އަވަށްޓެރި ގަލްފުގެ ގައުމުތަކަށް ހަމަލާނުދޭނެކަމަށް ބުނުމަށްފަހު، އީރާނުން އަނެއްކާވެސް އެ ގައުމުތަކަށް އަމާޒުކޮށް މިސައިލާއި ޑްރޯންގެ ވަރުގަދަ ހަމަލާތަކެއް ދީފިއެވެ.
އިއްޔެ އީރާނުން ދިން މި ހަމަލާތައް އަމާޒުކޮށްފައިވަނީ ގަތަރާއި، ސައުދީ އަރަބިއްޔާ، ބަހްރެއިން އަދި އެކުވެރި އަރަބި އިމާރާތް (ޔޫއޭއީ) އަށެވެ. މިއީ އެމެރިކާއާއި އިސްރާއީލުން އީރާނުގެ އެންމެ އިސް ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން ބަދަލުހިފުމުގެ ގޮތުން ދިން ހަމަލާތަކެއް ކަމަށް އީރާނުން ބުނެއެވެ. އީރާނުން ތުހުމަތުކުރާ ގޮތުގައި އެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތައް ދަނީ އީރާނާ ދެކޮޅަށް ބޭނުންކުރަމުންނެވެ. އެހެންކަމުން އެ މަރުކަޒުތަކަކީ އީރާނުގެ ދިފާއީ އޮޕަރޭޝަންތަކުގެ ޝަރުއީ އަމާޒުތަކެއް ކަމަށް އެ ގައުމުން ވަނީ ކަނޑައަޅާފައެވެ.
މީގެ ކުރިން އީރާނުގެ ރައީސް މަސްއޫދު ޕެޒެޝްކިއަން ވަނީ އަވަށްޓެރި ގައުމުތަކުގެ ބިން އީރާނަށް ހަމަލާދޭން ބޭނުންނުކުރާހާ ހިނދަކު ހަމަލާނުދޭނެ ކަމަށް ވިދާޅުވެފައެވެ. ނަމަވެސް ކުއްލި ގޮތަކަށް އަމާޒުތަކަށް ހަމަލާދިނުމުން، އީރާނުގެ އަސްކަރިއްޔާގެ މައްޗަށް ސިޔާސީ ލީޑަރުންގެ ފުރިހަމަ ބާރު ނުހިނގާކަން ބައިނަލްއަގުވާމީ މަސްރަހު ދިރާސާކުރާ ފަރާތްތަކުން ވަނީ ފާހަގަކޮށްފައެވެ. އީރާނުގެ ޖުޑިޝަރީއާއި ގާނޫނުހަދާ މަޖިލީހުގެ އިސްވެރިންވެސް ވަނީ މި ހަމަލާތަކަށް ތާއީދުކުރައްވައި، ސަރަހައްދުގައި އެމެރިކާގެ ބާރުތައް އޮތްހާ ހިނދަކު ސުލްހަ ނުލިބޭނެކަމަށް ވިދާޅުވެފައެވެ.
އީރާނުގެ މި ތުހުމަތުތައް ދޮގުކޮށް، ގަލްފުގެ ގައުމުތަކުން ވަނީ ދިފާއީ ފިޔަވަޅުތައް ވަރުގަދަކޮށްފައެވެ. އެގޮތުން ޔޫއޭއީން 15 ބެލިސްޓިކް މިސައިލާއި 119 ޑްރޯން ވައްޓާލާފައިވާއިރު، ސައުދީންވެސް ވަނީ އެ ގައުމުގެ ތެޔޮ ކާރުޚާނާތަކަށާއި ވައިގެ މަރުކަޒުތަކަށް ދިން ހަމަލާތައް ދިފާއުކޮށްފައެވެ. އަދި ގަތަރުން ވަނީ މިކަމުގެ ބަދަލު ހިފާނެ ކަމުގެ އިންޒާރު ދީފައެވެ. މި ހަމަލާތަކުގެ ސަބަބުން ދުބާއީ އިންޓަނޭޝަނަލް އެއާޕޯޓުގެ އޮޕަރޭޝަންތަކަށް ބުރޫއަރައި، ބަހްރެއިންގައި އާންމުން ރައްކާތެރި ތަންތަނަށް ވަނުމަށް ވަނީ އަންގާފައެވެ.
މި މައްސަލައިގައި އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުން އަމާންނުދީފިނަމަ އެ ގައުމަށް ދޭ ހަމަލާތައް އިތުރަށް ވަރުގަދަ ކުރައްވާނެ ކަމުގެ އިންޒާރު ދެއްވާފައެވެ. ނަމަވެސް އީރާނުގެ ރައީސް ވަނީ އެމެރިކާއަށް ދުވަހަކުވެސް އަމާންނުދޭނެކަމަށް ވިދާޅުވެ ރައްދުދެއްވާފައެވެ. އީރާނާއި، އެމެރިކާ އަދި އިސްރާއީލާ ދެމެދު ހިނގަމުންދާ މި ނުރައްކާތެރި ކުރިމަތިލުންތަކުގެ ސަބަބުން މެދުއިރުމަތީގެ މަސްރަހު އިންތިހާއަށް ގޯސްވެ، ދުނިޔޭގެ އިގުތިސާދަށާއި ތެލުގެ ބާޒާރަށް އޭގެ ނޭދެވޭ އަސަރުތައް ދަނީ ފޯރަމުންނެވެ.
ކޮމެންޓު ފޮނުވާ