މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ތައާރަފުކޮށްފައިވާ "ސީ-ޓު-އެއާ" ކާގޯ ޚިދުމަތް މެދުވެރިކޮށް، ނިމިދިޔަ ފެބްރުއަރީ މަހުގެ ތެރޭގައި 99 ޓަނަށްވުރެ ގިނަ މުދާ އުފުލާފައިވާކަމަށް އެ ކުންފުނިން ހާމަކޮށްފިއެވެ.
މި ޚިދުމަތުގެ ދަށުން ފެބްރުއަރީ މަހު އެކަނިވެސް 20 ޤައުމަކުން ގެނައި މުދާ، ވައިގެ މަގުން ދުނިޔޭގެ އެކި ކަންކޮޅުތަކަށް ވަނީ ފޮނުވާފައެވެ. އެމްޕީއެލްއިން މައުލޫމާތު ދިން ގޮތުގައި މި މުދާތައް އުފުލުމުގައި 6 އެއާލައިނަކުން ބައިވެރިވެފައިވާއިރު، ޖުމްލަ 6 މަންޒިލަކަށް ކާމިޔާބުކަމާއެކު ކާގޯ ފޯރުކޮށްދީފައިވެއެވެ.
މިދިޔަ 2024 ވަނަ އަހަރުގެ މެއި މަހުގެ 15 ވަނަ ދުވަހު ރަސްމީކޮށް ފެށި މި ޚިދުމަތަކީ، ކަނޑު މަގުން ރާއްޖެ އެތެރެކުރާ މުދާ، ލަސްނުކޮށް ވައިގެ މަގުން އެހެން މަންޒިލްތަކަށް ފޯރުކޮށްދިނުމަށް ފަރުމާކޮށްފައިވާ ހައިބްރިޑް މޮޑެލްގެ ޚިދުމަތެކެވެ. މިއީ ބައިނަލްއަޤްވާމީ ވިޔަފާރީގެ ވިއުގަައިގެ ތެރެއަށް ރާއްޖެ ވަދެ، އިޤްތިޞާދީ ގޮތުން ރާއްޖެއަށް ބޮޑެތި މަންފާތަކެއް ލިބެމުން އަންނަ، އަދި ރާއްޖޭގެ ދައުރު ފުޅާކޮށްދޭ މުހިންމު މަސައްކަތެކެވެ.
މި ޚިދުމަތް ފުޅާވުމުގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) ތަރައްޤީކުރުމުގެ މަޝްރޫޢުގެ ދަށުން ޤާއިމުކޮށްފައިވާ އައު ކާގޯ ޓާމިނަލްގެ ދައުރު ބޮޑެވެ. މިދިޔަ އަހަރުގެ ކުރީކޮޅު ހުޅުވި މި ޓާމިނަލަކީ އަހަރަކު 120،000 ޓަނުގެ ކާގޯ ހެންޑްލްކުރުމުގެ ޤާބިލުކަން ލިބިފައިވާ ތަނަކަށްވާއިރު، މި ވަސީލަތްތަކާއެކު ރާއްޖެއިން އުފުލާ ކާގޯގެ ނިސްބަތް ދުވަހެއް ދުވަހަކަށް އިތުރުވަމުން އަންނަ ކަމަށް ތަފާސްހިސާބުތަކުން ދައްކައެވެ.
ކޮމެންޓު ފޮނުވާ