އެމެރިކާއާއި އިސްރާއީލު ގުޅިގެން އީރާނަށް ދެމުން އަންނަ ހަމަލާތަކާ ގުޅިގެން، އީރާނުން ހޮރްމޫޒް ކަނޑުއޮޅި ބަންދުކުރުމުގެ ސަބަބުން ދުނިޔޭގެ ބާޒާރުގައި ތެޔޮ ފީފާއެއްގެ އަގު 84.62 ޑޮލަރަށް އަރައިފިއެވެ.
މި މަހުގެ ތިންވަނަ ދުވަހު އީރާންގެ ރިވޮލިއުޝަނަރީ ގާޑް ފޯސްއިން ވަނީ ހޮރްމޫޒް ކަނޑުއޮޅި ބަންދުކުރިކަން ރަސްމީކޮށް އިއުލާނުކޮށްފައެވެ. ކަމާބެހޭ މާހިރުން ލަފާކުރައްވާ ގޮތުގައި މި ފިޔަވަޅުގެ ސަބަބުން ކުރިއަށް އޮތް ތަނުގައި ތެލުގެ އަގު އިންތިހާއަށް އުފުލިގެންދާނެއެވެ. ބާޒާރުގައި އަގުތައް އުފުލެން މެދުވެރިވި މައިގަނޑު ސަބަބުތަކުގެ ތެރޭގައި، މި ސަރަހައްދުން ކުރާ ޝިޕިންގ ދަތުރުތަކަށް ހުރަސްއެޅުމާއި ގަލްފް ގައުމުތަކުގެ ހަކަތައާ ބެހޭ އުމްރާނީ ވަސީލަތްތަކަށް (އިންފްރާސްޓްރަކްޗަރއަށް) ހަމަލާދީ އޮޕަރޭޝަންތަކަށް ބުރޫއެރުން ހިމެނެއެވެ.
އީރާނާއި އޮމާނާ ދެމެދު އޮންނަ ހޮރްމޫޒް ކަނޑުއޮޅިއަކީ ދުނިޔޭގެ ހަކަތައިގެ ބާޒާރަށް ނުހަނު މުހިންމު މަގެކެވެ. ދުނިޔޭގެ ފެންވަރުގައި ބޭނުންކުރާ ތެލުގެ ފަސްބައިކުޅަ އެއްބައި އަދި ލިކުއިފައިޑް ނެޗުރަލް ގޭސް (އެލްއެންޖީ) ގެ ގާތްގަނޑަކަށް 20 އިންސައްތަ ދަތުރުކުރަނީ މި މަގުންނެވެ. ނަމަވެސް، މިހާރުގެ ހާލަތު ހުރިގޮތުން މި ކަނޑުއޮޅި މެދުވެރިކޮށް ބޯޓުފަހަރު ދަތުރުކުރުން ވަނީ ގާތްގަނޑަކަށް އެއްކޮށް ހުއްޓުމަކަށް އައިސްފައެވެ.
ކޮމެންޓު ފޮނުވާ