ހުޅުމާލޭގައި ފުޓްބޯޅަ ޓްރެއިނިންގ ސްކޫލެއް ތަރައްގީކުރުމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދޫކޮށްފައިވާ ބިމުން ބައެއް، މާކެޓް ރޭޓަށްވުރެ އިންތިހާއަށް ކުޑަ އަގެއްގައި ކުއްޔަށް ދޫކުރުމުގެ ސަބަބުން އެ އިދާރާއަށް ލިބެން އޮތް 590 މިލިއަނަށްވުރެ ގިނަ ރުފިޔާގެ އާމްދަނީއެއް ގެއްލިފައިވާކަން އޮޑިޓް ރިޕޯޓުން ހާމަވެއްޖެއެވެ.
އޮޑިޓަ ޖެނެރަލް ހުސައިން ނިޔާޒީ މިދިޔަ ބުދަ ދުވަހު ނެރުއްވި ހާއްސަ އޮޑިޓް ރިޕޯޓުގައިވާ ގޮތުން، ހުޅުމާލެއިން ވިޔަފާރި އުސޫލުން ބިން ދޫކުރާ އެވްރެޖް ރޭޓަކީ އަކަފޫޓަކަށް މަހަކު 20.23 ރުފިޔާއެވެ. އެހެންނަމަވެސް އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދައުރުގައި، އެ އިދާރާގެ ބިމުން 74،958 އަކަފޫޓު އަމިއްލަ ފަރާތްތަކަށް ދޫކޮށްފައިވަނީ އަކަފޫޓެއް އެންމެ 2.91 ރުފިޔާގެ ރޭޓުންނެވެ. މިއީ މާކެޓް ރޭޓާ އަޅާބަލާއިރު ނުހަނު ކުޑަ އަގެެކެވެ.
މި މުއާމަލާތްތަކުގެ ހިސާބުތައް ދައްކާގޮތުން، މިހާރު ހަދާފައިވާ އެއްބަސްވުންތަކުގެ ދަށުން އެފްއޭއެމަށް ލިބޭނެކަމަށް ލަފާކުރެވެނީ އެންމެ 66.5 މިލިއަން ރުފިޔާއެވެ. ނަމަވެސް އެޗްޑީސީން ބިން ދޫކުރާ މާކެޓް ރޭޓުގައި މި ބިންތައް ދޫކުރިނަމަ، އެއްބަސްވުމުގެ މުއްދަތުގައި 590.6 މިލިއަން ރުފިޔާގެ އާމްދަނީއެއް ލިބުނީސް ކަމަށް އޮޑިޓަ ޖެނެރަލް ލަފާކުރައްވައެވެ. އެހެންކަމުން މިއީ ގާތްގަނޑަކަށް 524 މިލިއަން ރުފިޔާގެ ބޮޑު ގެއްލުމެއްކަން ރިޕޯޓުގައި ފާހަގަކޮށްފައިވެއެވެ.
މީގެ އިތުރުން، ކުއްޔަށް ދޫކުރި ގިނަ ބިންތަކުގެ ފައިސާ އެޑްވާންސްކޮށް ނަގާފައިވުމަކީވެސް މާލީގޮތުން ލިބުނު ގެއްލުމެއްގެ ގޮތުގައި އޮޑިޓގައި ފާހަގަކުރެއެވެ. ފައިސާގެ މިހާރުގެ އަގަށް (ކަރަންޓް ވެލިއު) ބަލާއިރު މާކެޓް ރޭޓުންނަމަ އެއީ 146.4 މިލިއަން ރުފިޔާއެވެ. ނަމަވެސް އެފްއޭއެމަށް ލިބެނީ 66.5 މިލިއަން ރުފިޔާ ކަމަށްވުމުން، މިއީ މިހާރުގެ އަގުން ބެލިޔަސް 79.9 މިލިއަން ރުފިޔާގެ ގެއްލުމެކެވެ.
މި މައްސަލައިގައި ކަންބޮޑުވުން ފާޅުކުރައްވައި އޮޑިޓަ ޖެނެރަލް ވިދާޅުވީ، އާދަޔާ ހިލާފަށް ކުޑަ އަގެއްގައި ބިންތައް ދޫކުރުމުން އެފްއޭއެމްގެ މާލީ ހަމަޖެހުމަށް ވަނީ ބޮޑު ހުރަހެއް އެޅިފައެވެ. އަދި މިކަމުގެ ސަބަބުން އެ ބިންތައް ކުއްޔަށް ނެގި ފަރާތްތަކަށް ނާޖާއިޒު ބޮޑު ފައިދާއެއް ލިބި، އެފްއޭއެމަށް ލިބެން އޮތް އާމްދަނީގެ ބޮޑު ބައެއް ގެއްލިފައިވާކަމަށް ރިޕޯޓުގައި ވަނީ ބަޔާންކޮށްފައެވެ.
ކޮމެންޓު ފޮނުވާ