަޅެކެވެ. އަދި މި ބަދަލާއެކު ދެކުނުގެ ސިއްޙީ ނިޒާމު ހަރުދަނާވެ، ބޭސްފަރުވާއަށް މާލެއަށް ކުރަންޖެހޭ ދަތުރުތައްވެސް ބޮޑުތަނުން މަދުވެގެންދާނެކަމަށް ސަރުކާރުން ދެކެއެވެ. އެހެންކަމުން ދަތުރުފަތުރުގެ ނިޒާމަށް ގެނެވުނު މި އިންޤިލާބީ ބަދަލަކީ ފަރުދީ އަދި އަތޮޅު ފެންވަރުގައިވެސް ރައްޔިތުންނަށް ގިނަގުނަ ފައިދާތަކެއް ކުރާނެ މުހިއްމު މަޝްރޫޢެކެވެ.
ކޮމެންޓު ފޮނުވާ