އެމެރިކާ އާއި އިސްރާއީލް ގުޅިގެން ދެމުންގެންދާ ހަމަލާތަކަށް ރައްދު ދިނުމުގެ ގޮތުން އީރާނުން ދިން ވަރުގަދަ ހަމަލާތަކެއްގައި އެމެރިކާ ސިފައިންގެ ހަ މީހަކު މަރުވެއްޖެއެވެ.
މި ހާދިސާއާ ގުޅިގެން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ނެރުނު ބަޔާނެއްގައި ވަނީ، މީގެ ކުރިން ވީނުވީއެއް ނޭނގި ގެއްލިފައިވާ ކަމަށް ބެލެވުނު އެމެރިކާގެ ދެ ސިފައިންގެ ހަށިގަނޑު ފެނިފައިވާކަން ކަށަވަރުކޮށްދީފައެވެ. އެހެންނަމަވެސް، މި ސިފައިންގެ ހަށިގަނޑު ފެނުނު ވަކި ސަރަހައްދެއް އެމެރިކާގެ އަސްކަރިއްޔާއިން ރަސްމީކޮށް ހާމަކޮށްފައެއް ނުވެއެވެ. އަސްކަރިއްޔާއިން ހަމައެކަނި ބުނެފައިވަނީ މިއީ އީރާނުގެ ހަމަލާތަކުގައި މަރުވި ސިފައިންތަކެއް ކަމަށެވެ.
އެމެރިކާގެ އަސްކަރިއްޔާއިން އިތުރަށް ހާމަކުރި ގޮތުގައި، ފެނުނު ހަށިގަނޑުތަކަކީ އީރާނުން އެ ސަރަހައްދަށް ދިން ފުރަތަމަ ހަމަލާތައް އަމާޒުވި ތަނަކުން، ހޯދިފައިނުވާ ސިފައިން ހޯދުމަށް ކުރިއަށް ގެންދިޔަ މަސައްކަތްތަކުގެ ތެރެއިން ދާދި ފަހުން ފެނުނު ހަށިގަނޑުތަކެކެވެ.
މި ހަމަލާތައް އަމާޒުވި ތަނެއް ކަމަށް ބެލެވިފައިވަނީ ކުވައިތުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒަކަށެވެ. އަދި މި ސިފައިން މަރާލާފައިވަނީ އެ މަރުކަޒަށް އަމާޒުކޮށް ދިން ނުރައްކާތެރި ވައިގެ ހަމަލާތަކެއްގައި ކަމަށް ރިޕޯޓުތައް ބުނެއެވެ.
ކޮމެންޓު ފޮނުވާ