އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ތާވަލުކޮށްފައިވާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލުމަށް ރަޖިސްޓަރީވެފައިވާ ފޮށީގެ މައުލޫމާތު ހިމެނޭ ލިސްޓު އިލެކްޝަންސް ކޮމިޝަނުން މިއަދު އާންމުކޮށްފިއެވެ.
އިންތިޚާބީ މަރުކަޒުތަކުގެ ރަޖިސްޓަރީ އާންމުކުރުމާ ގުޅިގެން، އެކަމަށް ޝަކުވާ ހުށަހެޅުމުގެ ފުރުޞަތު ވެސް ކޮމިޝަނުން މިހާރު ވަނީ ހުޅުވާލާފައެވެ. އެގޮތުން މިއަދު ހެނދުނު 10:00 އިން ފެށިގެން މާދަމާ މެންދުރުފަހު 1:30 ގެ ނިޔަލަށް ޝަކުވާ ހުށަހެޅުމުގެ ވަގުތު އޮންނާނެއެވެ. އިލެކްޝަންސް ކޮމިޝަނުން އަންގާފައިވާ ގޮތުގައި، ވޯޓުލާން ރަޖިސްޓަރީކޮށްފައިވާ ފޮށީގެ މައުލޫމާތާ ގުޅޭގޮތުން ހުށަހަޅާ ޝަކުާތައް މިފަހަރު ބަލައިގަންނާނީ ހަމައެކަނި އެ ކޮމިޝަނުގެ "މައި އިލެކްޝަންސް" ޕޯޓަލް މެދުވެރިކޮށް އޮންލައިންކޮށެވެ.
ރައްޔިތުންނަށް ފަސޭހަކަމާއެކު މައުލޫމާތު ޔަޤީންކުރުމަށްޓަކައި، އަމިއްލައަށް ރަޖިސްޓަރީ ވެފައިވާ ފޮށި ޗެކްކުރެވޭނެ ނިޒާމުވެސް ވަނީ ޤާއިމުކޮށްފައެވެ. އެގޮތުން VR ޖެއްސެވުމަށްފަހު ހުސްތަންކޮޅެއް ދޫކޮށްފައި އައި.ޑީ ކާޑު ނަންބަރު ޖަހައި 1414 އަށް އެސް.އެމް.އެސް ކުރުމުން ނުވަތަ ކޮމިޝަނުގެ ވެބްސައިޓުގައިވާ ޚާއްޞަ ޕޯޓަލް މެދުވެރިކޮށް ވެސް މި މައުލޫމާތު ސާފުކުރެވޭނެއެވެ.
މި އިންތިޚާބާ ގުޅުންހުރި އިތުރު އެއްވެސް މައުލޫމާތެއް އޮޅުންފިލުއްވަން ބޭނުންވާނަމަ، އިލެކްޝަންސް ކޮމިޝަނުގެ ހޮޓްލައިން 1414 އަށް ގުޅުއްވުމަށް އެ އިދާރާއިން އިލްތިމާސްކުރެއެވެ.
ކޮމެންޓު ފޮނުވާ