މާލޭގައި ގަވާއިދާ ހިލާފަށް ބަނގުރާގެ ވިޔަފާރި ކުރަމުންދިޔަ ކަމުގެ ތުހުމަތުގައި ހަތަރު ބިދޭސީއަކު ހައްޔަރުކޮށް، އެ މީހުން އަނބުރާ ގައުމަށް ފޮނުވާލުމަށްޓަކައި އިމިގްރޭޝަނާ ހަވާލުކޮށްފިއެވެ.
ފުލުހުންގެ ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން މި މަހުގެ 20 ވަނަ ދުވަހު ހިންގި ހާއްސަ އޮޕަރޭޝަނެއްގައި މި މީހުން ހައްޔަރުކޮށްފައިވަނީ މާލެއިންނެވެ. މި އޮޕަރޭޝަނުގެ ތެރެއިން މާފަންނު އަވަށުގެ ގެއެއް ބަލައި ފާސްކުރިއިރު، 54 ފުޅި ބަނގުރާ ފެނިފައިވާ ކަމަށް ފުލުހުން ވަނީ މައުލޫމާތު ދީފައެވެ.
މި މައްސަލައިގައި ޝާމިލުވާ ކަމުގެ ތުހުމަތުގައި ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ ހަތަރު ފިރިހެނުންނެވެ. އެއީ އުމުރުން 21 އަހަރުގެ ސިޕޮން އަލީ އާއި، 32 އަހަރުގެ ޖުވެލް ރަނާގެ އިތުރުން 20 އަހަރުގެ އެމްޑީ ނަޒްރުލް އިސްލާމް އަދި 22 އަހަރުގެ އެމްޑީ އިބްރާހީމް އެވެ.
ފުލުހުން ހާމަކުރި ގޮތުގައި، ބަނގުރާ ވިއްކުމާއި އެތަކެތި އުުފުލުމަށް މި މީހުން ބޭނުންކުރި ސައިކަލު މިހާރު ވަނީ ޓޯކޮށްފައެވެ. އަދި ހައްޔަރުކުރެވުނު ހަތަރު މީހުން ރާއްޖެއިން ފޮނުވާލުމަށްޓަކައި (ޑީޕޯޓްކުރުމަށް) މިހާރު ވަނީ މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފައެވެ. މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
ކޮމެންޓު ފޮނުވާ