އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސް އުޅެނިކޮށް ސިއްހީ ހާލަތު ގޯސްވެ، އެނދުމަތިކުރި ދިވެހި އުމްރާވެރިޔާ އިތުރު ފަރުވާއަށް މޯލްޑިވިއަންގެ ފްލައިޓެއްގައި މާލެ ގެނެސްފިއެވެ. މިދިޔަ ހޮނިހިރު ދުވަހު މި ބަލިމީހާ މާލެ ގެނައީ، ދަތުރުމަތީގައި އޭނާގެ ހާލަތު އިތުރަށް ގޯސްވެދާނެތީ، ރައްކާތެރިކަމުގެ ފިޔަވަޅެއްގެ ގޮތުން ޚާއްސަ ޑޮކްޓަރަކާއި ނަރުހަކާ އެކުގައެވެ.
މައުލޫމާތު ލިބިފައިވާ ގޮތުގައި އެ މީހާ މާލެ ގެނެސްފައިވަނީ ވެންޓިލޭޓަރުގައެވެ. ނަމަވެސް މިކަމާ ގުޅޭ އިތުރު ތަފްސީލެއް ގައުމީ އެއާލައިނުން ހާމަކޮށްފައެއް ނުވެއެވެ. އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މީގެ ކުރިން ވިދާޅުވެފައިވާ ގޮތުގައި، ބަލިމީހާ މާލެ ގެނައުމުގެ އިންތިޒާމުތައް ހަމަޖައްސާފައިވަނީ އެ މީހާގެ އާއިލާއާއި، ސަރުކާރުގެ މައި ހޮސްޕިޓަލް އައިޖީއެމްއެޗް އަދި މޯލްޑިވިއަން ގުޅިގެންނެވެ.
މި ދުވަސްވަރަކީ ގިނަ އަދަދެއްގެ ދިވެހިން އުމްރާގެ އަޅުކަމަށް ގޮސް އުޅޭ ދުވަސްވަރެކެވެ. އެގޮތުން މި ބަންދުގައި އެކަނިވެސް 7،726 މީހުން އުމްރާއަށް ގޮސްފައިވާއިރު، ޖުމްލަކޮށް ހުރިހާ އުމްރާވެރިންގެ ހާލުވެސް ރަނގަޅުކަމަށް މިނިސްޓަރު ވަނީ ފާހަގަކުރައްވާފައެވެ.
ކޮމެންޓު ފޮނުވާ