ޖިނާއީ މައްސަލައެއްގައި ހެކިބަސް ދިން މީހަކަށް، ބަދަލުހިފުމުގެ ގޮތުން މަގުމަތިން ހަމަލާދިން މީހަކު ޖަލަށް ލުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި މީހެއްގެ ގައިގައި އަތްލުމުގެ ކުށް ސާބިތުވެ، އެއް މަހާއި 15 ދުވަހުގެ ޖަލު ހުކުމެއް އިއްވާފައިވަނީ ގދ. ތިނަދޫ، ގުލްބަކާގެ، އަބްދުﷲ އިސްރާގްގެ މައްޗަށެވެ. އޭނާގެ މައްޗަށް ދައުލަތުން ދައުވާ އުފުލީ، ކޯޓުގައި ހިނގަމުންދިޔަ އެހެން މައްސަލައެއްގައި ހެކިބަސްދިން، ހ. ގްރީން ހެވަން އަހްމަދު އުސާމްއަށް ހަމަލާ ދިނުމާ ގުޅިގެންނެވެ.
މި ހާދިސާ ހިނގާފައިވަނީ ސަލްމާން މިސްކިތުގެ ދެކުނު ފަރާތުގައި އޮންނަ ޓާފް ދަނޑާ ދިމާލުން ބޮޑުތަކުރުފާނު މަގުގެ ޕޭމަންޓް މަތީގައި އުސާމް ހުއްޓައި، އިސްރާގު އިތުރު ބަޔަކާއެކު ގޮސް އޭނާގެ ގައިގައި ޖަހައިގެންނެވެ. މިއީ ހެކިބަސް ދިން ގޮތާމެދު ހިތްހަމަނުޖެހި ބަދަލު ހިފުމުގެ ގޮތުން ދިން ހަމަލާއެއްކަން ތަހުގީގަށް ވަނީ އެނގިފައެވެ.
ޝަރީއަތުގެ މަޖިލީހުގައި އިސްރާގު ވަނީ އޭނާގެ މައްޗަށް އުފުލާފައިވާ ދައުވާއަށް އިއުތިރާފުވެފައެވެ. ކުށަށް އިއުތިރާފުވުމާ ގުޅިގެން، ގާޒީ ވަނީ އޭނާއަށް އަދަބު ކަނޑައެޅުމުގައި ލުއި ދެއްވައި، ޖަލު އަދަބު އެއް މަހާއި 15 ދުވަހަށް ކުޑަކޮށްދީފައެވެ.
ކޮމެންޓު ފޮނުވާ