އެމެރިކާއާއި އިސްރާއީލް ގުޅިގެން އީރާނަށް ދިން ވަރުގަދަ ހަމަލާތަކުގައި އެގައުމުގެ އެންމެ އިސްވެރިން އަވަހާރަކޮށްލުމަށްފަހު، ސުލްހައިގެ ވާހަކަތައް ދައްކަން މިހާރު މާ ލަސްވެއްޖެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް ވިދާޅުވި ގޮތުގައި އީރާނުގެ ވައިގެ ދިފާއީ ނިޒާމާއި، އަސްކަރިއްޔާގެ އިސް ލީޑަޝިޕް ނައްތާލެވިފައިވާ މި ދަނޑިވަޅުގައި އީރާނުން މަޝްވަރާކުރަން ބޭނުންވި ނަމަވެސް، އެ ފުރުސަތު ދެން ނެތެވެ. މީގެ ކުރިން 'ދަ އެޓްލާންޓިކް' މަޖައްލާއަށް ދެއްވި އިންޓަވިއުއެއްގައި އީރާނުގެ އާ ލީޑަޝިޕާއެކު ވާހަކަދައްކަވަން ތައްޔާރަށް ހުންނެވިކަމަށް ޓްރަމްޕް ވިދާޅުވި ނަމަވެސް، ހަމަލާތަކަށްފަހު އޭނާގެ ރާގު ވަނީ ބަދަލުވެފައެވެ. "މިހާރު ވަގުތު ފާއިތުވެއްޖެ" ކަމަށް ވިދާޅުވެ ޓްރަމްޕް ވަނީ މަޝްވަރާގެ ދޮރު ބަންދުކުރައްވާފައެވެ.
މިދިޔަ ހޮނިހިރު ދުވަހުގެ ހެނދުނު ކަނޑާއި ވަޔާ މަގުން ދޭން ފެށި މި ވަރުގަދަ ހަމަލާތަކުގައި އީރާނުގެ ވެރިރަށް ތެހެރާނާއި މުހިންމު ސިޓީތަކަށް ބޮންއަޅައި، އެއާޕޯޓްތަކާއި އަސްކަރީ މަރުކަޒުތައް ވަނީ ސުންނާފަތިކޮށްފައެވެ. މި ހަމަލާތަކުގައި އީރާނުގެ ރޫޙާނީ ލީޑަރު އާޔަތުﷲ އަލީ ޚާމަނާއީ އާއި، ދިފާއީ ވަޒީރު އަޒީޒް ނާސިރުޒާދާ އާއި އަސްކަރިއްޔާގެ ޗީފް އޮފް ސްޓާފް އަބްދުލް ރާހިމް މޫސާވީގެ އިތުރުން ކުރީގެ ރައީސް މަހްމޫދު އަހްމަދީނިޖާދު އަވަހާރަކޮށްލާފައިވާކަން ފާހަގަކޮށްލެވެއެވެ.
މި ހަމަލާތައް ބަދަލުކުރަން ފެށުމުގެ ކުރިން، މިދިޔަ ބުރާސްފަތި ދުވަހު ވެސް ދެ ގައުމުގެ ދެމެދުގައި މަޝްވަރާތަކެއް ކުރެވުނެވެ. ނަމަވެސް ހަމަލާތައް ފެށުމާއެކު މަޝްވަރާތައް ހުއްޓި، އީރާނުން ވެސް ވަނީ ބަދަލުހިފުމުގެ ގޮތުން އިސްރާއީލާއި މެދުއިރުމަތީގައި ހުރި އެމެރިކާގެ މަރުކަޒުތަކަށް ރައްދު ހަމަލާތަކެއް ދީފައެވެ.
ކޮމެންޓު ފޮނުވާ