އިޒްރޭލާއި އެމެރިކާއިން އީރާނާ ދެކޮޅަށް ދެމުންދާ ހަމަލާތަކަށް ރައްދު ދިނުމުގެ ގޮތުން، އީރާނުގެ އަސްކަރިއްޔާއިން ބަހްރޭންގައި ހުންނަ އެމެރިކާގެ މައި ވައިގެ މަރުކަޒަށް އަމާޒުކޮށް ވަރުގަދަ ހަމަލާތަކެއްދީ، އެތަން ބޭނުން ނުކުރެވޭ ވަރަށް ހަލާކުކޮށްލައިފިއެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ކުރިއަށް ގެންދާ "ޓްރޫ ޕްރޮމިސް 4″ އޮޕަރޭޝަނުގެ ދަށުން، ބަހްރޭންގެ "ޝެއިޚް އީސާ އެއާ ބޭސް" އަށް ދިން މި ހަމަލާތަކުގައި އެމެރިކާ ސިފައިންގެ ސްޓްރެޓެޖިކް 10 ކޮމާންޑް ޕޮއިންޓަކާއި އިކުއިޕްމަންޓް ކޮމްޕްލެކްސްތައް ވަނީ ގޮއްވާލާފައެވެ. މީގެ ތެރޭގައި އެއާ ކޮންޓްރޯލް ސެންޓަރުތަކާއި، މަތިންދާބޯޓަށް ތެޔޮ އަޅާ ގުދަންތަކުގެ އިތުރުން، އެމެރިކާގެ މަތީ ފަންތީގެ ކޮމާންޑަރުން ތިބޭ އިމާރާތްތައް ހިމެނޭ ކަމަށް އައި.އާރް.ޖީ.ސީގެ ބަޔާނުގައިވެއެވެ.
މި އޮޕަރޭޝަނުގައި ޑްރޯންއާއި މިސައިލް ބޭނުންކޮށްގެން ދިން ހަމަލާތައް އަމާޒުކުރި ތަންތަނަށް ސީދާ ވާސިލުވެފައިވާކަން ފާހަގަކޮށް އީރާނުން ބުނެފައިވަނީ، ހަމަލާތަކުގެ ސަބަބުން ތެޔޮ ގުދަންތަކުގައި ރޯވެ، މުޅި ސަރަހައްދު ދުމާއި އަލިފާނުން ފުރިގެން ދިޔަ ކަމަށެވެ. އަދި މަރުކަޒުގެ އިންފްރާސްޓްރަކްޗާ އެއްކޮށް ހަލާކުވެ، އުފެދުނު ނުރައްކާތެރި ހާލަތާ ގުޅިގެން އެތަނުގައި ތިބި އެމެރިކާ ސިފައިން މަރުކަޒު ދޫކޮށް ފިލާފައިވާ ކަމަށްވެސް އެ ގައުމުން ބުނެއެވެ.
މި ހަމަލާތަކުގައި އައި.އާރް.ޖީ.ސީގެ އިތުރުން އީރާނުގެ ރަސްމީ އަސްކަރިއްޔާއިންވެސް ދަނީ އަމަލީގޮތުން ބައިވެރިވަމުންނެވެ. އެގޮތުން އެއްގަމާއި، ކަނޑާއި ވައިގެ މަގުން ދެމުންދާ ހަމަލާތައް ފުޅާކޮށް، ގަތަރުގެ އަލް އުދައިދުގައި ހުންނަ އެމެރިކާގެ މަރުކަޒުތަކަށާއި، އިޒްރޭލުން ހިފާފައިވާ ފަލަސްތީނުގެ ބިންތަކުގައިވާ އަސްކަރީ އަމާޒުތަކަށްވެސް ވަނީ ހަމަލާދީފައެވެ.
ނިމިދިޔަ ހަފުތާގައި އެމެރިކާއާއި އިޒްރޭލުން ފެށި ހަމަލާތަކުގެ ބަދަލު ހިފުމުގެ ގޮތުން ކުރިއަށްގެންދާ މި އޮޕަރޭޝަންތައް މެދުކެނޑުމެއްނެތި ކުރިއަށްދާނެކަމުގެ އިންޒާރު އީރާނުގެ އަސްކަރިއްޔާއިން ވަނީ ދީފައެވެ.
ކޮމެންޓު ފޮނުވާ